ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ຕ້ອນຮັບການເຂົ້າຢ້ຽມອຳລາຂອງຜູ້ຕາງໜ້າອົງການອົງການອຸຍນິເຊັບ

ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ປະດັບຫຼຽນກາມິດຕະພາບ ໃຫ້ແກ່ ຜູ້ຕາງໜ້າອົງການອົງການອຸຍນິເຊັບ

ໃນຕອນບ່າຍຂອງວັນທີ 22 ມິຖຸນາ 2017, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມຂ່ຳນັບອຳລາຂອງ ທ່ານ ນາງ ຫົງເວ ກາວ (Hongwei GAO), ຜູ້ຕາງໜ້າອົງການອຸຍນິເຊັບ ປະຈໍາ ສປປ ລາວ, ເນື່ອງໃນໂອກາດສໍາເລັດການປະຕິບັດໜ້າທີ່ຢູ່ ສປປ ລາວ.

ໃນໂອກາດນີ້, ທ່ານລັດຖະມົນຕີກະຊວງການຕ່າງປະເທດ ໄດ້ສະແດງຄວາມຊົມເຊີຍຕໍ່ຜົນສຳເລັດຂອງ ທ່ານ ນາງ ຫົງເວ ກາວ ຕະຫຼອດໄລຍະເວລາທີ່ມາປະຕິບັດໜ້າທີ່ເປັນຜູ້ຕາງໜ້າອົງການອຸຍນິເຊັບຢູ່ ສປປ ລາວ ໂດຍສະເພາະການຈັດຕັ້ງປະຕິບັດແຜນງານການຮ່ວມມືຂອງອົງການອຸຍນິເຊັບ ກັບ ລັດຖະບານ ສປປ ລາວ, ເຊິ່ງແຜນງານດັ່ງກ່າວ ແມ່ນສອດຄ່ອງກັບແນວທາງນະໂຍບາຍ ແລະ ບູລິມະສິດການພັດທະນາຂອງປະເທດລາວ ອັນໄດ້ປະກອບສ່ວນສຳຄັນເຂົ້າໃນການພັດທະນາເສດຖະກິດ-ສັງຄົມ ຂອງປະເທດເຮົາດີຂຶ້ນເທື່ອລະກ້າວ. ທ່ານ ຍັງສະແດງຄວາມຂອບໃຈມາຍັງອົງການອຸຍນິເຊັບຕໍ່ການຊ່ວຍເຫຼືອດັ່ງກ່າວ​ ແລະ ຫວັງວ່າໃນຕໍ່ໜ້າອົງການອຸຍນິເຊັບ ຈະສືບຕໍ່ເພີ່ມທະວີໃຫ້ການສະໜັບສະໜູນຊ່ວຍເຫຼືອ ສປປ ລາວ ຕື່ມອີກ ເພື່ອປະກອບສ່ວນເຂົ້າໃນການບັນລຸເປົ້າໝາຍການພັດທະນາກໍ່ຄື ເຮັດໃຫ້ ສປປ ລາວ ສາມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາ.

ທ່ານ ນາງ ຫົງເວ ກາວ ກໍ່ສະແດງຄວາມຂອບໃຈຕໍ່ການຕ້ອນຮັບທີ່ອົບອຸ່ນໃນຄັ້ງນີ້, ພ້ອມທັງໄດ້ສະແດງຄວາມຮູ້ບຸນຄຸນຕໍ່ລັດຖະບານ ແຫ່ງ ສປປ ລາວ ທີ່ໄດ້ເອົາໃຈໃສ່ໃຫ້ການຮ່ວມມືສະໜັບສະໜູນການປະຕິບັດໜ້າທີ່ຂອງຜູ້ກ່ຽວຕະຫຼອດໄລຍະເວລາທີ່ຜູ້ກ່ຽວມາຮັບໜ້າທີ່ຢູ່ ສປປ ລາວ ແລະ ຖືເປັນກຽດຢ່າງສູງທີ່ຕົນໄດ້ຮັບຫຼຽນກາມິດຕະພາບ ຈາກລັດຖະບານ ແຫ່ງ ສປປ ລາວ, ເຊິ່ງເປັນການຢັ້ງຢືນເຖິງຄວາມເອົາໃຈໃສ່ ແລະ ການໃຫ້ຄວາມສຳຄັນຕໍ່ກັບການຮ່ວມມືລະຫວ່າງ ສປປ ລາວ ແລະ ອົງການອຸຍນິເຊັບ ໃນຕະຫຼອດໄລຍະທີ່ຜ່ານມາ ຊຶ່ງໄດ້ຮັບຜົນສຳເລັດໃນຫຼາຍດ້ານ. ຕອນທ້າຍ, ທ່ານລັດຖະມົນຕຄກະຊວງການຕ່າງປະເທດ ກໍ່ໄດ້ອວຍພອນໄຊໃຫ້ ທ່ານ ນາງ ຫົງເວ ກາວ ຈົ່ງມີສຸຂະພາບແຂງແຮງ ແລະ ມີຜົນສຳເລັດໃນການປະຕິບັດໜ້າທີ່ໃໝ່ຢູ່ ສຳນັກງານໃຫຍ່ອົງການອຸຍນະເຊັບ ທີ່ນິວຢອກ.

ໃນຕອນບ່າຍຂອງມື້ດຽວກັນ, ກໍ່ໄດ້ມີພິທີປະດັບຫຼຽນກາມິດຕະພາບໃຫ້ແກ່ ທ່ານ ນາງ ຫົງເວ ກາວ ຜູ້ທີ່ມີຜົນງານ, ຄຸນງາມຄວາມດີປະກອບສ່ວນເຂົ້າໃນ ໜ້າທີ່ວຽກງານການຈັດຕັ້ງປະຕບັດແຜນການຮ່ວມມືລະຫວ່າງອົງການອຸຍນິເຊັບ ແລະ ລັດຖະບານ ສປປ ລາວ ໄດ້ຮັບຜົນສຳເລັດເປັນຢ່າງດີໃນໄລຍະຜ່ານມາ ໂດຍແມ່ນ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ຕາງໜ້າໃຫ້ລັດຖະບານ ແຫ່ງ ສປປ ລາວ ເປັນກຽດປະດັບຫຼຽນກາມິດຕະພາບໃຫ້ແກ່ ທ່ານ ນາງ ຫົງເວ ກາວ ໂດຍມີຄະນະກົມກ່ຽວຂ້ອງ ຈາກກະຊວງການຕ່າງປະເທດ ແລະ ກະຊວງຂະແໜງການທີ່ກ່ຽວຂ້ອງ, ມີຜູ້ຮັກສາການຜູ້ປະສານງານອົງການ ສປຊ, ທ່ານຮອງຜູ້ຕາງໜ້າອົງການ ສປຊ ເພື່ອການພັດທະນາ ແລະ ທີມງານຂອງອົງການອຸຍນິເຊັບ ປະຈຳ ສປປ ລາວ ເຂົ້າຮ່ວມເປັນສັກຂີພະຍານ.