ໃນວັນທີ 6 ສິງຫາ 2017, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມ ລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 10 ທີ່ ມະນິລາ, ປະເທດຟິລິບປິນ, ໂດຍການເປັນປະທານກອງປະຊຸມຂອງທ່ານ ທາໂຣ ໂກໂນ, ລັດຖະມົນຕີກະຊວງການຕ່າງປະເທດຍີ່ປຸ່ນ ແລະ ມີບັນດາລັດຖະມົນຕີກະຊວງການຕ່າງປະເທດ ຈາກ ກຳປູເຈຍ, ມຽນມາ, ໄທ ແລະ ຫວຽດນາມ ພ້ອມຄະນະ ເຂົ້າຮ່ວມ.
ກອງປະຊຸມ ໄດ້ສະແດງຄວາມຍິນດີຕໍ່ການສະເຫຼີມສະຫຼອງຄົບຮອບ 10 ປີ ຂອງກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ແລະ ໄດ້ທົບທວນຄືນ ການຈັດຕັ້ງປະຕິບັດແຜນປະຕິບັດງານແມ່ນ້ຳຂອງ-ຍີ່ປຸ່ນ ຕາມແຜນຍຸດທະສາດໂຕກຽວ 2015 ທີ່ປະກອບມີ 4 ເສົາຄໍ້າບູລິມະສິດຄື: (1) ການພັດທະນາພື້ນຖານໂຄງລ່າງ ທາງດ້ານອຸດສາຫະກໍາ ໃນພາກພື້ນແມ່ນໍ້າຂອງ, (2) ການພັດທະນາຊັບພະຍາກອນມະນຸດ ໃນຂະແໜງອຸດສາຫະກໍາ (3),ການພັດທະນາແບບຍືນຍົງ ເພື່ອແມ່ນໍ້າຂອງສີຂຽວ, ແລະ (4) ການປະສານງານກັບບັນດາ ອົງການຈັດຕັ້ງຕ່າງໆ ທີ່ຮ່ວມມືກັບພາກພື້ນແມ່ນໍ້າຂອງ.
ພ້ອມກັນນັ້ນ, ກອງປະຊຸມຍັງໄດ້ຕີລາຄາສູງຕໍ່ຄວາມພະຍາຍາມ ໃນການຈັດຕັ້ງປະຕິບັດ ຂໍ້ລິເລີ່ມການເຊື່ອມຈອດ ແມ່ນໍ້າຂອງ-ຍີ່ປຸ່ນ ເພື່ອເສີມຂະຫຍາຍການຮ່ວມມືທາງດ້ານໂຄງລ່າງ ແລະ ໂຄງບົນ ໂດຍຜ່ານບັນດາກິດຈະກໍາຕ່າງໆ ເຊັ່ນ: ການອໍານວຍຄວາມສະດວກດ້ານພາສີ-ອາກອນ ແລະ ການພັດທະນາຊັບພະຍາກອນມະນຸດ ຢູ່ໃນພາກພື້ນແມ່ນໍ້າຂອງ.
ນອກນັ້ນ, ບັນດາລັດຖະມົນຕີຕ່າງປະເທດແມ່ນໍ້າຂອງ ຍັງໄດ້ສະແດງຄວາມຂອບໃຈລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການຊ່ວຍເຫຼືອແກ່ບັນດາປະເທດແມ່ນໍ້າຂອງຕອນລຸ່ມ ເພື່ອສຶບຕໍ່ຈັດຕັ້ງປະຕິບັດໂຄງການ ແລະ ແຜນງານຕ່າງໆ ພາຍໃຕ້ແຜນປະຕິບັດງານແມ່ນ້ຳຂອງ-ຍີ່ປຸ່ນ ເພື່ອຜັນຂະຫຍາຍຍຸດທະສາດໂຕກຽວ 2015 ສະບັບໃໝ່ ໃຫ້ສໍາເລັດໃນປີ 2018.
ສຸດທ້າຍ, ກອງປະຊຸມໄດ້ຮັບຮອງເອົາຖະແຫຼງການກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 10 ເພື່ອເປັນແນວທາງໃນການຈັດຕັ້ງປະຕິບັດ ຂອບການຮ່ວມມືດັ່ງກ່າວ ໃນຕໍ່ໜ້າ.