ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນກັບບັນດາປະເທດຄູ່ເຈລະຈາ ທີ່ຈັດຂຶ້ນໃນວັນທີ 6 ສິງຫາ 2017 ທີ່ ມານິລາ, ປະເທດ ຟີລິບປິນ, ໂດຍມີກອງປະຊຸມລັດຖະມົນຕ່າງປະເທດອາຊຽນ-ຈີນ, ອາຊຽນ-ຍີ່ປຸ່ນ, ອາຊຽນ-ສ. ເກົາຫຼີ, ອາຊຽນ-ອິນເດຍ, ອາຊຽນ-ອົດສະຕຣາລີ, ອາຊຽນ-ສະຫະລັດ, ອາຊຽນ-ນິວຊີແລນ, ອາຊຽນ-ການາດາ, ອາຊຽນ-ອີຢູ, ແລະ ອາຊຽນ-ລັດເຊຍ.

          ໃນກອງປະຊຸມລັດຖະມົນຕີຕ່າງປະເທດ ອາຊຽນ-ລັດເຊຍ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ເປັນປະທານຮ່ວມກັບທ່ານ ເຊເກ ລາວາຣອບ (Sergey Lavrov), ລັດຖະມົນຕີຕ່າງປະເທດລັດເຊຍ, ໃນຖານະທີ່ ສປປ ລາວ ເປັນປະເທດປະສານງານໃຫ້ແກ່ການພົວພັນ ອາຊຽນ-ລັດເຊຍ. ກອງປະຊຸມ ໄດ້ສະແດງຄວາມຍິນດີຕໍ່ຄວາມຄືບໜ້າໃນການຈັດຕັ້ງຜັນຂະຫຍາຍຕາມການຕົກລົງຂອງຜູ້ນຳອາຊຽນ ແລະ ລັດເຊຍ ໃນກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ-ລັດເຊຍ ຄົບຮອບ 20 ປີ ທີ່ໄດ້ຈັດຂຶ້ນຢູ່ເມືອງໂຊຈິ, ລັດເຊຍ ໃນປີ 2016; ໄດ້ປຶກສາຫາລືຜົນຂອງການຈັດຕັ້ງປະຕິບັດແຜນປະຕິບັດງານ ອາຊຽນ-ລັດເຊຍ 2016-2020; ແລະ ໄດ້ຮັບຮອງເອົາເອກະສານສຳຄັນຈຳນວນໜຶ່ງຄື: 1). ຖະແຫຼງການ ວ່າດ້ວຍການຮ່ວມມືເພື່ອຕ້ານການກໍ່ການຮ້າຍ, 2). ທິດທາງໃນການຜັນຂະຫຍາຍຂໍ້ສະເໜີແນະ ຂອງຜູ້ຊົງຄຸນວຸດທິ ອາຊຽນ-ລັດເຊຍ ແລະ 3). ແນວຄວາມຄິດໃນການສ້າງຕັ້ງເຄືອຂ່າຍຄັງປັນຍາອາຊຽນ-ລັດເຊຍ. ໃນໂອກາດດັ່ງກ່າວ, ລັດຖະມົນຕີລັດເຊຍ ໄດ້ປະກາດແຕ່ງຕັ້ງທູດລັດເຊຍຄົນທຳອິດ ປະຈຳອາຊຽນ, ຊຶ່ງໄດ້ເປັນບາດກ້າວໃໝ່ໃນການເສີມຂະຫຍາຍການພົວພັນອາຊຽນ-ລັດເຊຍ ໃຫ້ແໜ້ນແຟ້ນຍິ່ງຂຶ້ນ.

          ກອງປະຊຸມລັດຖະມົນຕ່າງປະເທດອາຊຽນ-ຈີນ ໄດ້ຕີລາຄາສູງຕໍ່ຜົນສໍາເລັດຂອງກອງປະຊຸມສຸດຍອດ ເພື່ອສະເຫຼີມ ສະຫຼອງການພົວພັນອາຊຽນ-ຈີນ ຄົບຮອບ 25 ປີ ໃນປີ 2016, ລວມທັງການຮ່ວມມືທາງດ້ານການຄ້າ, ການລົງທຶນ, ການທ່ອງທ່ຽວ, ການແລກປ່ຽນລະຫວ່າງປະຊາຊົນກັບປະຊາຊົນ ທີ່ສືບຕໍ່ຂະຫຍາຍຕົວຢ່າງຕໍ່ເນື່ອງ. ກອງປະຊຸມ ໄດ້ລົງນາມບົດບັນທຶກຄວາມເຂົ້າໃຈ ວ່າດ້ວຍການສ້າງຕັ້ງສູນອາຊຽນ-ຈີນ ເພື່ອແນໃສ່ສົ່ງເສີມການຮ່ວມມືອາຊຽນ-ຈີນ ໃນດ້ານຕ່າງໆໃຫ້ນັບມື້ນັບຫຼາຍຂຶ້ນ, ແລະ ໄດ້ເຫັນດີຈະອອກຖະແຫຼງການຮ່ວມ ກ່ຽວກັບການຮ່ວມມືດ້ານການທ່ອງທ່ຽວ ໃນໂອກາດກອງປະຊຸມສຸດຍອດອາຊຽນ-ຈີນ ໃນທ້າຍປີ 2017, ຈະກຳນົດເອົາຂົງເຂດນະວັດຕະກຳ ເປັນຫົວຂໍ້ຈຸດສຸມການຮ່ວມມືອາຊຽນ-ຈີນ ໃນປີ 2018, ຈະໃຫ້ປຶກສາຫາລື ກ່ຽວກັບການຮ່າງວິໄສທັດການເປັນຄູ່ຮ່ວມຍຸດທະສາດ ອາຊຽນ-ຈີນ ຮອດປີ 2030 ເພື່ອໃຫ້ຜູ້ນຳພິຈາລະນາຮັບຮອງເອົາ ໃນປີ 2018, ແລະ ເຫັນດີຮັບຮອງເອົາໂຄງຮ່າງກົດແຫ່ງການປະພຶດ (COC) ເພື່ອແກ້ໄຂບັນຫາຄວາມຂັດແຍ່ງໃນທະເລຈີນໃຕ້.

          ກອງປະຊຸມລັດຖະມົນຕີຕ່າງປະເທດ ອາຊຽນ-ຍີ່ປຸ່ນ ໄດ້ຮັບຮອງເອົາແຜນຈັດຕັ້ງປະຕິບັດວິໄສທັດ ອາຊຽນ-ຍີ່ປຸ່ນ ວ່າດ້ວຍມິດຕະພາບ ແລະ ການຮ່ວມມື ສະບັບປັບປຸງໃໝ່ ເພື່ອເປັນພື້ນຖານໃຫ້ແກ່ການຮັດແໜ້ນການຮ່ວມມືໃນດ້ານຕ່າງໆເຊັ່ນ: ການເມືອງ-ຄວາມໝັ້ນຄົງ, ເສດຖະກິດ, ວັດທະນະທຳ-ສັງຄົມ ແລະ ອື່ນໆ ໃນຕໍ່ໜ້າ. ຍີ່ປຸ່ນຍັງໄດ້ປະກາດຈະຂະຫຍາຍການຮ່ວມມືກັບອາຊຽນ ໂດຍຜ່ານອົງການຮ່ວມມືສາກົນຍີ່ປຸ່ນ (JICA) ເພື່ອແນໃສ່ເພີ່ມທະວີການຊ່ວຍເຫຼືອດ້ານຂີດຄວາມສາມາດຕ່າງໆໃຫ້ຫຼາຍຂຶ້ນ.

          ກອງປະຊຸມລັດຖະມົນຕີຕ່າງປະເທດອາຊຽນ-ສ. ເກົາຫຼີ ໄດ້ຍິນດີຕໍ່ຄວາມຄືບໜ້າຂອງການຮ່ວມມື ລະຫວ່າງອາຊຽນ ແລະ ສ. ເກົາຫຼີ ໃນໄລຍະ 1 ປີຜ່ານມາ ລວມທັງການຈັດຕັ້ງປະຕິບັດປີແລກປ່ຽນວັດທະນະທຳອາຊຽນ-ສ. ເກົາຫຼີ ໃນປີ 2017. ຜູ້ແທນອາຊຽນໄດ້ສະແດງຄວາມຊົມເຊີຍຕໍ່ ສ. ເກົາຫຼີ ທີ່ໄດ້ສ້າງຕັ້ງສູນວັດທະນະທໍາອາຊຽນ ຢູ່ແຂວງປູຊານ, ສ. ເກົາຫຼີ, ໂດຍຈະເປີດສູນຢ່າງເປັນທາງການໃນເດືອນກັນຍາ 2017 ນີ້. ສ່ວນຝ່າຍ ສ. ເກົາຫຼີ ໄດ້ຢ້ຳຄືນຄວາມໝາຍໝັ້ນ ທີ່ຈະໃຫ້ການສະໜັບສະໜູນອາຊຽນ ໃນດ້ານຕ່າງໆເຊັ່ນ: ການຮັດແຄບຄວາມແຕກໂຕນດ້ານການພັດທະນາ, ການພັດທະນາວິສາຫະກິດຂະໜາດນ້ອຍ ແລະ ກາງ, ແລະການເຊື່ອມຈອດ.

          ກອງປະຊຸມລັດຖະມົນຕີຕ່າງປະເທດອາຊຽນ-ອິນເດຍ ໄດ້ມີຄວາມຍິນດີທີ່ເຫັນວ່າປີ 2017 ເປັນປີຄົບຮອບ 25 ປີ ແຫ່ງການພົວພັນອາຊຽນ-ອິນເດຍ, ເຊິ່ງທັງສອງຝ່າຍໄດ້ດຳເນີນການສະເຫຼີມສະຫຼອງໂອກາດສຳຄັນດັ່ງກ່າວ ດ້ວຍການຈັດກິດຈະກຳຕ່າງໆຂຶ້ນ ແລະ ໄດ້ຕົກລົງເຫັນດີຈະຈັດກອງປະຊຸມສຸດຍອດອາຊຽນ-ອິນເດຍ ໃນວັນທີ 25-26 ມັງກອນ 2018 ທີ່ ນິວເດລີ, ອິນເດຍ. ນອກນັ້ນ, ກອງປະຊຸມໄດ້ເຫັນດີຈະສືບຕໍ່ເຮັດວຽກຮ່ວມກັນ ເພື່ອນຳໃຊ້ກອງທຶນສິນເຊື່ອ 1 ຕື້ໂດລາສະຫະລັດຂອງອິນເດຍ ເຂົ້າໃນໂຄງການເຊື່ອມຈອດຕ່າງໆໃນພາກພື້ນ, ລວມທັງການສ້າງເສັ້ນທາງຫຼວງອິນເດຍ-ມຽນມາ-ໄທ ແລະ ຂະຫຍາຍເຂົ້າສູ່ ລາວ, ກຳປູເຈຍ ແລະ ຫວຽດນາມ.

          ກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ ໄດ້ຕີລາຄາສູງຕໍ່ຜົນຂອງກອງປະຊຸມສຸດຍອດ ອາຊຽນ-ອົດສະຕຣາລີ ຄັ້ງທຳອິດ ທີ່ໄດ້ຈັດຂຶ້ນໃນປີ 2016 ຢູ່ ສປປ ລາວ, ເຊິ່ງຖືວ່າເປັນບາດກ້າວໃໝ່ໃນການພົວພັນອາຊຽນ-ອົດສະຕຣາລີ; ແລະ ໄດ້ປຶກສາຫາລືການກະກຽມໃຫ້ແກ່ກອງປະຊຸມສຸດຍອດອາຊຽນ-ອົດສະຕຣາລີ ສະໄໝພິເສດ ທີ່ຈະຈັດຂຶ້ນໃນ ວັນທີ 17-18 ມີນາ 2018 ທີ່ ຊິດນີ, ອົດສະຕຣາລີ.

          ກອງປະຊຸມລັດຖະມົນຕີຕ່າງປະເທດອາຊຽນ-ສະຫະລັດ ໄດ້ຕີລາຄາສູງຕໍ່ການພົວພັນອາຊຽນ-ສະຫະລັດ ຄົບຮອບ 40 ປີໃນປີ 2017, ເຊິ່ງເຫັນວ່າການພົວພັນຮ່ວມມື ລະຫວ່າງສອງຝ່າຍ ມີການຂະຫຍາຍຕົວເປັນກ້າວໆມາ. ອາຊຽນ ໄດ້ສະແດງຄວາມຍິນດີທີ່ເຫັນວ່າ ສະຫະລັດ ພາຍໃຕ້ລັດຖະບານໃໝ່ ຍັງສືບຕໍ່ໃຫ້ຄວາມສຳຄັນຕໍ່ການພົວພັນອາຊຽນ-ສະຫະລັດ ແລະ ຖືອາຊຽນເປັນບູລິມະສິດໃນນະໂຍບາຍຕ່າງປະເທດຂອງຕົນ. ສອງຝ່າຍໄດ້ຢືນຢັນຈະສືບຕໍ່ຮັດແໜ້ນການຮ່ວມມື ໃນຂົງເຂດຕ່າງໆທີ່ມີຜົນປະໂຫຍດຮ່ວມກັນ ເປັນຕົ້ນດ້ານຄວາມໝັ້ນຄົງ, ການຄ້າ, ການສຶກສາ, ການແລກປ່ຽນຊາວໜຸ່ມ ແລະອື່ນໆ.

          ສ່ວນກອງປະຊຸມລັດຖະມົນຕີຕ່າງປະເທດອາຊຽນ-ອີຢູ ໄດ້ຮັບຮອງເອົາເອກະສານສຳຄັນຄື: ຖະແຫຼງການຮ່ວມ ວ່າດ້ວຍການພົວພັນອາຊຽນ-ອີຢູ ຄົບຮອບ 40 ປີ, ແຜນປະຕິບັດງານອາຊຽນ-ອີຢູ ສະບັບໃໝ່ 2018-2022, ແລະ ຖະແຫຼງການຮ່ວມ ອາຊຽນ-ອີຢູ ວ່າດ້ວຍການຈັດຕັ້ງປະຕິບັດຕາມສັນຍາປາຣີ ກ່ຽວກັບການປ່ຽນແປງສະພາບດິນຟ້າອາກາດ.

          ຄະນະຜູ້ແທນລາວ ນຳໂດຍທ່ານລັດຖະມົນຕີ ສະເຫຼີມໄຊ ກົມມະສິດ ຍັງຈະສືບຕໍ່ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ+3, ກອງປະຊຸມເວທີປຶກສາຫາລືພາກພື້ນອາຊຽນ (ARF) ແລະ ກອງປະຊຸມລັດຖະມົນຕີຕ່າງປະເທດ ຂອງກອງປະຊຸມສຸດຍອດອາຊີຕາເວັນອອກ (EAS) ຈົນຮອດວັນທີ 8 ສິງຫາ 2017.