ໃນ​ຕອນຄ່ຳຂອງວັນ​ທີ 12 ສິງຫາ 2017 ທີ່ ໂຮງແຮມ ດອນຈັນ ພາເລສ, ທ່ານ ສະເຫຼີມໄຊ ກົມມະສິດ,ລັດຖະມົນຕີກະຊວງການຕ່າງປະເທດ ໄດ້ໃຫ້ກຽດເປັນເຈົ້າພາບຈັດງານລາຕີສະໂມສອນເນື່ອງໃນໂອກາດສະເຫຼີມສະຫຼອງວັນຄົບຮອບ 50 ປີແຫ່ງການສ້າງຕັ້ງອາຊຽນ ແລະ ວັນຄົບຮອບ 20 ປີ ທີ່ ສປປ ລາວ ເຂົ້າເປັນສະມາຊິກອາຊຽນ.

ໃຫ້ກຽດເຂົ້າຮ່ວມງານໃນຄັ້ງນີ້ມີ ບັນດາລັດຖະມົນຕີຮັບຜິດຊອບ 3 ເສົາຄໍ້າປະຊາຄົມ ອາຊຽນ ຄື: ລັດຖະມົນຕີກະຊວງການຕ່າງປະເທດ (ເສົາຄໍ້າປະຊາຄົມການເມືອງ-ຄວາມໝັ້ນຄົງອາຊຽນ), ລັດຖະມົນຕີກະຊວງອຸດສະຫະກໍາ ແລະ ການຄ້າ (ເສົາຄໍ້າປະຊາຄົມເສດຖະກິດອາຊຽນ) ແລະ ລັດຖະມົນຕີກະຊວງຖະແຫຼງຂ່າວ, ​ວັດທະນະທໍາ ແລະ ທ່ອງທ່ຽວ (ເສົາຄໍ້າປະຊາຄົມວັດທະນະທໍາ-ສັງຄົມອາຊຽນ). ພ້ອມນີ້, ຍັງມີບັນດາລັດຖະມົນຕີກະຊວງຂະແໜງການຕ່າງໆຂອງລາວ, ບັນດາເອກອັກຄະລັດຖະທູດ ຈາກປະເທດສະມາຊິກອາຊຽນ ແລະ ປະເທດຄູ່ເຈລະຈາອາຊຽນ, ນັກ​ການ​ທູດ​ປະ​ເທດ​ຕ່າງ​ໆ, ບັນດາ​ຜູ້ຕາງໜ້າ​ຈາກ​ອົງການ​ຈັດຕັ້ງສາກົນ ປະຈຳ ສປປ ລາວ ແລະ ບັນດາຜູ້ຕາງໜ້າຈຸດປະສານງານອາຊຽນຂອງແຕ່ລະຂະ ແໜງການທີ່ກ່ຽວຂ້ອງຂອງ ສປປ ລາວ ເຂົ້າຮ່ວມ.

ງານລາຕີສະໂມສອນໃນຄັ້ງນີ້ ເປັນໜຶ່ງໃນບັນດາກິດຈະກໍາເພື່ອເປັນການລະນຶກເຖິງວັນທີ່ມີຄວາມໝາຍຄວາມສໍາຄັນ ທາງດ້ານປະຫວັດສາດ ຂອງການສ້າງຕັ້ງອາຊຽນ ໃນປີ 1967 ແລະ ວັນເຂົ້າອາຊຽນຂອງ ສປປ ລາວ ໃນປີ 1997 ທັງເປັນການສະເຫຼີມສະຫຼອງ ຜົນສຳເລັດ ແລະ ການເຕີບໃຫຍ່ຂະຫຍາຍຕົວຂອງອາຊຽນໃນໄລຍະ 50 ປີຜ່ານມາ ກໍຄືການປະກອບສ່ວນຂອງ ສປປ ລາວ ໃນຂະບວນການສ້າງປະຊາຄົມອາຊຽນ ໃນໄລຍະ 2 ທົດສະວັດທີ່ຜ່ານມາ ອັນໄດ້ນໍາຜົນປະໂຫຍດມາສູ່ ສປປ ລາວ ແລະ ອາຊຽນໂດຍລວມ.

ໃນພິທີທີ່ມີຄວາມໝາຍສຳຄັນຄັ້ງນີ້ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ຍັງໄດ້ໃຫ້ກຽດມອບລາງວັນໃຫ້ແກ່ຜູ້ຊະນະເລີດການປະກວດແຕ້ມຮູບພາບພາຍໃຕ້ຫົວຂໍ້ “ອາຊຽນ ຄົບຮອບ 50 ປີ”, ໂດຍຜ່ານການຄັດເລືອກຈາກຮູບພາບທີ່ສົ່ງເຂົ້າປະກວດທັງໝົດ 53 ຮູບ ຊຶ່ງພິຈາລະນາທາງດ້ານເນື້ອໃນ ທີ່ສ່ອງແສງເຖິງຄວາມເປັນປະຊາຄົມອາຊຽນ ທີ່ມີຄວາມກົມກຽວ ແລະ ເປັນປຶກແຜ່ນ, ຄວາມຈະເລີນຮຸ່ງເຮືອງທາງດ້ານເສດຖະກິດ ແລະ ຄວາມຫຼາກຫຼາຍທາງດ້ານວັດທະນະທຳ-ສັງຄົມ ຕະຫຼອດຮອດຜົນສຳເລັດຕ່າງໆຂອງອາຊຽນໃນໄຍລະຜ່ານມາ, ໃນນັ້ນ ຜູ້ຊະນະເລີດອັນດັບທີ 1 ໄດ້ແກ່ ນ. ສິຣິໂສພາ ສິດທິພອນ, ອາຍຸ 17 ປີ, ປັດຈຸບັນ ກຳລັງສຶກສາຢູ່ຊັ້ນມັດທະຍົມສຶກສາປີທີ 7 ທີ່ ໂຮງຮຽນນິລະດາ, ອັນດັບທີ 2 ໄດ້ແກ່ ນ. ຣັດທິດາ ດາຣາວົງ​ ອາຍຸ 18 ປີ, ປັດຈຸບັນ ກຳລັງສຶກສາຢູ່ຊັ້ນມັດທະຍົມສຶກສາປີທີ 7 ທີ່ ໂຮງຮຽນ ຮຸ່ງເຮືອງ ແລະ ອັນດັບທີ 3 ໄດ້ແກ່ ນ. ວາສະໜາ ໄຊສົມເຜົ່າ, ອາຍຸ 17 ປີ ປັດຈຸບັນ ກຳລັງສຶກສາຢູ່ຊັ້ນມັດທະຍົມສຶກສາປີທີ 6 ທີ່ ໂຮງຮຽນມັດທະຍົມສຶກສາ ວຽງຈັນ.

ສຳລັບລາງວັນຊະນະເລີດອັນດັບທີ 1 ແມ່ນໄດ້ຮັບລາງວັນເງິນສົດຈຳນວນ 1,500,000 ກີບ, ອັນດັບທີ 2: 1,300,000 ກີບ ແລະ ອັນດັບທີ 3: 1,000,000 ກີບ.​