ໃນລະຫວ່າງວັນທີ 26 ທັນວາ 2017 - 08 ມັງກອນ 2018, ຄະນະຜູ້ແທນເຊື້ອຊາດລາວ ຈາກປະເທດການາດາ ໄດ້ເດີນທາງມາຢ້ຽມຢາມ ແລະ ແຂ່ງຂັນກິລາມິດຕະພາບຢູ່ ສປປ ລາວ, ຈຸດປະສົງແມ່ນເພື່ອສ້າງຄວາມສາມັກຄີຮັກແພງ ລະຫວ່າງຄົນເຊື້ອຊາດລາວຈາກການາດາ ແລະ ຄົນລາວຢູ່ພາຍໃນປະເທດ, ພ້ອມດຽວກັນ ກໍຍັງນໍາພາລູກຫຼານເຊື້ອຊາດລາວ ແລະ ຜູ້ທີ່ຍັງບໍ່ເຄີຍມີໂອກາດໄດ້ມາຢ້ຽມຢາມບ້ານເກີດເມືອງນອນ ໃຫ້ໄດ້ກັບມາເຫັນການສ້າງສາພັດທະນາປະເທດຊາດ ໃນໄລຍະໃໝ່, ພ້ອມທັງເປັນການສ້າງຄວາມປະທັບໃຈ ແລະ ເພີ່ມທະວີຄວາມຮັກແພງບ້ານເກີດເມືອງນອນຂອງຕົນ, ຊຶ່ງຍາມໃດ ພັກ-ລັດ ກໍມີຄວາມເປັນຫ່ວງເປັນໃຍສະເໝີ ເຖິງວ່າຈະໄປຢູ່ໃສ, ປະເທດໃດ ກໍບໍ່ສາມາດຕັດແຍກອອກຈາກວົງຄະນະຍາດແຫ່ງຊາດລາວເຮົາໄດ້.

ການເຄື່ອນໄຫວຢ້ຽມຢາມຂອງຄະນະຜູ້ແທນດັ່ງກ່າວ ປະກອບມີຫຼາຍກິດຈະກໍາເຊັ່ນ: ການເຂົ້າຢ້ຽມຂໍ່ານັບ ຄະນະນໍາກະຊວງສຶກສາທິການ ແລະ ກິລາ, ຄະນະນໍາສູນກາງແນວລາວສ້າງຊາດ, ຢ້ຽມຊົມສະຖານທີ່ວາງສະແດງທາງປະ ຫວັດສາດຂອງຊາດ ແລະ ສະຖານທີ່ທາງວັດທະນະທຳທີ່ສຳຄັນຂອງລາວ, ພ້ອມນັ້ນ, ຍັງໄດ້ແຂ່ງຂັນກິລາບານເຕະມິດ ຕະພາບກັບທີມບານເຕະຝ່າຍລາວຈຳນວນໜື່ງ. ນອກຈາກນັ້ນ, ຄະນະດັ່ງກ່າວຍັງໄດ້ໄປຢ້ຽມຢາມແຂວງຈຳປາສັກ ແລະ ໄດ້ເຂົ້າຢ້ຽມຂໍ່ານັບຄະນະນໍາຂອງ ແຂວງ, ພ້ອມທັງຢ້ຽມຊົມການພັດທະນາເສດຖະກິດ-ສັງຄົມ ຂອງທ້ອງຖິ່ນ ແລະ ໄດ້ທ່ຽວຊົມສະຖານທີ່ທາງບູຮານຄະດີ ແລະ ທາງທຳມະຊາດຂອງແຂວງດັ່ງກ່າວ ຕື່ມອີກ.

ກ່ອນການເດີນທາງກັບຄືນປະເທດ, ຄະນະຜູ້ແທນດັ່ງກ່າວໄດ້ຮັບຟັງການໃຫ້ກຽດໂອ້ລົມຂອງທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ເຊີ່ງທ່ານລັດຖະມົນຕີໄດ້ຊົມເຊີຍຕໍ່ການເດີນທາງມາເຄື່ອນໄຫວຂອງ ຄະນະຜູ້ແທນເຊື້ອຊາດລາວຈາກການາດາໃນຄັ້ງນີ້, ທີ່ມີຄວາມໝາຍມິດຕະພາບການພົວພັນອັນແໜ້ນແຟ້ນ ແລະ ອົບອຸ່ນ ລະຫວ່າງຄົນເຊື້ອຊາດລາວເຮົາຢູ່ຕ່າງປະເທດ ໂດຍສະເພາະ ຄົນເຊື້ອຊາດລາວຢູ່ການາດາ, ພ້ອມທັງອວຍພອນໃຫ້ຄະນະຜູ້ແທນດັ່ງກ່າວ ເດີນທາງກັບຄືນປະເທດດ້ວຍຄວາມສະຫວັດດີພາບ.