ໃນວັນທີ 21-22 ພຶດສະພາ 2018, ທີ່ ສູນຝຶກອົບຮົມ ແລະ ຮ່ວມມືສາກົນ (ICTC ຫຼັກ 5), ກະຊວງການຕ່າງປະເທດ ໄດ້ຈັດຕັ້ງກອງປະຊຸມທາບທາມເປີດກວ້າງຂັ້ນສູນກາງ ຕໍ່ຮ່າງກົດໝາຍວ່າດ້ວຍສຳນັກງານຜູ້ຕາງໜ້າ ແຫ່ງ ສປປ ລາວ ປະຈຳຢູ່ຕ່າງປະເທດ ໂດຍພາຍໃຕ້ການເປັນປະທານຂອງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ, ຊຶ່ງມີຜູ້ຕາງໜ້າຈາກ ອົງການຈັດຕັ້ງພັກ-ລັດ ແລະ ຂະແໜງການຕ່າງໆ ອ້ອມຂ້າງສູນກາງ ເຂົ້າຮ່ວມຈຳນວນ 150 ກວ່າທ່ານ.

ກອງປະຊຸມຄັ້ງນີ້ ໄດ້ຈັດຂຶ້ນ ເພື່ອທາບທາມ ແລະ ແລກປ່ຽນຄຳຄິດຄຳເຫັນນຳຂະແໜງການຕ່າງໆຂັ້ນສູນກາງ ເພື່ອນຳໄປປັບປຸງ ຮ່າງກົດໝາຍສະບັບນີ້ໃຫ້ມີເນື້ອໃນລະອຽດ, ຈະແຈ້ງ ແລະ ຄວາມສົມບູນກວ່າເກົ່າ ກ່ອນຈະສົ່ງໃຫ້ກະຊວງຍຸຕິທຳ ເອົາຄຳຄິດເຫັນກວດກາດ້ານເຕັກນິກການສ້າງ ແລະ ປະເມີນຄວາມສອດຄ່ອງທາງດ້ານກົດໝາຍ ໃນທ້າຍເດືອນພຶດສະພາ. ຮ່າງກົດໝາຍສະບັບນີ້ ມີແຜນນຳເຂົ້າພິຈາລະນາຢູ່ກອງປະຊຸມລັດຖະບານປະຈຳເດືອນມິຖຸນາ ແລະ ໃນກໍລະນີທີ່ກອງປະຊຸມລັດຖະບານຮັບຮອງເອົາ ກໍ່ຈະສະເໜີໃຫ້ສະພາແຫ່ງຊາດ ພິຈາລະນາຮັບຮອງເອົາໃນທ້າຍປີ 2018.

ໃນໄລຍະທີ່ຜ່ານມາ ສຳນັກງານຜູ້ຕາງໜ້າ ແຫ່ງ ສປປ ລາວ ປະຈຳຢູ່ຕ່າງປະເທດ ກໍ່ໄດ້ເຄື່ອນໄຫວຢ່າງຕັ້ງໜ້າ ແລະ ໄດ້ປະກອບສ່ວນອັນສຳຄັນເຂົ້າໃນການປະຕິບັດແນວທາງນະໂຍບາຍການຕ່າງປະເທດຂອງພັກ-ລັດ ວຽກງານການປົກປ້ອງຜົນປະໂຫຍດ ແລະ ອຳນາດອະທິປະໄຕຂອງຊາດ ກໍ່ຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ແຕ່ສຳນັກງານເຫຼົ່ານັ້ນ ພັດຍັງບໍ່ທັນມີນິຕິກຳທີ່ກຳນົດ ກ່ຽວກັບ ທີ່ຕັ້ງ, ພາລະບົດບາດ, ຂອບເຂດສິດ ແລະ ໜ້າທີ່ຂອງຕົນ ຈຶ່ງເຮັດໃຫ້ການເຄື່ອນໄຫວຍັງບໍ່ທັນມີປະສິດທິພາບ ແລະ ປະສິດທິຜົນສູງເທົ່າທີ່ຄວນ. ສິ່ງສຳຄັນ ຍັງບໍ່ທັນຕອບສະໜອງໄດ້ຢ່າງເຕັມເມັດເຕັມໜ່ວຍ ຕາມຄວາມຮຽກຮ້ອງຕ້ອງການຂອງວຽກງານການຕ່າງປະເທດ ໃນໄລຍະແຫ່ງການເປີດກວ້າງສາຍພົວພັນ ແລະ ການຮ່ວມມືກັບຕ່າງປະເທດ ກໍ່ຄືການເຊື່ອມໂຍງກັບພາກພື້ນ ແລະ ສາກົນ ທີ່ນັບມື້ນັບເປີດກວ້າງ ແລະ ເລິກເຊິ່ງ.

ການສ້າງກົດໝາຍສະບັບດັ່ງກ່າວນີ້ ແມ່ນການປະຕິບັດແຜນການສ້າງ ແລະ ປັບປຸງກົດໝາຍ 5 ປີ ຂອງສະພາແຫ່ງຊາດ ຊຸດທີ VIII (2016-2020) ຕາມມະຕິຮັບຮອງຂອງກອງປະຊຸມສະພາແຫ່ງຊາດ, ເລກທີ 010/ສພຊ, ລົງວັນທີ 27 ເມສາ 2016 ກໍ່ຄືມະຕິຂອງກອງປະຊຸມສະພາແຫ່ງຊາດ ວ່າດ້ວຍ ການຮັບຮອງເອົາແຜນການສ້າງ ແລະ ປັບປຸງກົດໝາຍປະຈຳປີິ 2018, ເລກທີ 078/ສພຊ, ລົງວັນທີ 17 ພະຈິກ 2017. ນອກຈາກນີ້, ກໍຍັງເປັນການຈັດຕັ້ງຜັນຂະຫຍາຍແນວທາງນະໂຍບາຍການຕ່າງປະເທດຂອງພັກ-ລັດ ໃນໄລຍະໃໝ່, ມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມຂອງຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ວ່າດ້ວຍ ຍົກສູງປະສິດທິພາບການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ກໍ່ຄືທິດທາງຂອງການປະຊຸມຄະນະບໍລິຫານງານພັກກະຊວງການຕ່າງປະເທດ ຄັ້ງທີ III ແລະ ຜົນຂອງກອງປະຊຸມວຽກງານການຕ່າງປະເທດ ຄັ້ງທີ 13 ທີ່ພົວພັນກັບການຄຸ້ມຄອງວຽກງານການຕ່າງປະເທດດ້ວຍກົດໝາຍ ພາຍໃຕ້ການນຳພາຂອງພັກ. ກົດໝາຍສະບັບນີ້ ເມື່ອຖືກຮັບຮອງເອົາໂດຍສະພາແຫ່ງຊາດ ກໍ່ຈະເປັນກົດໝາຍສະບັບທີ 2 ຂອງຂະແໜງການຕ່າງປະເທດ ຕໍ່ຈາກກົດໝາຍ ວ່າດ້ວຍສົນທິສັນຍາ ແລະ ສັນຍາສາກົນ ທີ່ໄດ້ຖືກຮັບຮອງເອົາໃນປີ 2017 ທີ່ຜ່ານມາ ແລະ ຈະເປັນບາດກ້າວສຳຄັນໃນການພັດທະນາລະບົບນິຕິກຳຂອງຂະແໜງການຕ່າງປະເທດ ໃຫ້ຄົບຊຸດຍິ່ງໆຂຶ້ນ ແນໃສ່ເພີ່ມທະວີການຄຸ້ມຄອງວຽກງານການຕ່າງປະເທດ ດ້ວຍກົດໝາຍທີ່ມີຄວາມສັກສິດເທື່ອລະກ້າວ.