ໃນວັນທີ 22 ເມສາ 2019, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບອຳລາຂອງ ທ່ານ ນາງ ກາຣິນາ ອິມໂມເນັນ (Kaarina IMMONEN), ຜູ້ປະສານງານອົງການສະຫະປະຊາຊາດ (ສປຊ) ແລະ ຜູ້ຕາງໜ້າອົງການ ສປຊ ເພື່ອການພັດທະນາ (UNDP) ປະຈໍາ ສປປ ລາວ,​ ໃນໂອກາດສິ້ນສຸດການປະຕິບັດໜ້າທີ່ ຢູ່ ສປປ ລາວ.

ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດຖະບານລາວ ສະແດງຄວາມຂອບໃຈ ຕໍ່ຜົນງານ ແລະ ການປະຕິບັດໜ້າທີ່ຂອງ ທ່ານ ນາງ ກາຣີນາ ອິມໂມເນັນ ຕະຫລອດໄລຍະເກືອບ 05 ປີ ທີ່ຜູ້ກ່ຽວໄດ້ປະຕິບັດໜ້າທີ່ ຢູ່ ສປປ ລາວ, ພ້ອມທັງໄດ້ອວຍພອນໃຫ້ ທ່ານ ນາງ ກາຣີນາ ອິມໂມເນັນ ປະສົບຜົນສຳເລັດໃນການປະຕິບັດໜ້າທີ່ວຽກງານໃໝ່ຂອງທ່ານໃນຕໍ່ໜ້າ.

ໃນໂອກາດດັ່ງກ່າວ, ໄດ້ມີພິທີປະດັບຫລຽນກາມິດຕະພາບ ໃຫ້ແກ່ ທ່ານ ນາງ ກາຣິນາ ອິມໂມເນັນ ເພື່ອເປັນການຍ້ອງຍໍຊົມເຊີຍຜົນງານຂອງຜູ້ກ່ຽວ, ຊຶ່ງຕາງໜ້າລັດຖະບານລາວປະດັບຫລຽນກາມິດຕະພາບໃນຄັ້ງນີ້ແມ່ນ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ມີພະນັກງານຂັ້ນສູງຈາກບັນດາກະຊວງຂະແໜງການກ່ຽວຂ້ອງ, ຜູ້ຕາງໜ້າຫ້ອງການຜູ້ປະສານງານ ສປຊ ແລະ ອົງການເຄືອຂ່າຍ ສປຊ ປະຈຳ ສປປ ລາວ ເຂົ້າຮ່ວມ. ໃນໂອກາດນີ້, ທ່ານຮອງລັດຖະມົນຕີ ທອງຜ່ານ ສະຫວັນເພັດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສຳເລັດໃນການປະຕິບັດໜ້າທີ່ວຽກງານໃນໄລຍະຜ່ານມາທີ່ໄດ້ປະກອບສ່ວນເສີມຂະຫຍາຍການພົວພັນຮ່ວມມື ແລະ ການຊ່ວຍເຫລືອ ສປປ ລາວ ໃນດ້ານຕ່າງໆຂອງອົງການ UNDP ເປັນຕົ້ນແມ່ນວຽກງານທາງດ້ານການພັດທະນາ ຢູ່ ສປປ ລາວ. ດັ່ງນັ້ນ, ລັດຖະບານ ແຫ່ງ ສປປ ລາວ ຈຶ່ງໄດ້ຕົກລົງຍ້ອງຍໍປະດັບຫລຽນກາມິດຕະພາບ ເພື່ອເປັນການຈາລຶກຜົນງານການປະກອບສ່ວນໃນການສ້າງສາພັດທະນາ ຢູ່ ສປປ ລາວ ຂອງຜູ້ກ່ຽວ. ພ້ອມດຽວກັນ ທ່ານ ນາງ ກາຣິນາ ອິມໂມເນັນ ກໍໄດ້ສະແດງຄວາມຂອບອົກຂອບໃຈ ຕໍ່ການຮ່ວມມື ແລະ ສະໜັບສະໜູນຂອງລັດຖະບານລາວ ຕະຫລອດໄລຍະການປະຕິບັດໜ້າທີ່ຂອງທ່ານ ໃນໄລຍະເວລາເກືອບ 05 ປີ ທີ່ຜ່ານມາ, ພ້ອມທັງຢືນຢັນຈະສືບຕໍ່ປະກອບສ່ວນຊຸກຍູ້ໃຫ້ມີການຊ່ວຍເຫລືອ ແລະ ສະໜັບສະໜູນຮ່ວມມືຂອງອົງການ UNDP ໃຫ້ແກ່ ສປປ ລາວ ໃນຕໍ່ໜ້າ.

ອົງການ UNDP ປະຈໍາ ສປປ ລາວ ແມ່ນອົງການເຄືອຂ່າຍຂອງອົງການ ສປຊ ຊຶ່ງມີໜ້າທີ່ຊ່ວຍເຫຼືອລັດຖະບານ ໃນວຽກງານເສດຖະກິດ, ການຫຼຸດຜ່ອນຄວາມທຸກຍາກ ແລະ ການພັດທະນາແບບຍືນຍົງ ຢູ່ ສປປ ລາວ. ສຳລັບຜູ້ປະສານງານຂອງອົງການ ສປຊ ປະຈຳ ສປປ ລາວ ແມ່ນມີໜ້າທີ່ປະສານງານ ແລະ ເຮັດວຽກຮ່ວມກັບອົງການເຄືອຂ່າຍ ສປຊ ອື່ນໆ ເພື່ອຮັບປະກັນເຮັດໃຫ້ການຊ່ວຍເຫຼືອຂອງ ສປຊ ໃຫ້ແກ່ ສປປ ລາວ ມີປະສິດທິຜົນສູງສຸດ ແລະ ສາມາດຊ່ວຍເຫຼືອລັດຖະບານ ໃນການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໃຫ້ບັນລຸຜົນເປັນຈິງ.