ໃນວັນທີ 1 ສິງຫາ 2019, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມື ແມ່ນໍ້າຂອງຕອນລຸ່ມ-ສ. ອາເມລິກາ ຄັ້ງທີ 12 ແລະ ຂອບການຮ່ວມມືແມ່ນໍ້າຂອງ-ແມ່ນ້ຳຄົງຄາ ຄັ້ງທີ 10ທີ່ ບາງກອກ, ຣາຊະອານາຈັກໄທ, ຊຶ່ງມີບັນດາລັດຖະມົນຕີ ແລະ ຄະນະຜູ້ແທນ ຈາກປະເທດແມ່ນໍ້າຂອງ (ກໍາປູເຈຍ, ລາວ, ມຽນມາ, ໄທ, ຫວຽດນາມ) ແລະ ບັນດາຄູ່ຮ່ວມພັດທະນາ (ສ. ອາເມລິກາ ແລະ ອິນເດຍ) ລວມທັງກອງເລຂາອາຊຽນ ເຂົ້າຮ່ວມຢ່າງພ້ອມພຽງ.
ກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງຕອນລຸ່ມ-ສ. ອາເມລິກາ ຄັ້ງທີ 12, ເປັນປະທານຮ່ວມ ລະຫວ່າງ ລັດຖະມົນຕີກະຊວງການຕ່າງປະເທດ ແຫ່ງ ຣາຊະອານາຈັກໄທ ແລະ ລັດຖະມົນຕີກະຊວງການຕ່າງປະເທດ ແຫ່ງ ສະຫະລັດ ອາເມລິກາ. ກອງປະຊຸມ ໄດ້ສະແດງຄວາມຍິນດີຕໍ່ໝາກຜົນຂອງການຈັດຕັ້ງປະຕິບັດບັນດາແຜນວຽກ ແລະ ໂຄງການຕ່າງໆ ພາຍໃຕ້ຂອບຮ່ວມມືດັ່ງກ່າວໃນໄລຍະ 10 ປີ ຜ່ານມາ, ຊຶ່ງໃນນັ້ນ ສປປ ລາວ ກໍໄດ້ຮ່ວມກັບ ສ. ອາເມລິກາ ສໍາເລັດການຈັດຕັ້ງປະຕິບັດບັນດາໂຄງການຝຶກອົບຮົມດ້ານເຕັກນິກວິຊາການແບບຕໍ່ເນື່ອງເພື່ອຍົກລະດັບຄວາມອາດສາມາດໃຫ້ແກ່ບຸກຄະລາກອນ ຂອງ ສປປ ລາວ ຊຶ່ງບັນດາໂຄງການທີ່ພົ້ນເດັ່ນລວມມີ: ໂຄງການຝຶກອົບຮົມພາສາອັງກິດສະເພາະດ້ານໃຫ້ແກ່ພະນັກງານລັດຖະກອນ ຢູ່ ສະຖາບັນການຕ່າງປະເທດ ໃນລະ ຫວ່າງປີ 2011-2017, ໂຄງການພື້ນຖານໂຄງລ່າງທີ່ທັນສະໄໝສໍາລັບແມ່ນໍ້າຂອງ (Smart Infrastructure for the Mekong ຫລື SIM) ຢູ່ ກະຊວງພະລັງງານ ແລະ ບໍ່ແຮ່ ຈໍານວນທັງຫມົດ 5 ໂຄງການ ໃນລະຫວ່າງປີ 2014-2017 ລວມມູນຄ່າຫຼາຍກວ່າ 1,75 ລ້ານໂດລາສະຫະລັດ, ໂຄງການເຊື່ອມຈອດແມ່ນໍ້າຂອງໂດຍຜ່ານການສຶກສາ ແລະ ຝຶກອົບຮົມ (Connecting the Mekong through Education and Training ຫລື COMET) ຈໍານວນ 1 ໂຄງການ ສໍາລັບສົກປີ 2016-2017 ຢູ່ ມະຫາວິທະຍາໄລແຫ່ງຊາດ ແລະ ໃນປີ 2017 ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ອົງການການສຶກສາໂລກ(World Education) ໄດ້ຮ່ວມສ້າງຕັ້ງສູນຝຶກອົບຮົມຝີມືແຮງງານສໍາລັບຜູ້ປະກອບການເພດຍິງ (Women’s Entrepreneurial Centre), ຢູ່ ນະຄອນຫຼວງວຽງຈັນ. ນອກຈາກນີ້, ບັນດາລັດຖະມົນຕີ ຍັງໄດ້ປຶກສາຫາລືກັນ ກ່ຽວກັບເອກະສານແນວຄວາມຄິດໃໝ່ທີ່ ສະຫະລັດ ອາເມລິກາ ສະເໜີຂຶ້ນ ຊື່ວ່າ: “ໂຄງການຜົນກະທົບຕໍ່ສາທາລະນະ” ຫລື LMI Public Impact Program ພ້ອມທັງ ແລກປ່ຽນຄວາມຄິດຄວາມເຫັນ ກ່ຽວກັບອານາຄົດຂອງແມ່ນໍ້າຂອງ ໂດຍເນັ້ນໃສ່ຂົງເຂດຈຸດສຸມຂອງການຮ່ວມມືໃນປີຕໍ່ໜ້າ.ກອງປະຊຸມດັ່ງກ່າວຍັງໄດ້ຮັບຮອງເອົາເອກະສານສໍາຄັນ ຈໍານວນ 2 ສະບັບຄື: ຖະແຫຼງການຮ່ວມ ວ່າດ້ວຍການສະເຫຼີມສະຫຼອງຂອບການຮ່ວມມືແມ່ນໍ້າຂອງຕອນລຸ່ມ-ສ. ອາເມລິກາ ຄົບຮອບ 10 ປີ ແລະ ຖະແຫຼງການຮ່ວມ ວ່າດ້ວຍການຮັດແໜ້ນຄວາມຮ່ວມມື ລະຫວ່າງ ເພື່ອນແມ່ນໍ້າຂອງຕອນລຸ່ມ ເພື່ອເປັນທິດທາງໃຫ້ແກ່ການຮ່ວມມືໃນຕໍ່ໜ້າ ແນໃສ່ສົ່ງເສີມການພັດທະນາເສດຖະກິດ-ສັງຄົມ ແລະ ຍົກສູງລະດັບຊີວິດການເປັນຢູ່ຂອງປະຊາຊົນ ໃນອະນຸພາກພື້ນແມ່ນໍ້າຂອງໃຫ້ດີຂຶ້ນເທື່ອລະກ້າວ. ພິເສດ ກ່ອນດຳເນີນກອງປະຊຸມ ບັນດາລັດຖະມົນຕີ ແລະ ຜູ້ເຂົ້າຮ່ວມທັງໝົດ ໄດ້ຮັບຊົມວີດີໂອໝາກຜົນຂອງການຮ່ວມມື ໃນຂອບການຮ່ວມມືແມ່ນ້ຳຂອງ - ສ. ອາເມລິກາ ຄົບຮອບ 10 ປີ ແລະ ຕອນທ້າຍຂອງກອງປະຊຸມ ບັນດາລັດຖະມົນຕີກໍຍັງໄດ້ຮ່ວມພິທີມອບລາງວັນໃຫ້ບັນດາອະດີດນັກສຶກສາທີ່ດີເດັ່ນຂອງLMI (LMI Outstanding Alumni Award Ceremony).
ໃນຕອນບ່າຍຂອງວັນດຽວກັນ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ຍັງໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ຂອບການຮ່ວມມືແມ່ນໍ້າຂອງ-ແມ່ນ້ຳຄົງຄາ ຄັ້ງທີ 10, ຊຶ່ງເປັນປະທ່ານຮ່ວມລະຫວ່າງທ່ານຮອງນາຍົກລັດຖະມົນຕີ, ລັດຖະມົນຕີຕ່າງປະເທດຂອງ ສສ. ຫວຽດນາມ ແລະ ທ່ານລັດຖະມົນຕີກະຊວງການຕ່າງປະເທດ ຂອງ ອິນເດຍ. ກອງປະຊຸມ ໄດ້ທົບທວນຄືນຄວາມຄືບໜ້າຂອງການຈັດຕັ້ງປະຕິບັດວຽກງານຕ່າງໆພາຍໃຕ້ຂອບການຮ່ວມມືດັ່ງກ່າວ ໃນໄລຍະ 1 ປີຜ່ານມາ ໂດຍສະເພາະແມ່ນ ການຈັດຕັ້ງປະຕິບັດວຽກງານບູລິມະສິດຕ່າງໆ ຢູ່ໃນແຜນປະຕິບັດງານຂອບການຮ່ວມມືແມ່ນໍ້າຂອງ-ແມ່ນ້ຳຄົງຄາ2016-2018 ເຊັ່ນ: ວຽກງານດ້ານການທ່ອງທ່ຽວ, ວັດທະນະທຳ, ສຶກສາທິການ, ສາທາລະນະສຸກ, ຄົມມະນາຄົມ-ຂົນສົ່ງ, ຂໍ້ມູນຂ່າວສານແລະເຕັກໂນໂລຊີການສື່ສານ(ICT), ວິສາຫະກິດຂະໜາດນ້ອຍ ແລະ ຂະໜາດກາງແລະກະສິກຳ, ລວມທັງ ຄວາມຄືບໜ້າຂອງການຈັດຕັ້ງປະຕິບັດໂຄງການເຫັນຜົນໄວ (Quick Impact Project - QIP) ແລະ ການປຶກສາຫາລືແລກປ່ຽນຄຳຄິດເຫັນ ກ່ຽວກັບ ການຮ່ວມມືໃນຕໍ່ໜ້າ. ສຳລັບໂຄງການເຫັນຜົນໄວທີ່ ສປປ ລາວ ໄດ້ຮັບມີທັງໝົດ 3 ໂຄງການ ລວມມູນຄ່າ 150,000 ໂດລາສະຫະລັດ ຄື: 1) ໂຄງການຈັດຫາອຸປະກອນຫ້ອງວິໄຈຝຸ່ນທີ່ກົມຄຸ້ມຄອງແລະພັດທະນາທີ່ດິນກະສິກຳ; 2) ໂຄງການສົ່ງເສີມຄອບຄົວຕົວແບບເພຶ່ອລ້ຽງແບ້ເປັນຟາມທີ່ບ້ານແຈ້ງເມືອງໂທລະຄົມແຂວງວຽງຈັນ; ແລະ 3) ໂຄງການຂະຫຍາຍການປູກໝາກແໜ່ງອິນເດຍ (ໝາກແໜ່ງຂຽວ) ໃຫ້ແກ່ຊາວກະສິກອນທີ່ເມືອງປາກຊ່ອງແຂວງຈຳປາສັກ. ປະຈຸບັນກຳລັງຢູ່ໃນຂັ້ນຕອນການຈັດຕັ້ງປະຕິບັດ. ນອກຈາກນີ້, ກອງປະຊຸມຍັງໄດ້ພິຈາລະນາ ແລະ ເຫັນດີຮັບຮອງເອົາ 2 ເອກະສານສໍາຄັນຄື: ຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າຂອງ-ແມ່ນ້ຳຄົງຄາ ຄັ້ງທີ 10 ແລະ ແຜນປະຕິບັດງານຂອບການຮ່ວມມື ແມ່ນໍ້າຂອງ-ແມ່ນ້ຳຄົງຄາ 2018-2022 ສະບັບໃໝ່.