ໃນຕອນເຊົ້າວັນທີ 24 ສິງຫາ 2020, ສປປ ລາວ ໄດ້ເປັນເຈົ້າພາບຈັດກອງປະຊຸມຜູ້ນໍາ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3 ໃນຮູບແບບກອງປະຊຸມທາງໄກ, ໂດຍການເປັນປະທານຮ່ວມຂອງ ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ແລະ ພະນະທ່ານ ຫລີ ເຄີ້ສຽງ, ນາຍົກລັດຖະມົນຕີ ແຫ່ງ ສປຈີນ, ພາຍໃຕ້ຄໍາຂວັນ: “ເພີ່ມທະວີການຮ່ວມມື ເພື່ອຄວາມສົມບູນພູນສຸກຮ່ວມກັນ (Enhancing Partnership for Shared Prosperity).

ກອງປະຊຸມຄັ້ງນີ້ ບັນດາຜູ້ນໍາຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ທັງ 6 ປະເທດລວມມີ: ກຳປູເຈຍ, ສປ ຈີນ, ສປປ ລາວ, ມຽນມາ, ໄທ ແລະ ຫວຽດນາມ ໄດ້ທົບທວນຄືນໝາກຜົນຂອງການຮ່ວມມືໃນໄລຍະ 5 ປີ ຜ່ານມາ ນັບແຕ່ໄດ້ຮັບການສ້າງຂຶ້ນໃນປີ 2015 ຊຶ່ງເຫັນວ່າ ຜ່ານການຈັດຕັ້ງບັນດາແຜນງານ ແລະ ໂຄງການຕ່າງໆພາຍໃຕ້ຖະແຫຼງການຊັນຢາ, ຖະແຫຼງການພະນົມເປັນ ທີ່ໄດ້ຮັບຮອງເອົາຢູ່ໃນ ກອງປະຊຸມຜູ້ນໍາ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 1 ແລະ ຄັ້ງທີ 2 ໄດ້ມີຄວາມຄືບຫນ້າຢ່າງເປັນຮູບປະທຳຫລາຍດ້ານ ເຮັດໃຫ້ຂອບການຮ່ວມມືດັ່ງກ່າວ ໄດ້ເຕີບໃຫຍ່ຂະຫຍາຍສູ່ລວງກ້ວາງ ແລະ ລວງເລິກ ຢ່າງໄວວາ. ພ້ອມດຽວກັນນັ້ນ, ບັນດາຜູ້ນຳ ໄດ້ຕີລາຄາສູງຕໍ່ຫມາກຜົນການຈັດຕັ້ງປະຕິບັດ ແຜນປະຕິບັດງານ 5 ປີ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ (2018-2022) ໃນໄລຍະ 2 ປີກ່ວາຜ່ານມາ ກໍ່ຄືບັນດາໂຄງການຊ່ວຍເຫລືອພາຍໃຕ້ກອງທຶນພິເສດແມ່ນໍ້າຂອງ-ແມ່ນໍ້າລ້າງຊ້າງ ທີ່ໄດ້ຮັບການສະໜັບສະໜູນທຶນຈາກ ສປ ຈີນ ຈໍານວນ 300 ລ້ານໂດລາສະຫະລັດ ຊຶ່ງໄດ້ປະກອບສ່ວນຢ່າງຕັ້ງຫນ້າ ເຂົ້າໃນການພັດທະນາເສດຖະກິດ-ສັງຄົມ ຢູ່ພາກພື້ນແມ່ນໍ້າຂອງ. ໃນນີ້, ຫລາຍໂຄງການທີ່ໄດ້ຈັດຕັ້ງປະຕິບັດຢູ່           ສປປ ລາວ ແມ່ນໄດ້ຮັບຜົນເປັນຢ່າງດີ ເປັນຕົ້ນແມ່ນໃນຂົງເຂດການພັດທະນາພື້ນຖານໂຄງລ່າງ, ພັດທະນາຊົນນະບົດ ແລະ ການລຶບລ້າງຄວາມທຸກຍາກ.

ໃນໂອກາດດຽວກັນນີ້, ບັນດາຜູ້ນຳຍັງໄດ້ແລກປ່ຽນຄຳຄິດຄຳເຫັນ ແລະ ປຶກສາຫາລື ທິດທາງການຮ່ວມມືໃນຕໍ່ຫນ້າຫລາຍບັນຫາ, ຫນຶ່ງໃນນັ້ນແມ່ນ ການເພີ່ມທະວີຮ່ວມມືກັນໃນຕໍ່ຫນ້າ ເພື່ອຕໍ່ສູ້ກັບພະຍາດໂຄວິດ-19 ແລະ ວາງທິດທາງຟື້ນຟູເສດຖະກິດ-ສັງຄົມ ຕໍ່ຫນ້າສະພາບທີ່ພະຍາດຮ້າຍແຮງດັ່ງກ່າວ ຍັງສືບຕໍ່ແຜ່ລະບາດຢູ່ຫລາຍພາກພື້ນ ລວມທັງພາກພື້ນແມ່ນໍ້າຂອງ. ພ້ອມດຽວກັນນີ້, ກໍໄດ້ສະແດງຄວາມຊົມເຊີຍ ຕໍ່ປະເທດສະມາຊິກ ທີ່ໄດ້ດໍາເນີນມາດຕະການສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ໄດ້ຢ່າງທັນການ ແລະ ມີປະສິດທິຜົນ, ພ້ອມທັງສະແດງຄວາມຂອບໃຈ ຕໍ່ ສປ ຈີນ ທີ່ໄດ້ໃຫ້ການຮ່ວມມື ແລະ ການສະໜັບສະໜູນດ້ານອຸປະກອນ ແລະ ວິຊາການໃຫ້ແກ່ບັນດາປະເທດແມ່ນໍ້າຂອງ ລວມທັງ ສປປ ລາວ.

ກອງປະຊຸມຄັ້ງນີ້ ໄດ້ຮັບຮອງເອົາຖະແຫຼງການວຽງຈັນ (Vientiane Declaration) ແລະ ເອກະສານກ່ຽວຂ້ອງຈໍານວນໜຶ່ງ ເພື່ອເປັນບ່ອນອີງສຳຄັນ ໃຫ້ແກ່ການຮ່ວມມື ລະຫວ່າງ ປະເທດແມ່ນໍ້າຂອງ ແລະ ສປ ຈີນ ກໍ່ຄືຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ໃນອານະຄົດ. ໃນຕອນທ້າຍຂອງກອງປະຊຸມ, ບັນດາຜູ້ນຳໄດ້ສະແດງຄວາມຊົມເຊີຍ ຕໍ່ຜົນສຳເລັດຢ່າງຈົບງາມ ໃນການປະຕິບັດຫນ້າທີ່ການເປັນປະທານຮ່ວມຂອງ ສປປ ລາວ (2018-2020) ແລະ ໄດ້ສົ່ງມອບໜ້າທີ່ໃຫ້ ສສ. ມຽນມາ ເພື່ອສືບຕໍ່ເປັນປະທານຮ່ວມ ກັບ ສປ ຈີນ ໃນໄລຍະ 2 ປີ ຂ້າງໜ້າ.