ໃນວັນທີ 28 ຕຸລາ 2021, ພະນະທ່ານ ພັນຄໍາ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ສືບຕໍ່ນໍາພາ ຄະນະເຂົ້າຮ່ວມກອງປະຊຸມສຸດຍອດ ກັບ ບັນດາຄູ່ຮ່ວມເຈລະຈາ ມື້ສຸດທ້າຍ ເຊິ່ງປະກອບມີ: ກອງປະຊຸມສຸດຍອດອາຊຽນ-ອິນເດຍ ຄັ້ງທີ 18 ແລະ ກອງປະຊຸມສຸດຍອດອາຊຽນ-ລັດເຊຍ ຄັ້ງທີ 4 ແບບທາງໄກ.
ກອງປະຊຸມສຸດຍອດອາຊຽນ-ອິນເດຍ ຄັ້ງທີ 18: (ໂດຍການເປັນປະທານຮ່ວມຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ດາຣູຊາລາມ ແລະ ພະນະທ່ານ ນາເຣັນດຣາ ໂມດີ, ນາຍົກລັດຖະມົນຕີ ອິນເດຍ)
ກອງປະຊຸມ ໄດ້ສະແດງຄວາມຍິນດີຕໍ່ຄວາມຄືບໜ້າໃນການຈັດຕັ້ງປະຕິບັດແຜນປະຕິບັດງານ ອາຊຽນ-ອິນເດຍ ໄລຍະປີ2021-2025ແລະ ການຜັນຂະຫຍາຍຜົນຂອງກອງປະຊຸມສຸດຍອດ ອາຊຽນ-ອິນເດຍ ຄັ້ງທີ 17 ແບບທາງໄກ ໃນປີ 2020, ໂດຍສະເພາະ ຄວາມພະຍາຍາມຂອງອາຊຽນ ແລະ ອິນເດຍ ໃນການຮັບມືກັບການແຜ່ລະບາດ ຂອງພະຍາດໂຄວິດ-19 ຢູ່ພາກພື້ນ.
ກອງປະຊຸມຍັງໄດ້ສະແດງຄວມຂອບໃຈ ຕໍ່ການປະກອບສ່ວນອັນສໍາຄັນຂອງ ອິນເດຍເຂົ້າໃນການຮັດແຄບຄວາມແຕກໂຕນ ດ້ານການພັດທະນາພາຍໃນອາຊຽນ, ໂດຍຜ່ານການຈັດຕັ້ງປະຕິບັດບັນດາກິດຈະກໍ າໃນແຜນງານຂໍ້ລິເລີ່ມການເຊື່ອມໂຍງອາຊຽນສະບັບທີ 4 ໄລຍະ 2021-2025. ພ້ອມນີ້, ກອງປະຊຸມ ໄດ້ປຶກສາຫາລື ແລະ ເປັນເອກະພາບກັນ ຕໍ່ທິດທາງແຜນການຮ່ວມມື ອາຊຽນ-ອິນເດຍ ໃນຕໍ່ໜ້າໂດຍສະເພາະ ແມ່ນການແກ້ໄຂການແຜ່ລະບາດ ຂອງພະຍາດໂຄວິດ-19ລວມທັງການແກ້ໄຂຜົນກະທົບທາງດ້ານເສດຖະກິດ ແລະ ການຟື້ນຟູເສດຖະກິດຮອບດ້ານ; ການຫັນໄປສູ່ເສດຖະກິດດີຈີຕອນ; ການຮັດແຄບຄວາມແຕກໂຕນດ້ານການພັດທະນາ ແລະ ການສຶກສາ.
ນອກນັ້ນ, ກອງປະຊຸມຍັງເຫັນວ່າ ອາຊຽນ ແລະ ອິນເດຍ ຄວນສືບຕໍ່ຂະຫຍາຍການຮ່ວມມື ດ້ານການເຊື່ອມຈອດ ດ້ານໂຄງລ່າງພື້ນຖານແນໃສ່ສົ່ງເສີມ ແລະ ອໍານວຍຄວາມສະດວກ ໃຫ້ແກ່ການຄ້າ, ການລົງທຶນ ແລະ ການໄປມາຫາສູ່ ລະຫວ່າງ ປະຊາຊົນ ໃຫ້ນັບມື້ນັບເພີ່ມຂຶ້ນໃນອະນາຄົດ ໂດຍສະເພາະການຈັດຕັ້ງປະຕິບັດແຜນແມ່ບົດ ການເຊື່ອມຈອດອາຊຽນ 2025 ແລະ ເຮັດໃຫ້ໂຄງການກໍ່ສ້າງທາງດ່ວນ 3 ຝ່າຍ: ອິນເດຍ-ມຽນມາ-ໄທ ແລະ ເຊື່ອມຕໍ່ໄປຍັງ ລາວ-ກໍາປູເຈຍ-ຫວຽດນາມ ໃຫ້ສໍາເລັດໂດຍໄວ. ກອງປະຊຸມ ໄດ້ເຫັນດີຮັບຮອງເອົາຖະແຫຼງການຮ່ວມ ອາຊຽນ-ອິນເດຍ ວ່າດ້ວຍການຮ່ວມມື ກ່ຽວກັບເອກະສານແນວຄວາມຄິດຂອງອາຊຽນ ວ່າດ້ວຍ ອິນໂດ-ປາຊີຟິກ ເພື່ອສັນຕິ ພາບ, ສະຖຽນລະພາບ ແລະ ຄວາມສົມບູນພູນສຸກໃນພາກພື້ນ
ກອງປະຊຸມສຸດຍອດ ອາຊຽນ-ລັດເຊຍ ຄັ້ງທີ 4 ເພື່ອສະເຫຼີມສະຫຼອງການເປັນຄູ່ຮ່ວມເຈລະຈາ ຄົບຮອບ 30 ປີ: (ໂດຍການເປັນປະທານຮ່ວມຂອງ ສົມເດັດ ຊຸນຕານ ຮາຈິ ຮັດຊານານ ໂບນເກຍ ແຫ່ງ ບຣູໄນ ດາຣູຊາລາມ ແລະ ພະນະທ່ານ ວະລາດີເມຍ ປູຕິນ, ປະທານາທິບໍດີ ແຫ່ງ ສະຫະພັນ ລັດເຊຍ)
ກອງປະຊຸມ ໄດ້ຕີລາສູງຕໍ່ກັບການຂະຫຍາຍຕົວຂອງການພົວພັນ ແລະ ຮ່ວມມື ລະຫວ່າງ ອາຊຽນ-ລັດເຊຍ ໃນໄລຍະ 30 ປີທີ່ຜ່ານມາ ໂດຍສະເພາະແມ່ນການຈັດຕັ້ງປະຕິດບັດແຜນປະຕິບັດງານ ອາຊຽນ-ລັດເຊຍ ສຳລັບປີ 2016-2020, ເຊິ່ງກວມເອົາ 3 ເສົາຄໍ້າການສ້າງປະຊາຄົມອາຊຽນ: ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ. ນອກນີ້, ອາຊຽນ ແລະ ລັດເຊຍ ເຫັນດີຈະສືບຕໍ່ເພີ່ມທະວີການຮ່ວມມື ໃນບາງຂະແໜງການບູລິມະສິດ ເປັນຕົ້ນ: ຂະແໜງສາທາລະນະສຸກ ໂດຍສະເພາະການຊ່ວຍເຫຼືອຢາວັກຊີນ ໃຫ້ແກ່ອາຊຽນ ກໍຄືການຄົ້ນຄວ້າ ແລະ ຜະລິດຢາວັກຊີນ ຮ່ວມກັບອາຊຽນ.
ກອງປະຊຸມ ຍັງໄດ້ຊຸກຍູ້ໃຫ້ ອາຊຽນ ແລະ ລັດເຊຍ ສືບຕໍ່ຮ່ວມມື ເພື່ອຫຼຸດຜ່ອນຜົນກະທົບ ຂອງພະຍາດໂຄວິດ-19 ຕໍ່ຊີວິດການເປັນຢູ່ຂອງປະຊາຊົນ ກໍຄືການພັດທະນາເສດຖະກິດ, ໂດຍສືບຕໍ່ເສີມຂະຫຍາຍການຮ່ວມມືດ້ານການຄ້າ ແລະ ການລົງທຶນ, ໂດຍຜ່ານການຈັດຕັ້ງປະຕິບັດບົດບັນທຶກຊ່ວຍຈຳ (MoU)ລະຫວ່າງ ອາຊຽນ ແລະ ອົງການຮ່ວມມືຢູເຣເຊຍ ໃຫ້ເປັນຮູບປະທໍາ ແນໃສ່ສົ່ງເສີມ ແລະ ຂະຫຍາຍການຮ່ວມມືດ້ານເສດຖະກິດ ລະຫວ່າງ ບັນດາປະເທດສະມາຊິກອາຊຽນ ແລະ ອົງການຮ່ວມມື ຢູເຣເຊຍ ເພື່ອອໍານວຍຄວາມສະດວກໃຫ້ແກ່ການຄ້າ ແລະ ການລົງທຶນຂອງ 2 ພາກພື້ນ ໃຫ້ນັບມື້ນັບຫຼາຍຂຶ້ນ.
ກອງປະຊຸມ ໄດ້ເຫັນດີຮັບຮອງເອົາແຜນປະຕິບັດງານ ອາຊຽນ-ລັດເຊຍ ສະບັບໃໝ່ ສໍາລັບໄລຍະປີ 2021-2025 ແລະ ກິດຈະກໍາການສະເຫຼີມສະຫຼອງໂອກາດຄົບຮອບ 30 ປີ ແຫ່ງການພົວພັນຮ່ວມມືອາຊຽນ-ລັດເຊຍ ແລະ ໄດ້ຮັບຮອງເອົາຖະແຫຼງການຮ່ວມອາຊຽນ-ລັດເຊຍ ວ່າດ້ວຍການສ້າງພາກພື້ນທີ່ມີຄວາມໝັ້ນຄົງ ແລະ ຍືນຍົງຮ່ວມກັນ ແລະ ຖະແຫຼງການອາຊຽນ-ລັດເຊຍ ວ່າດ້ວຍການຮ່ວມມືກັນໃນການຕ້ານການຄ້າຢາເສບຕິດ. ພ້ອມນີ້, ກອງປະຊຸມຍັງໄດ້ແລກປ່ຽນຄຳຄິດຄຳເຫັນຕໍ່ບາງບັນຫາທີ່ພົ້ນເດັ່ນຢູ່ພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ, ເປັນຕົ້ນ: ຄວາມປອດໄພທາງໄຊເບີ, ການຂະຫຍາຍໂຄງສ້າງພາກພື້ນ, ການຕໍ່ຕ້ານການກໍ່ການຮ້າຍ ແລະ ອື່ນໆ.
ໃນຕອນບ່າຍຂອງວັນດຽວກັນ, ພະນະທ່ານນາຍົກລັດຖະມົນຕີ ໄດ້ນໍາພາຄະນະຜູ້ແທນລາວ ເຂົ້າຮ່ວມພິທີປິດກອງປະຊຸມສຸດຍອດອາຊຽນ ຄັ້ງທີ 38 ແລະ 39 ແລະ ກອງປະຊຸມສຸດຍອດທີ່ກ່ຽວຂ້ອງ ແລະ ພິທີ ມອບ-ຮັບ ການເປັນປະທານອາຊຽນໃຫ້ແກ່ ຣາຊະອານາຈັກ ກຳປູເຈຍ ສໍາລັບປີ 2022, ພາຍໃຕ້ຄໍາຂວັນ: "ອາຊຽນ: ແກ້ໄຂສິ່ງທ້າທາຍຮ່ວມກັນ " (ASEAN ACT: Addressing Challenges Together).
----------------------