ໃນວັນທີ 19 ກໍລະກົດ 2016, ເວລາ 11:00 ໂມງ, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ໄດ້ເດີນທາງໄປ ສະຖານທູດ ຝຣັ່ງ ປະຈຳລາວ ເພື່ອເຊັນປຶ້ມໄຫວ້ອາໄລ ຕໍ່ຜູ້ຖືກເຄາະຮ້າຍຈາກເຫດການກໍ່ການຮ້າຍທີ່ ເມືອງ ນິສ໌, ປະເທດ ຝຣັ່ງ. ຊຶ່ງມີເນື້ອໃນວ່າ:
“ພວກຂ້າພະເຈົ້າ ໄດ້ຮັບຊາບຂ່າວດ້ວຍຄວາມເສົ້າໂສກ ກ່ຽວກັບເຫດການສະຫຍອງຂວັນ ທີ່ເກີດຂຶ້ນ, ຈາກການກະທຳທີ່ໂຫດຮ້າຍປ່າເຖື່ອນ ໂດຍຄົນຮ້າຍໄດ້ຂັບລົດບັນທຸກແລ່ນເຂົ້າຕຳປະຊາຊົນ ທີ່ກຳລັງຢືນຊົມບັ້ງໄຟດອກ ແຄມຫາດຊາຍ Promenade des Anglais ທີ່ເມືອງ ນິສ໌ ໃນໂອກາດສະເຫຼີມສອງວັນຊາດ ວັນທີ 14 ກໍລະກົດ 2016, ຊຶ່ງເຮັດໃຫ້ມີການສູນເສຍຊີວິດຂອງຜູ້ຄົນເປັນຈຳນວນຫຼວງຫຼາຍ. ພວກຂ້າພະເຈົ້າ ຂໍກ່າວປະນາມຢ່າງແຂງແຮງຕໍ່ການກະທຳດັ່ງກ່າວຂອງກຸ່ມກໍ່ການຮ້າຍ.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າ ຂໍສະແດງຄວາມເສົ້າສະຫຼົດໃຈຢ່າງສຸດຊຶ້ງ ມາຍັງລັດຖະບານ ແລະ ປະຊາຊົນ ແຫ່ງ ສາທາລະນະລັດຝຣັ່ງ ກໍຄືຕໍ່ຄອບຄົວຂອງຜູ້ທີ່ໄດ້ຮັບເຄາະຮ້າຍ ຈາກເຫດການກະທຳອັນຮຸນແຮງດັ່ງກ່າວ.
ສປປ ລາວ ຈະສຶບຕໍ່ໃຫ້ການຮ່ວມມືກັບວົງຄະນາຍາດສາກົນໃນການຕໍ່ສູ້ຕ້ານລັດທິກໍ່ການຮ້າຍໃນທຸກຮູບແບບ.”