ໃນຕອນບ່າຍຂອງວັນທີ 9 ເມສາ 2024 ທ່ານ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍ ຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງ ໄດ້ລົງໄປພົບປະເຮັດວຽກຮ່ວມກັບ ທ່ານ ພູທົງ ຄຳມະນີວົງ, ຮອງເຈົ້າແຂວງໆສາລະວັນ ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງແຂວງສາລະວັນ ເພື່ອຮ່ວມກັນ ລົງກວດກາ, ເກັບກໍາຂໍ້ມູນ ແລະ ປະຊຸມປຶກສາຫາລື ກ່ຽວກັບ ຄວາມຄືບໜ້າການກໍ່ສ້າງພື້ນຖານໂຄງລ່າງຂອງດ່ານທ້ອງຖິ່ນປາກຕາພານ, ເມືອງລະຄອນເພັງ, ແຂວງສາລະວັນ ເພື່ອກະກຽມຄວາມພ້ອມໃນການຍົກຂຶ້ນເປັນດ່ານສາກົນ.
ການລົງໄປກວດກາ, ເກັບກໍາຂໍ້ມູນ ແລະ ຕິດຕາມເບິ່ງຄວາມຄືບໜ້າໃນການກໍ່ສ້າງພື້ນຖານໂຄງລ່າງ ໃນຄັ້ງນີ້ ເປັນການປະຕິບັດຕາມກົດໝາຍວ່າດ້ວຍຊາຍແດນແຫ່ງຊາດ; ດໍາລັດວ່າດ້ວຍດ່ານຊາຍແດນ ແລະ ສະໜາມບິນສາກົນ ສະບັບເລກທີ 558/ລບ, ລົງວັນທີ 31 ທັນວາ 2018 ມາດຕາ 25; ແລະ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 1581/ຫສນຍ, ລົງວັນທີ 24 ສິງຫາ 2023 ທີ່ເຫັນດີອະນຸມັດໃຫ້ອົງການປົກຄອງຂອງແຂວງສາລະວັນ ສືບຕໍ່ປັບປຸງໂຄງລ່າງພື້ນຖານ ເພື່ອກະກຽມຍົກລະດັບຂຶ້ນເປັນດ່ານສາກົນ. ຊຶ່ງດ່ານດັ່ງກ່າວ ເປັນດ່ານຊາຍແດນທາງແມ່ນໍ້າຂອງ, ຕັ້ງຢູ່ເຊິ່ງໜ້າກັບຈຸດຜ່ານແດນຖາວອນ (ດ່ານສາກົນ) ປາກແຊງ, ຕໍາບົນພະລານ, ອໍາເພີນາຕານ, ຈັງຫວັດອຸບົນຣາຊະທານີ, ມີເສັ້ນທາງເຊື່ອມຕໍ່ກັບເສັ້ນທາງຫຼວງແຫ່ງຊາດເລກທີ 13 ໃຕ້, ຊຶ່ງເປັນທາງປູຢາງສອງຊັ້ນເລກທີ 2.6901 ຢູ່ຈຸດຕັດກັບສາມແຍກບ້ານຖໍ້າພວງ, ເມືອງລະຄອນເພັງ ລວງຍາວປະມານ 17,5 ກິໂລ ແມັດ. ຜ່ານການລົງສໍາຫຼວດ, ເກັບກໍາຂໍ້ມູນເຫັນວ່າ ເປັນຈຸດຍຸດທະສາດທີ່ມີຄວາມສໍາຄັນໃຫ້ແກ່ການປະກອບສ່ວນອຳ ນວຍຄວາມສະດວກໃນການບໍລິການ, ຂົນສົ່ງສິນຄ້າລະຫວ່າງປະເທດ, ຜູ້ໂດຍສານ, ນັກທ່ອງທ່ຽວ, ການເຂົ້າ-ອອກຂອງປະຊາຊົນ, ປະກອບສ່ວນສ້າງສາຍພົວພັນມິດຕະພາບທີ່ດີກັບປະເທດເພື່ອນບ້ານ, ບັນດາປະເທດໃນພາກພື້ນ ແລະ ສາກົນ. ແນໃສ່ເຮັດໃຫ້ການພັດທະນາເສດຖະກິດ ແລະ ສັງຄົມແຫ່ງຊາດໃຫ້ມີການຂະຫຍາຍຄົວ ແລະ ຍືນຍົງ, ໂດຍສະເພາະຊີວິດການເປັນຢູ່ຂອງປະຊາຊົນແຂວງສາລະວັນ ກໍ່ຄືປະຊາຊົນລາວບັນດາເຜົ່າໃຫ້ມີຄວາມສົມບູນພູນສຸກຂຶ້້ນໄປເລື້ອຍໆ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດໃຫ້ມີຄວາມຮຸ່ງເຮືອງສີລິວິໄລ. ມາເຖິງປະຈຸບັນການກໍ່ສ້າງພື້ນຖານໂຄງລ່າງຂອງດ່ານແມ່ນມີຄວາມພ້ອມສົມຄວນ ແລະ ສຳເລັດໃນຫຼາຍດ້ານ, ໂດຍສະເພາະແຜນຜັງລວມຂອງດ່ານ, ເສັ້ນທາງຄົມມະນາຄົມ, ຕຶກອາຄານຫ້ອງການຂອງເຈົ້າໜ້າທີ່ກວດກາຄົນເຂົ້າ-ອອກເມືອງ, ເຈົ້າໜ້າທີ່ພາສີ, ເຮືອນພັກພະນັກງານ, ບຸກຄະລາກອນ ແລະ ດ້ານອື່ນໆເຫັນວ່າມີຄວາມພ້ອມສົມຄວນ.
ໃນເວລາປະຊຸມປຶກສາຫາລື ທ່ານຮອງລັດຖະມົນຕີກະຊວງການຕ່າງປະເທດ ໄດ້ຮັບຟັງການລາຍງານລະອຽດ ກ່ຽວກັບ ຄວາມຄືບໜ້າຂອງການກໍ່ສ້າງດ່ານຈາກເຈົ້າໜ້າທີ່ຂອງແຂວງສາລະວັນ ພ້ອມທັງຮັບຟັງການປະກອບຄວາມຄິດເຫັນຂອງບັນດາຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງ ແລະ ທ້ອງຖິ່ນ ແລະ ໄດ້ໃຫ້ທິດຊີ້ນຳ ກ່ຽວກັບການກະກຽມຄວາມພ້ອມຍົກລະດັບດ່ານທ້ອງຖິ່ນປາກຕາພານ ຂຶ້ນເປັນດ່ານສາກົນນັ້ນ, ຈົ່ງຮີບຮ້ອນເລັ່ງກໍ່ສ້າງພື້ນຖານໂຄງລ່າງຂອງດ່ານ, ກະກຽມບຸກຄະລາກອນຂອງທຸກຂະແໜງການ, ເຄື່ອງມືອຸປະກອນຮັບໃຊ້ ແລະ ດ້ານອື່ນໆໃຫ້ຄົບເງື່ອນໄຂຕາມມາດຕະຖານທີ່ໄດ້ກຳນົດໄວ້ໃນດຳລັດ ວ່າດ້ວຍ ດ່ານຊາຍແດນ ແລະ ສະໜາມບິນສາກົນ ເພື່ອຈະໄດ້ນຳເອົາຂໍ້ມູນດັ່ງກ່າວສະເໜີຕໍ່ລັດຖະບານພິຈາລະນາ.