ໃນວັນທີ 2-3 ພະຈິກ 2016 ກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ໄດ້ຈັດກອງປະຊຸມທາບທາມເພື່ອລະດົມຄວາມຄິດເຫັນໃສ່ຮ່າງກົດໝາຍວ່າດ້ວຍສົນທິສັນຍາ ແລະ ສັນຍາສາກົນຂຶ້ນທີ່ຫ້ອງວ່າການແຂວງບໍ່ແກ້ວ, ພາຍໃຕ້ການເປັນປະທານຂອງທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ. ເຂົ້າຮ່ວມໃນກອງປະຊຸມໃນຄັ້ງນີ້ມີ ຫ້ອງວ່າການປົກຄອງ, ພະແນກການຕ່າງປະເທດແຂວງ ແລະ ພະແນກ ການຕ່າງໆທີ່ກ່ຽວຂ້ອງ ຈາກ 8 ແຂວງພາກເໜືອ ລວມມີ: ແຂວງ ບໍ່ແກ້ວ, ແຂວງ ໄຊຍະບູລີ, ແຂວງ ຊຽງຂວາງ, ແຂວງ ຜົ້ງສາລີ, ແຂວງ ຫົວພັນ, ແຂວງ ຫຼວງນ້ຳທາ, ແຂວງ ຫຼວງພະບາງ, ແຂວງ ອຸດົມໄຊ.
ທ່ານຮອງລັດຖະມົນຕີກະຊວງການຕ່າງປະເທດ ໄດ້ກ່າວວ່າ ຈຸດປະສົງທີ່ເຮົາຈັດກອງປະຊຸມໃນຄັ້ງນີ້ແມ່ນ ເພື່ອນຳເອົາຮ່າງກົດຫມາຍວ່າດ້ວຍສົນທິສັນຍາ ແລະສັນຍາສາກົນທີ່ພວກຂ້າເຈົ້າໄດ້ຮ່າງສຳເລັດໃນເບື້ອງຕົ້ນມາທາບທາມ, ແລກປ່ຽນຄຳຄິດເຫັນກັບບັນດາທ່ານ ຊຶ່ງເປັນຕົວແທນຂອງອຳນາດການປົກຄອງ 8 ແຂວງພາກເຫນືອ. ພາຍຫລັງການທາບທາມແລະແລກປ່ຽນຄຳຄິດເຫັນຄັ້ງນີ້, ພວກເຮົາກໍຈະລົງໄປທາບທາມ ແລະ ແລກປ່ຽນຄຳຄິດຄຳເຫັນກັບອຳນາດການປົກຄອງບັນດາແຂວງພາກກາງ ແລະ ພາກໃຕ້ຕື່ມອີກ ແລ້ວຈຶ່ງສັງລວມຄຳຄິດຄຳເຫັນເຫຼົ່ານັ້ນ ເພື່ອນຳໄປປັບປຸງຮ່າງກົດໝາຍສະບັບນີ້ໃຫ້ແທດເໝາະກັບຕົວຈິງ, ສົມບູນຍິ່ງຂຶ້ນ ແລະ ສາມາດປະຕິບັດໄດ້.
ຮ່າງກົດໝາຍສະບັບນີ້ ຈະເປັນກົດໝາຍສະບັບທຳອິດຂອງກະຊວງການຕ່າງປະເທດ, ກໍານົດຫຼັກການ, ລະບຽບການ ແລະ ຂັ້ນຕອນກ່ຽວກັບການສ້າງ ແລະ ການຈັດຕັ້ງປະຕິບັດສົນທິສັນຍາທີ່ສ້າງຂຶ້ນໃນນາມລັດ ແລະ ລັດຖະບານ; ສັນຍາສາກົນທີ່ສ້າງຂຶ້ນໃນນາມອົງການລັດຂັ້ນສູນກາງ, ຂະແໜງການ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະ ອົງການປົກຄອງທ້ອງຖິ່ນ ເພື່ອຄຸ້ມຄອງລັດກ່ຽວກັບວຽກງານສົນທິສັນຍາ ແລະ ສັນຍາສາກົນ ໃຫ້ມີຄວາມເປັນເອກະພາບກັນໃນຂອບເຂດທົ່ວປະເທດ ແນໃສ່ປະຕິບັດນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຕ່າງຝ່າຍຕ່າງມີຜົນປະໂຫຍດ, ສົ່ງເສີມຄວາມເປັນເຈົ້າການຂອງ ສປປ ລາວ ໃນການຮ່ວມມືກັບບັນດາປະເທດ ແລະ ເຊື່ອມໂຍງກັບພາກພື້ນ ແລະ ສາກົນ.
ການສ້າງກົດໝາຍວ່າດ້ວຍສົນທິສັນຍາ ແລະ ສັນຍາສາກົນ ກໍ່ຄືນິຕິກຳອື່ນໆໃນຂະແໜງການຕ່າງປະເທດ ເປັນກົດໝາຍທີ່ຈະອອກໂດຍສະພາແຫ່ງຊາດ ປະກອບສ່ວນອັນສຳຄັນເຂົ້າໃນການປະຕິບັດມະຕິ X ຂອງພັກ ໃນການສ້າງຄວາມໝັ້ນຄົງໃຫ້ແກ່ລັດ ປະຊາທິປະໄຕ ປະຊາຊົນ ທີ່ປົກຄອງດ້ວຍກົດໝາຍເທື່ອລະກ້າວ.