ໃນຕອນບ່າຍຂອງວັນທີ 23 ມີນາ 2018, ກົມເສດຖະກິດ, ກະຊວງການຕ່າງປະເທດ, ໃນນາມກອງເລຂາແຫ່ງຊາດແມ່ນໍ້ຂອງ-ແມ່ນໍ້າລ້ານຊ້າງ ຮ່ວມກັບ ສະຖານເອກອັກຄະລັດຖະທູດສາທາລະນະລັດປະຊາຊົນຈີນ ປະຈໍາ ສປປ ລາວ ແລະ ສະຖານທູດປະເທດແມ່ນໍ້າຂອງ ປະຈໍາ ສປປ ລາວ ໄດ້ຈັດກິດຈະກໍາສັບປະດາ ແມ່ນໍ້າຂອງ-ແມ່ນໍ້າລ້ານຊ້າງ ຂຶ້ນ ທີ່ ໂຮງແຮມ ດອນຈັນພາເລດ. ໃຫ້ກຽດກ່າວເປີດໂດຍ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ຫວາງ ເວີນ ທຽນ ເອກອັກຄະລັດຖະທູດແຫ່ງ ສປ ຈີນ ປະຈໍາລາວ. ໂດຍມີຜູ້ຕາງໜ້າຈາກບັນດາສະຖານທູດຂອງປະເທດສະມາຊິກ ແມ່ນໍ້າຂອງ-ແມ່ນໍ້າລ້ານຊ້າງ (ກໍາປູເຈຍ, ຈີນ, ມຽນມາ, ໄທ, ຫວຽດນາມ), ຜູ້ຕາງໜ້າຈາກສະຖານທູດອາຊຽນ ແລະ ຜູ້ຕາງໜ້າຈາກປະເທດຄູ່ຮ່ວມພັດທະນາແມ່ນໍ້າຂອງ (ຍີ່ປຸ່ນ, ສ.ເກົາຫຼີ, ອິນເດຍ, ອາເມລິກາ), ຜູ້ຕາງໜ້າຈາກສະຖານທູດລັດເຊຍ, ອົດສະຕາລີ, ບັນດານັກທຸລະກິດ ແລະ ສະມາຄົມຕ່າງໆຂອງຊາວຈີນ ທີ່ ນະຄອນຫຼວງວຽງຈັນ ແລະ ບັນດາກະຊວງຂະແໜງການກ່ຽວຂ້ອງຂອງລາວ ປະມານ 250 ທ່ານ.
ຈຸດປະສົງ ກໍ່ເພື່ອເປັນການສືບຕໍ່ຈັດຕັ້ງປະຕິບັດຜົນຂອງກອງປະຊຸມຜູ້ນໍາ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2 ແລະ ທັງເປັນການສະເຫຼີມສະຫຼອງວັນສ້າງຕັ້ງຂອບການຮ່ວມມື ແມ່ນໍ້ຂອງ-ແມ່ນໍ້າລ້ານຊ້າງ ຄົບຮອບ 2 ປີ, ເພື່ອເຜີຍແຜ່ຄວາມຮູ້ກ່ຽວກັບ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ໃຫ້ແກ່ບັນດາກະຊວງຂະແໜງການ, ສະຖາບັນຄົ້ນຄວ້າ, ສື່ມວນຊົນ, ແລະ ແຂກຜູ້ເຂົ້າຮ່ວມ ໄດ້ຮັບຮູ້ ແລະ ເຂົ້າໃຈກ່ຽວກັບ ຂອບການຮ່ວມດັ່ງກ່າວນີ້ໃຫ້ກວ້າງຂວາງ ແລະ ເລິກເຊິ່ງຂຶ້ນຕື່ມ. ນອກຈາກນີ້, ຍັງເປັນການເພີ່ມທະວີຮັດແໜ້ນການພົວພັນຮ່ວມມື ແລະ ແລກປ່ຽນວັດທະນະທໍາລະຫວ່າງບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ.
ໃນງານກິດຈະກໍາສັບປະດາ MLC ນີ້ປະກອບດ້ວຍ 4 ກິດຈະກໍາຄື: ພິທີປະຖະກະຖາ ກ່ຽວກັບ ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ, ງານວາງສະແດງຮູບພາບ ກ່ຽວກັບປະຫວັດຄວາມເປັນມາ ແລະ ກິດຈະກໍາການເຄື່ອນໄຫວການຮ່ວມມື ຂອງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ, ງານວາງສະແດງເຄື່ອງຫັດຖະກໍາ ແລະ ງານເທດສະການອາຫານຂອງບັນດາປະເທດສະມາຊິກ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ. ໃນໂອກາດດັ່ງກ່າວ, ນອກຈາກຈະໄດ້ຢ້ຽມຊົມງານວາງສະແດງເຄື່ອງຫັດຖະກໍາ ແລະ ຮູບພາບແລ້ວ ຜູ້ເຂົ້າຮ່ວມຍັງໄດ້ຊິມອາຫານຂອງບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ໂດຍບໍ່ໄດ້ເສຍຄ່າໃດໆ.