ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມປຶກສາຫາລື ອາຊຽນ-ສ. ເກົາຫຼີ ຄັ້ງທີ22, ຊຶ່ງໄດ້ຈັດຂຶ້ນໃນວັນທີ 20-21 ມິຖຸນາ 2018 ທີ່ ເຊອູນ, ສ. ເກົາຫຼີ, ພາຍໃຕ້ການເປັນປະທານຮ່ວມຂອງ ສ. ເກົາຫຼີ ແລະ ກຳປູເຈຍ.
ກອງປະຊຸມ ໄດ້ທົບທວນຄືນການຮ່ວມມື ອາຊຽນ-ສ.ເກົາຫຼີ ໃນໄລຍະປີຜ່ານມາ ພ້ອມທັງປຶກສາຫາລື ກ່ຽວກັບ ທິດທາງຮັດແໜ້ນການຮ່ວມມືໃນຕໍ່ໜ້າ, ໃນນັ້ນ ໄດ້ເຫັນດີສືບຕໍ່ຮັດແໜ້ນການຮ່ວມມືໃນຂົງເຂດຕ່າງໆ ເຊັ່ນ: ການຕ້ານອາຊະຍາກຳຂ້າມຊາດ, ການຄຸ້ມຄອງໄພພິບັດ, ບັນຫາສິ່ງແວດລ້ອມ, ການຄ້າ ແລະ ການລົງທຶນ, ການພັດທະນາວິສາຫະກິດຂະໜາດນ້ອຍ ແລະ ກາງ, ການເຊື່ອມຈອດ, ການຮ່ວມມືດ້ານວັດທະນະທໍາ, ການທ່ອງທ່ຽວ, ແລະ ການໄປມາຫາສູ່ ລະຫວ່າງ ປະຊາຊົນອາຊຽນ ແລະ ສ.ເກົາຫຼີ. ນອກນັ້ນ, ກອງປະຊຸມ ໄດ້ສະແດງຄວາມຍິນດີຕໍ່ຜົນສໍາເລັດຂອງການຈັດຕັ້ງຜັນຂະຫຍາຍປີແລກປ່ຽນວັດທະນະທຳ ອາຊຽນ-ສ. ເກົາຫຼີ ໃນປີ 2017 ຜ່ານມາ ດ້ວຍການຈັດກິດຈະກຳຕ່າງໆ ດ້ານວັດທະນະທຳ, ການແລກປ່ຽນຊາວໜຸ່ມ, ນັກສຶກສາ ແລະ ອື່ນໆ, ລວມທັງການເປີດເຮືອນວັດທະນະທຳອາຊຽນ ໃນວັນທີ 1 ກັນຍາ 2017 ຢູ່ ແຂວງປູຊານ, ສ. ເກົາຫຼີ. ພ້ອມນັ້ນ, ກອງປະຊຸມ ຍັງໄດ້ປຶກສາຫາລື ແລະ ກະກຽມດ້ານຕ່າງໆໃຫ້ແກ່ການຈັດກອງປະຊຸມລັດຖະມົນຕີຕ່າງປະເທດ ອາຊຽນ-ສ.ເກົາຫຼີ ໃນຕົ້ນເດືອນສິງຫາ 2018 ທີ່ ສິງກະໂປ.
ໃນໂອກາດນີ້, ກອງປະຊຸມ ຍັງໄດ້ແລກປ່ຽນຄວາມຄິດເຫັນ ກ່ຽວກັບ ບັນຫາພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ, ລວມທັງສະພາບການຢູ່ແຫຼມເກົາຫຼີ.