ເນື່ອງໃນໂອກາດ ການສະເຫຼີມສະຫຼອງວັນສ້າງຕັ້ງອາເຊັມ ຄົບຮອບ 23 ປີ, ໃນວັນທີ 13 ມີນາ 2019 ທີ່ ຄະນະນິຕິສາດ ແລະ ລັດຖະສາດ, ວິທະຍາເຂດດອນນົກຂຸ້ມ. ກົມເສດຖະກິດ, ກະຊວງການຕ່າງປະເທດ ຮ່ວມກັບ ມະຫາວິທະຍາໄລແຫ່ງຊາດ ໄດ້ຈັດປາຖະກະຖາ ເຜີຍແຜ່ຜົນສຳເລັດ ຂອງ ກອງປະຊຸມສຸດຍອດອາເຊັມ ຄັ້ງທີ 12 ກໍ່ຄືຜົນສໍາເລັດວຽກງານການທູດຫລາຍຝ່າຍຂອງ ສປປ ລາວແລະ ວຽກງານການເຊື່ອມໂຍງເສດຖະກິດ ຂອງ ສປປ ລາວ, ພາຍໃຕ້ການເປັນປະທານຮ່ວມຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ສຈ. ປອ ສົມສີ ຍໍພັນໄຊ, ວ່າການອະທິການບໍດີມະຫາວິທະຍາໄລແຫ່ງຊາດແລະ ທ່ານເອກອັກຄະລັດຖະທູດສະຫະພາບເອີຣົບ ປະຈຳລາວ ໂດຍມີບັນດາພະນັກງານກະຊວງການຕ່າງປະເທດ, ຄູອາຈານ ແລະ ນັກສຶກສາ ມະຫາວິທະຍາໄລແຫ່ງຊາດ ເຂົ້າຮ່ວມຫຼາຍກວ່າ 200 ທ່ານ.

ໃນການຈັດປາຖະກະຖາໃນຄັ້ງນີ້ ຜູ້ເຂົ້າຮ່ວມໄດ້ຮັບຟັງປະຫວັດຄວາມເປັນມາ ຂອງ ວັນສ້າງຕັ້ງອາເຊັມ ຊຶ່ງນັບຕັ້ງແຕ່ບັນດາສະມາຊິກອາເຊັມ ໄດ້ຮັບຮອງເອົາວັນທີ 1 ມີນາ ຂອງທຸກປີ ເປັນວັນສ້າງຕັ້ງອາເຊັມ, ຢູ່ໃນກອງປະຊຸມສຸດຍອດອາເຊັມ ຄັ້ງທີ 11 ທີ່ ມົງໂກລີ ໃນປີ 2016 ເປັນຕົ້ນມາ, ສປປ ລາວ ກໍ່ໄດ້ຈັດກິດຈະກຳສະເຫຼີມສະຫຼອງວັນດັ່ງກ່າວທຸກປີ ເປັນຕົ້ນ ສົ່ງສານອວຍພອນຂອງ ທ່ານ ລັດຖະມົນຕີກະຊວງການຕ່າງປະເທດ ແລະ ກິດຈະກຳອື່ນໆ ເພື່ອໃຫ້ສັງຄົມໄດ້ຮັບຮູ້ເຖິງຄວາມສຳຄັນ ຂອງ ການຮ່ວມມືລະຫວ່າງສອງທະວີບ ໃນການປະກອບສ່ວນໃຫ້ແກ່ສັນຕິພາບ ແລະ ຄວາມຈະເລີນຮຸ່ງເຮືອງ ຂອງພາກພື້ນ ກໍ່ຄືສາກົນ. ພ້ອມດຽວກັນນີ້, ກໍ່ມີການທົບທວນຄືນຜົນສຳເລັດ ຂອງ ອາເຊັມ ໃນໄລຍະກວ່າສອງທົດສະວັດທີ່ຜ່ານມາ ໂດຍຜ່ານ 3 ເສົາຄໍ້າ ທາງດ້ານການເມືອງ, ເສດຖະກິດ-ການເງິນ ແລະ ດ້ານວັດທະນະທຳ-ສັງຄົມ, ໄດ້ຮັບຮູ້ບົດບາດ ແລະ ວິໄສທັດການຮ່ວມມືອາເຊັມ ໂດຍສະເພາະ ດ້ານການເຊື່ອມຈອດໂຄງບົນ ແລະ ໂຄງລ່າງ, ລະບົບກົນໄກເຮັດວຽກ ແລະ ທິດທາງໃນອະນາຄົດຂອງອາເຊັມ ເພື່ອສ້າງຄວາມເຂັ້ມແຂງທາງດ້ານການເມືອງ, ການພັດທະນາເສດຖະກິດ, ສິ່ງແວດລ້ອມ ແບບຍືນຍົງ ແລະ ການມີສ່ວນຮ່ວມຂອງຂະແໜງການກ່ຽວຂ້ອງໃຫ້ເປັນຮູບປະທຳຫລາຍຂຶ້ນ ອັນຈະນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນຂອງສອງທະວີບອາຊີ ແລະ ເອີຣົບ. ໃນການປາຖະກະຖາຄັ້ງນີ້, ທ່ານ ວິລະສັກ ສົມພົງ, ຮັກສາການຫົວໜ້າກົມເສດຖະກິດ ກໍ່ໄດ້ເຜີຍແຜ່ວຽກງານການເຊື່ອມໂຍງເສດຖະກິດ ຂອງ ສປປ ລາວ ເຊິ່ງເປັນວຽກງານໜຶ່ງທີ່ມີຄວາມສຳຄັນ ໃນການຮ່ວມມື ແລະ ເຊື່ອມໂຍງ ເຂົ້າກັບບັນດາປະເທດຕ່າງໆ ໃນພາກພື້ນ ແລະ ສາກົນ ເພື່ອສ້າງສາພັດທະນາເສດຖະກິດ-ສັງຄົມ ຂອງ ສປປ ລາວ.

ສປປ ລາວໄດ້ເຂົ້າເປັນສະມາຊິກອາເຊັມໃນປີ 2004 ຊຶ່ງປະຈຸບັນມີສະມາຊິກທັງໝົດ 53 ຄູ່ຮ່ວມມື. ນັບແຕ່ນັ້ນມາ, ສປປ ລາວ ໄດ້ເຄື່ອນໄຫວ ແລະ ປະກອບສ່ວນເຂົ້າໃນຂອບການຮ່ວມມືອາເຊັມຢ່າງຕັ້ງໜ້າ ໂດຍສະເພາະໄດ້ເປັນພາບຈັດກອງປະຊຸມສຸດຍອດອາເຊັມຄັ້ງທີ 9 ໃນປີ 2012 ຢ່າງມີຜົນສຳເລັດ, ຊຶ່ງເຮັດໃຫ້ບົດບາດ ຂອງ ສປປ ລາວ ໄດ້ສູງເດັ່ນຂຶ້ນໃນເວທີສາກົນ.