ກະຊວງການຕ່າງປະເທດ ໄດ້ຈັດກອງປະຊຸມຄະນະຊີ້ນໍາລະດັບຊາດ ເພື່ອການຈັດຕັ້ງປະຕິບັດແຜນດໍາເນີນງານ ສປຊ ສໍາລັບ ປະເທດດ້ອຍພັດທະນາ ເພື່ອກະກຽມໃຫ້ແກ່ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ໃນວັນທີ 16 ມີນາ 2020, ທີ່ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຮອງປະທານຜູ້ປະຈໍາການຄະນະຊີ້ນໍາລະດັບຊາດ ເຊິ່ງມີຜູ້ເຂົ້າຮ່ວມຈາກບັນດາກະຊວງ ແລະ ຂະແໜງການອ້ອມຂ້າງສູນກາງທີ່ກ່ຽວຂ້ອງ ເຂົ້າຮ່ວມຈໍານວນ 60 ທ່ານ.
ກອງປະຊຸມຄະນະຊີ້ນໍາລະດັບຊາດໃນຄັ້ງນີ້ ມີຈຸດປະສົງເພື່ອເປັນການເພີ່ມທະວີການກະກຽມຄວາມພ້ອມໃນດ້ານຕ່າງໆ ໃຫ້ແກ່ການປະເມີນ ສປປ ລາວ ເພື່ອອອກ ຈາກສະຖານະພາບປະເທດດ້ອຍພັດທະນາ (Least Developed Countries - LDCs) ໂດຍຄະນະກຳມະການນະໂຍບາຍເພື່ອການພັດທະນາ (Committee for Development Policy - CDP) ຂອງອົງການ ສປຊ ໃນປີ 2021, ທັງເປັນການກໍານົດນະໂຍບາຍ ແລະ ປຶກສາຫາລືວິທີທາງໃນການແກ້ໄຂຂໍ້ຄົງຄ້າງ ແລະ ສິ່ງທ້າທາຍຕ່າງໆ ໃນການກ້າວສູ່ໄລຍະຂ້າມຜ່ານ ແລະ ໄລຍະພາຍຫຼັງການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ (LDCs) ເພື່ອແນໃສ່ການເພີ່ມທະວີຄວາມຮັບຮູ້, ຄວາມເຂົ້າໃຈ ແລະ ການປະກອບສ່ວນຢ່າງຫ້າວຫັນ ຂອງບັນດາຂະແໜງການ. ນອກນັ້ນ, ກອງປະຊຸມຍັງໄດ້ປຶກສາຫາລື ແນວທາງໃນການກໍານົດຍຸດທະສາດການຮ່ວມມືກັບອົງການ ສປຊ, ຄູ່ຮ່ວມພັດທະນາ ແລະ ສາກົນ ເພື່ອເຮັດໃຫ້ການຫຼຸດພົ້ນອອກຈາກສະຖານະພາບດ້ອຍພັດທະນາຂອງ ສປປ ລາວ ມີຄວາມຍືນຍົງ ແລະ ຮັບປະກັນບໍ່ໃຫ້ກັບມາຕົກຢູ່ໃນສະຖານະດ້ອຍພັດທະນາອີກ.
ກອງປະຊຸມໄດ້ຮັບຟັງການລາຍງານກ່ຽວກັບ ກົນໄກຂະບວນການທົບທວນການຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາຂອງ ຄະນະ ກໍາມະການ ນະໂຍບາຍ ດ້ານການພັດທະນາ ສປຊ (CDP); ຮັບຟັງຄວາມພ້ອມ ແລະ ການກະກຽມຂອງ ສປປ ລາວ ສໍາລັບຂະບວນການທົບທວນ ຄັ້ງທີ II ກ່ຽວກັບການຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ໃນປີ 2021 ແລະ ການລາຍງານສະພາບລວມດ້ານສະຖິຕິຂອງບັນດາ 3 ເງື່ອນໄຂໃນການປະເມີນເພື່ອຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາຄື ດັດສະນີຍອດລວມລາຍຮັບແຫ່ງຊາດຕໍ່ຫົວຄົນ (Gross National Income - GNI), ດັດສະນີຊັບສິນມະນຸດ (Human Assets Index - HAI) ແລະ ດັດສະນີຄວາມບອບບາງດ້ານເສດຖະກິດ (Economic Vulnerability Index - EVI). ພ້ອມດຽວກັນນັ້ນ, ກອງປະຊຸມກໍ່ຍັງໄດ້ແລກປ່ຽນຄໍາຄິດຄໍາເຫັນ ແລະ ປຶກສາຫາລືກ່ຽວກັບ ບັນດາສິ່ງທ້າທາຍດ້ານນະໂຍບາຍ ແລະ ການຈັດຕັ້ງປະຕິບັດ ທີ່ ສປປ ລາວ ໄດ້ປະເຊີນໃນການກຽມພ້ອມສຳລັບ ການຫຼຸດພົ້ນອອກຈາກສະຖານະພາບດ້ອຍພັດທະນາ ເປັນຕົ້ນແມ່ນການສ້າງຄວາມເຂັ້ມແຂງໃຫ້ແກ່ຂະແໜງກະສິກໍາ, ການສຶກສາ, ສາທາລະນະສຸກ ແລະ ການຄ້າ ເພື່ອການເຕີບໃຫຍ່ຂະຫຍາຍຕົວໃຫ້ມີຄວາມຍືນຍົງ ແລະ ທົ່ວເຖິງ ພາຍຫຼັງຈາກການຫຼຸດພົ້ນ. ກອງປະຊຸມໄດ້ມີການສົນທະນາກ່ຽວກັບ ຜົນປະໂຫຍດ ແລະ ຜົນເສຍ ຂອງການຫຼຸດພົ້ນອອກຈາກ ສະຖານະພາບດ້ອຍພັດທະນາ, ນະໂຍບາຍ ແລະ ຍຸດທະສາດທີ່ຈຳເປັນ ເພື່ອສ້າງຜົນປະໂຫຍດສູງສຸດ, ຄວາມເຂົ້າໃຈຕໍ່ສະພາບແວດລ້ອມພາຍຫຼັງການຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ບັນດາມາດຕະການສະໜັບສະໜູນທີ່ຈຳເປັນ ຈາກທັງພາຍໃນ ແລະ ສາກົນ, ລວມທັງທິດທາງ ແລະ ແຜນການໃນຕໍ່ໜ້າທີ່ບັນດາຂະແໜງການຕ່າງໆທີ່ກ່ຽວຂ້ອງຈະຕ້ອງນໍາໄປຈັດຕັ້ງປະຕິບັດ.
ລັດຖະບານ ສປປ ລາວ ແມ່ນມີຄວາມໝາຍໝັ້ນທີ່ຈະເລັ່ງໃສ່ການແກ້ໄຂຄວາມທຸກຍາກ ແລະ ສ້າງເງື່ອນໄຂໃຫ້ແກ່ການຫລຸດພົ້ນອອກຈາກ ສະຖານະພາບດ້ອຍພັດທະນາ ໃນອະນາ ຄົດ. ໃນປີ 2018 ສປປ ລາວ ແມ່ນສາມາດບັນລຸ 2 ໃນ 3 ເງື່ອນໄຂຂອງການປະເມີນ ສໍາລັບການຫຼຸດພົ້ນອອກຈາກສະຖານະພາບປະເທດດ້ອຍພັດທະນາຄື: ດັດສະນີຊັບສິນມະນຸດ (HAI) ແລະ ດັດສະນີຍອດລວມລາຍຮັບແຫ່ງຊາດຕໍ່ຫົວຄົນ (GNI), ແຕ່ຍັງບໍ່ສາມາດບັນລຸເງື່ອນໄຂ ດັດສະນີຄວາມບອບບາງດ້ານເສດຖະກິດ (EVI) ແລະ ຈະຖືກປະເມີນອີກເປັນຮອບທີ 2 ໃນປີ 2021. ຖ້າຫາກ ສປປ ລາວ ສາມາດຜ່ານການປະເມີນຢ່າງໜ້ອຍ 2 ໃນ 3 ເງື່ອນໄຂອີກຄັ້ງ ກໍ່ຈະກ້າວເຂົ້າສູ່ໄລຍະຂ້າມຜ່ານອີກ 3 ປີ ຈົນເຖິງປີ 2024 ຈຶ່ງຈະສາມາດຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ຢ່າງເປັນທາງການ. ກອງປະຊຸມຂອງຄະນະຊີ້ນໍາລະດັບຊາດໃນຄັ້ງນີ້ ແມ່ນມີຄວາມໝາຍຄວາມສໍາຄັນ ແລະ ທັງເປັນໂອກາດອັນດີໃຫ້ແກ່ຂະແໜງການກ່ຽວຂ້ອງຂອງ ສປປ ລາວ ປຶກສາຫາລືລາຍລະອຽດຄວາມພ້ອມດ້ານຕ່າງໆ ເພື່ອກະກຽມໃຫ້ແກ່ການປະເມີນຮອບທີ 2 ໃນປີ 2021 ນີ້.