ກອງປະຊຸມເຈົ້າໜ້າທີ່ອາວຸໂສອາຊຽນ

ໃນຕອນເຊົ້າຂອງວັນທີ 07 ຕຸລາ 2020, ທີ່ ກະຊວງການຕ່າງປະເທດ, ນະຄອນຫຼວງວຽງຈັນ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີ​ຕ່າງ​ປະ​ເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້​ນຳພາຄະນະ ເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ.

ກອງປະຊຸມ ໄດ້ຕີລາຄາສູງຕໍ່ຄວາມຄືບໜ້າໃນ​ການ​ຈັດ​ຕັ້ງ​ປະ​ຕິ​ບັດ​ກິດ​ຈະ​ກຳບູລິມະສິດການເປັນປະທານອາຊຽນຂອງຫວຽດນາມ ໃນປີ 2020ເປັນຕົ້ນແມ່ນ: 1). ການທົບທວນໄລຍະກາງ ແຜນແມ່ບົດປະຊາຄົມອາຊຽນ 2025 ທັງ 3 ເສົາຄໍ້າ ເພື່ອນຳສະເໜີໃຫ້ກອງປະຊຸມສຸດຍອດອາຊຽນ ຄັ້ງທີ 37 ທີ່ຈະມາເຖິງພິຈາລະນາຮັບຮອງເອົາ; 2). ການຮ່າງວິໄສທັດອາຊຽນ ຫຼັງປີ 2025; 3). ຮ່າງຂອບໜ້າວຽກ (Scoping paper) ການທົບທວນຄືນການຈັດຕັ້ງປະຕິບັດກົດບັດອາຊຽນ; 4). ການນຳໃຊ້ທຸງ ແລະ ເພັງສັນລະເສີນອາຊຽນ (ASEAN Flag and Use of ASEAN Anthem); ແລະ 5). ຜົນການຈັດກອງປະຊຸມສະພາປະສານງານອາຊຽນ     ສະໄໝພິເສດ ວ່າດ້ວຍ ຂອບການພັດທະນາອະນຸພາກພື້ນ ໃນວັນທີ 09 ກັນຍາ 2020 ຜ່ານມາ ແນໃສ່ສົ່ງເສີມບົດບາດ ແລະ ຄວາມເປັນເຈົ້າການຂອງອາຊຽນ ເພື່ອປະກອບສ່ວນເຂົ້າໃນການສ້າງປະຊາຄົມອາຊຽນ ຮອດປີ 2025 ແລະ ຫຼັງ 2025.

ນອກນັ້ນ, ກອງປະຊຸມ ຍັງໄດ້ສະແດງຄວາມຍິນດີຕໍ່ຄວາມຄືບໜ້າໃນການຈັດຕັ້ງປະຕິບັດບັນດາຂໍ້ລິເລີ່ມຂອງອາຊຽນ ໃນການຕອບໂຕ້ກັບພະຍາດໂຄວິດ-19 ເປັນຕົ້ນ 1). ໄດ້ເຫັນດີຕໍ່ຮ່າງພາລະບົດບາດຂອງກອງທຶນອາຊຽນ ເພື່ອຮັບມືກັບການແຜ່ລະບາດຂອງພະຍາດໂຄວິດ-19 ແລະ ຄັງແຮຢາປົວພະຍາດ ແລະ ອຸປະກອນການແພດສຳລັບພາວະສຸກເສີນດ້ານສາທາລະນະສຸກພາກພື້ນອາຊຽນ; 2). ໄດ້ມອບໝາຍໃຫ້ເຈົ້າໜ້າທີ່ອາວຸໂສສາທາລະ ນະສຸກອາຊຽນ ໄປຮ່າງເອກະສານມາດຕະຖານການດໍາເນີນງານອາຊຽນສໍາລັບພາວະສຸກເສີນດ້ານສາທາລະນະສຸກ; ແລະ3). ເຫັນດີທາງດ້ານຫຼັກການຕໍ່ຮ່າງແຜນຟື້ນຟູຮອບດ້ານຂອງອາຊຽນ ສະບັບທຳອິດ ຈາກຜົນກະທົບຂອງພະຍາດໂຄວິດ-19 ແລະສະເໜີໃຫ້ 3 ເສົາຄໍ້າອາຊຽນ ສືບຕໍ່ມີຄຳເຫັນເພີ່ມເຕີມ ເພື່ອນຳສະເໜີຕໍ່ກອງປະຊຸມສະພາປະສານງານອາຊຽນ (ACC)ຄັ້ງທີ 28 ແລະ ກອງປະຊຸມສຸດຍອດອາຊຽນ ຄັ້ງທີ 37 ໃນເດືອນ ພະຈິກ 2020 ເພື່ອພິຈາລະນາຮັບຮອງເອົາ.

ພ້ອມກັນນີ້,ກອງປະຊຸມ ຍັງໄດ້ຮັບຊາບຄວາມຄືບໜ້າການກະກຽມລົງນາມການເຂົ້າເປັນພາຄີຂອງສົນ​​ທິ​ສັນ​ຍາໄມ​ຕີ​ຈິດ ແລະ ການ​ຮ່ວມ​ມື​ຢູ່ອາ​ຊີ​ຕາ​ເວັນ​ອອກ​ສ່ຽງ​ໃຕ້ ຫຼື TAC ຂອງກູບາ, ໂກລົມບີ ແລະ ອາຟລິກາໃຕ້. ສຸດທ້າຍ, ກອງປະຊຸມ ໄດ້ກະກຽມທັງທາງດ້ານເນື້ອໃນ ແລະ ພະລາທິການໃຫ້ແກ່ກອງປະຊຸມສະພາປະຊາຄົມການເມືອງ-ຄວາມໝັ້ນຄົງອາຊຽນ ຄັ້ງທີ 22, ກອງປະຊຸມສະພາປະສານງານອາຊຽນ ຄັ້ງທີ 28 ແລະ ກອງປະຊຸມສຸດຍອດອາຊຽນ ຄັ້ງທີ 37 ແລະ ກອງປະຊຸມສຸດຍອດທີ່ກ່ຽວຂ້ອງອື່ນໆ ທີ່ຈະຈັດຂຶ້ນໃນເດືອນ ພະຈິກ 2020.

ໃນຕອນເຊົ້າຂອງວັນທີ 08 ຕຸລາ 2020, ທ່ານ ທອງຜ່ານ ສະຫວັນເພັດ ພ້ອມດ້ວຍຄະນະ ກໍໄດ້ສືບຕໍ່ເຂົ້າຮ່ວມກອງປະຊຸມປຶກສາຫາລືຮ່ວມ (Joint Consultative Meeting-JCM), ກອງປະຊຸມໜ່ວຍງານວິຊາການສະພາປະສານງານອາຊຽນ ວ່າດ້ວຍ ການສະໝັກເຂົ້າເປັນສະມາຊິກອາຊຽນຂອງຕີມໍແລັດສະເຕ ຄັ້ງທີ 10 ແບບທາງໄກ (10^th Meeting of the ASEAN Coordinating Council Working Group-ACCWG), ເຊິ່ງໃນກອງປະຊຸມປຶກສາຫາລືຮ່ວມ (JCM), ບັນດາເຈົ້າໜ້າທີ່ອາວຸໂສຂອງ 3 ເສົາຄໍ້າປະຊາຄົມອາຊຽນ ໄດ້ສຸມໃສ່ປຶກສາຫາລື ເພື່ອກະກຽມທັງດ້ານເນື້ອໃນ, ພະລາທິການ ແລະ ພິທີການໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 37 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ, ເຊິ່ງຈະມີຂຶ້ນໃນໄລຍະວັນທີ 13-15 ພະຈິກ 2020 ນີ້. ພ້ອມນີ້, ກອງປະຊຸມ ຍັງ​ໄດ້​ຮັບຊາບ​ຄວາມ​ຄືບ​ໜ້າ​ວຽກງານປັບປຸງຂອດການປະສານງານ ແລະ ບັນຫາວຽກງານທັບຊ້ອນລະຫວ່າງບັນດາຂະແໜງການກ່ຽວຂ້ອງຂອງ 3 ເສົາຄໍ້າປະຊາຄົມອາຊຽນ; ຄວາມຄືບໜ້າໃນການຮ່າງແຜນ   ຍຸດທະສາດອາຊຽນ ໃນຍຸກການປະຕິວັດອຸດສາຫະກຳ 4.0 ຫຼື 4.0 IR; ຮັບຊາບຄວາມຄືບໜ້າການຈັດຕັ້ງປະຕິ ບັດໜ້າວຽກເຄືອຂ່າຍຕົວເມືອງອັດສະລິຍະອາຊຽນ ສົກປີ 2020; ແລະ ເຫັນດີເປັນເອກະພາບຕໍ່ບັນດາເອກະສານຜົນກອງປະຊຸມສຸດຍອດອາຊຽນ ຄັ້ງທີ 37 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ.  

ຫຼັງຈາກນັ້ນ, ທ່ານ ທອງຜ່ານ ສະຫວັນເພັດ ພ້ອມດ້ວຍຄະນະ ກໍໄດ້ສືບຕໍ່ເຂົ້າຮ່ວມກອງປະຊຸມໜ່ວຍງານວິຊາການສະພາປະສານງານອາຊຽນ ວ່າດ້ວຍ ການສະໝັກເຂົ້າເປັນສະມາຊິກອາຊຽນຂອງ ຕີມໍແລັດສະເຕ ຄັ້ງທີ 10 ແບບທາງໄກ, ເຊິ່ງໄດ້ຮັບຊາບຜົນສຳເລັດຂອງກອງປະຊຸມ ແບບທາງໄກ ລະຫວ່າງເສົາຄໍ້າປະຊາຄົມວັດທະ   ນະທຳ-ສັງຄົມອາຊຽນ (ASCC) ແລະ ຕີມໍແລັດສະເຕ ທີ່ໄດ້ຈັດຂຶ້ນໃນວັນທີ 8-10 ກັນຍາ 2020 ຜ່ານມາ ໂດຍສະເພາະໄດ້ປຶກສາຫາລືຄວາມພ້ອມຂອງຕີມໍເເລັດສະເຕ ໃນການຈະເຂົ້າຮ່ວມຈັດຕັ້ງປະຕິບັດບັນດາໜ້າວຽກໃນເສົາຄໍ້າປະຊາຄົມວັດທະນະທຳ-ສັງຄົມອາຊຽນ.ກອງປະຊຸມຄັ້ງນີ້, ໄດ້ຢໍ້າຄືນການຈະສືບຕໍ່ເຮັດວຽກຮ່ວມກັນຢ່າງໃກ້ຊິດ ລະຫວ່າງບັນດາຂະແໜງການກ່ຽວຂ້ອງຂອງອາຊຽນ ແລະ ຕີມໍແລັດສະເຕ ເພື່ອເຮັດໃຫ້ສາມາດສໍາເລັດການໄປຢູ່ຢ້ຽມຢາມ ແລະ ພົບປະ-ເຮັດວຽກ ຢູ່ ຕີມໍເເລັດສະເຕ ຂອງທັງ 3 ເສົາຄໍ້າອາຊຽນ ແລະ ຫຼັງຈາກນັ້ນ,    ເຈົ້າໜ້າທີ່ອາວຸໂສອາຊຽນ ຈະສືບຕໍ່ປຶກສາຫາລືກັນ ແລະ ຈະພ້ອມກັນຮ່າງແຜນທິດນໍາ (Roadmap) ໃນການຈະຮັບເອົາ ຕີມໍແລັດສະເຕ ເຂົ້າເປັນສະມາຊິກອາຊຽນຕໍ່ໄປ.