ໃນຕອນບ່າຍຂອງວັນທີ 8 ທັນວາ 2020, ທີ່ ສະຖານທູດຝຣັ່ງ ປະຈໍາ ສປປ ລາວ, ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ເຂົ້າຮ່ວມພິທີເຊັນປຶ້ມໄຫວອາໄລ ຕໍ່ການຈາກໄປຂອງ ພະນະທ່ານ ວານເລຣີ ຊິສກາກ໌ ແດັສແຕ໋ງ, ອະດີດປະທານາທິບໍດີ ແຫ່ງ ສາທາລະນະລັດ ຝຣັ່ງ.
ເນື້ອໃນຂອງປຶ້ມໄຫວ້ອາໄລມີດັ່ງນີ້:
“ ພວກຂ້າພະເຈົ້າ ມີຄວາມຮູ້ສຶກເສົ້າສະຫຼົດໃຈຢ່າງສຸດຊຶ້ງ ເມື່ອໄດ້ຮັບຂ່າວວ່າ ອະດີດປະທານາທິບໍດີ ແຫ່ງ ສາທາລະນະລັດ ຝຣັ່ງ, ພະນະທ່ານ ວານເລຣີ ຊິສກາກ໌ ແດັສແຕ໋ງ, ຜູ້ນຳທີ່ແສນເຄົາລົບຮັກ ຂອງ ປະຊາຊົນຝຣັ່ງ ໄດ້ເຖິງແກ່ມໍລະນະກຳ ໃນວັນທີ 2 ທັນວາ 2020.
ໃນນາມຕາງໜ້າໃຫ້ລັດຖະບານ ແລະ ປະຊາຊົນລາວ, ພວກຂ້າພະເຈົ້າ ຂໍສະແດງຄວາມເສຍດາຍ, ອາໄລອາວອນ ແລະ ຄວາມເສົ້າສະຫຼົດໃຈ ມາຍັງລັດຖະບານ ແລະ ປະຊາຊົນຝຣັ່ງ, ຕະຫຼອດຮອດຄອບຄົວ ແລະ ຍາດພີ່ນ້ອງ ຂອງ ອະດີດປະທານາທິບໍດີ ວານເລຣີ ຊິສກາກ໌ ແດັສແຕ໋ງ, ຕໍ່ການສູນເສຍອັນໃຫຍ່ຫຼວງດັ່ງກ່າວ, ຊຶ່ງທ່ານເປັນຜູ້ໜຶ່ງທີ່ໄດ້ປະກອບສ່ວນອັນສຳຄັນ ເຂົ້າໃນການພັດທະນາປະເທດຝຣັ່ງ ກໍ່ຄື ການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສາທາລະນະລັດຝຣັ່ງ ແລະ ສປປ ລາວ.
ທ່ານ ບຸນເຫຼືອ ພັນດານຸວົງ
ຮອງລັດຖະມົນຕີການຕ່າງປະເທດ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ”