ໃນຕອນບ່າຍຂອງວັນທີ 18 ພຶດສະພາ 2021, ທີ່ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນ ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະ ເຂົ້າຮ່ວມກອງປະຊຸຸມປຶກສາຫາລື ອາຊຽນ-ຈີນ ຄັ້ງທີ 27 ແບບທາງໄກ ພາຍໃຕ້ການເປັນປະທານຮ່ວມ ຂອງ ເຈົ້າໜ້າທີ່ອາວຸໂສອາຊຽນ ຟິລິບປິນ (ປະເທດປະສານງານ) ແລະ ສປ. ຈີນ.ນອກຈາກນີ້, ຍັງມີບັນດາເຈົ້າໜ້າທີ່ອາວຸໂສອາຊຽນອື່ນ, ທ່ານຮອງເລຂາທິການໃຫຍ່ອາຊຽນ ແລະ ວິຊາການທີ່ກ່ຽວຂ້ອງຈໍານວນນຶ່ງ ເຂົ້າຮ່ວມ.

ກອງປະຊຸມຄັ້ງນີ້,ໄດ້ຕີລາສູງຕໍ່ຜົນການຈັດຕັ້ງປະຕິບັດການຮ່ວມມືອາຊຽນ-ຈີນ ໃນໄລຍະຜ່ານມາໂດຍສະເພາະ ການຜັນ ຂະຫຍາຍຜົນຂອງກອງປະຊຸມສຸດຍອດອາຊຽນ-ຈີນຄັ້ງທີ 23 ໃນທ້າຍເດືອນພະຈິກ 2020 ຜ່ານມາ ແລະ ການຈັດຕັ້ງປະຕິບັດແຜນປະຕິບັດງານການຮ່ວມມືອາຊຽນ-ຈີນໄລຍະ 2021-2025, ເຊິ່ງກວມເອົາ ສາມເສົາຄ້ຳ ການສ້າງປະຊາຄົມອາຊຽນ (ການເມືອງ-ຄວາມໝັ້ນຄົງ, ເສດຖະກິດແລະວັດທະນະທຳ-ສັງຄົມ). ສໍາລັບ ທິດທາງໃນຕໍ່ໜ້າ, ກອງປະຊຸມ ເຫັນດີຈະສືບຕໍ່ຮ່ວມມືກັນໃນບາງຂະແໜງການບູລິມະສິດ ຄື: ການສືບຕໍ່ຜັນຂະຫຍາຍແຜນປະຕິບັດງານການຮ່ວມມືໄລຍະ 2021-2025; ການແລກປ່ຽນຂໍ້ມູນຂ່າວສານແລະບົດຮຽນທີ່ດີລວມທັງການຄົ້ນຄວ້າ-ພັດທະນາ (R&D) ຢາວັກແຊັງຕ້ານພະຍາດໂຄວິດ-19 ແລະ ການສະໜອງຢາວັກແຊັງດັ່ງກ່າວ ຜ່ານບ້ວງສອງຝ່າຍ ແລະ ຫຼາຍຝ່າຍ ຫຼື ໂຄແວັກ(COVAX);ການຈັດຕັ້ງປະຕິບັດບັນດາກິດຈະກໍາສະເຫຼີມສະຫຼອງການພົວພັນຮ່ວມມືຄົບຮອບ 30 ປີ ໃນປີ 2021; ການຟື້ນຟູເສດຖະກິດຮອບດ້ານຫຼັງໂຄວິດ-19; ການສືບຕໍ່ຈັດຕັ້ງປະຕິບັດແຜນແມ່ບົດການເຊື່ອມຈອດອາຊຽນ ຮອດປີ 2025(MPAC 2025); ການຈັດຕັ້ງປະຕິບັດແຜນປະຕິບັດງານການເຊື່ອມໂຍງອາຊຽນ ສະບັບທີ 4 (2021-2025);ການຫັນເປັນເສດຖະກິດດີຈີຕອນ ໂດຍຈະສຸມໃສ່ສະໜັບ ສະໜູນຈຸລະວິສາຫະກິດ, ທຸລະກິດຂະໜາດນ້ອຍ ແລະ ຂະໜາດກາງ (MSMEs) ເພື່ອໃຫ້ສາມາດດຳເນີນທຸລະກິດ-ການຄ້າທາງເອເລັກໂຕຼນິກຮ່ວມກັນໄດ້;ການຈັດຕັ້ງປະຕິບັດເຂດການຄ້າເສລີອາຊຽນ-ຈີນແລະ ສັນຍາການຮ່ວມມືເສດຖະກິດຮອບດ້ານລະດັບພາກພື້ນ ຫຼື RCEP;ການສຶກສາ (ການສະໜອງທຶນສຶກສາທັງໄລຍະສັ້ນ ແລະ ໄລຍະຍາວ); ການໄປມາຫາສູ່ລະຫວ່າງປະຊາຊົນກັບປະຊາຊົນ ລວມທັງ ການທ່ອງທ່ຽວ; ແລະການສົ່ງເສີມການຮ່ວມມືອະນຸ ພາກພື້ນໂດຍສະເພາະ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ.ນອກນີ້, ກອງປະຊຸມ ຍັງໄດ້ແລກປ່ຽນຄຳຄິດ ຄຳເຫັນຕໍ່ບາງບັນຫາພົ້ນເດັ່ນຢູ່ພາກພື້ນແລະສາກົນທີ່ມີຄວາມສົນໃຈຮ່ວມກັນເຊັ່ນ: ບັນຫາແຫຼມເກົາຫຼີ, ທະເລຈີນໃຕ້, ເອກະສານແນວຄວາມຄິດ ອາຊຽນ ວ່າດ້ວຍ ອິນໂດ-ປາຊີຟິກແລະອື່ນໆ.

ໃນກອງປະຊຸມຄັ້ງນີ້, ທ່ານຮອງລັດຖະມົນຕີໄດ້ສະແດງຄວາມຂອບໃຈຕໍ່ການຊ່ວຍເຫຼືອອັນລໍ້າຄ່າ ຂອງ ສປ. ຈີນ ໃຫ້ແກ່ ສປປ ລາວ ໃນໄລຍະຜ່ານມາ ໂດຍສະເພາະການຊ່ວຍເຫຼືອທາງດ້ານເຕັກນິກ-ວິຊາການ ແລະ ການສະໜອງທຶນຊ່ວຍເຫຼືອ ເພື່ອຮັບມື ແລະ ແກ້ໄຂ ການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ; ພິເສດ, ແມ່ນການຊ່ວຍເຫຼືອໃນການສະໜອງວັກແຊັງຕ້ານໂຄວິດ-19 ທັງຜ່ານບ້ວງສອງຝ່າຍ ແລະ ຫຼາຍຝ່າຍ. ພ້ອມນີ້, ທ່ານ ຮອງລັດຖະມົນຕີ      ຍັງໄດ້ສະເໜີໃຫ້ກອງປະຊຸມ ພິຈາລະນາ ບາງຂົງເຂດບູລິມະສິດການຮ່ວມມື ອາຊຽນ-ຈີນ ໃນໄລຍະຕໍ່ໜ້າ ເປັນຕົ້ນ: ການເຊື່ອມຈອດອາຊຽນ ດ້ວຍການເຊື່ອມສານແຜນແມ່ບົດການເຊື່ອມຈອດອາຊຽນ 2025 ແລະ ຂໍ້ລິເລີ່ມໜຶ່ງແລວໜຶ່ງ ເສັ້ນທາງ ໂດຍສະເພາະໂຄງການທາງລົດໄຟຄວາມໄວສູງ ລາວ-ຈີນ; ການຮັດແຄບຄວາມແຕກໂຕນດ້ານການພັດທະນາ; ການຫັນເປັນດິຈີຕອນ; ການພັດທະນາຍືນຍົງ; ແລະ ການພັດທະນາຊັບພະຍາກອນມະນຸດ ດ້ວຍການສະໜອງທຶນສຶກສາ ໄລຍະສັ້ນ ແລະ ໄລຍະຍາວ.

ສຸດທ້າຍ, ກອງປະຊຸມຍັງໄດ້ປຶກສາຫາລືການກະກຽມດ້ານເນື້ອໃນແລະພິທີການໃຫ້ແກ່ກອງປະຊຸມ ລັດຖະມົນຕີຕ່າງປະເທດອາຊຽນ-ຈີນ ສະໄໝພິເສດ ແບບເຊິ່ງໜ້າ,ເຊິ່ງຈະຈັດຂຶ້ນໃນວັນທີ 7-8 ມິຖຸນາ 2021 ທີ່ເມືອງຊົງຊິງ, ສປ.ຈີນ; ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ (PMC) ໃນເດືອນສິງຫາ 2021; ແລະ ກອງປະຊຸມສຸດຍອດຜູ້ນໍາອາຊຽນ-ຈີນ ທີ່ ໃນເດືອນ ຕຸລາ 2021.

--------------------------------