ໃນຕອນເຊົ້າ ຂອງ ວັນທີ 27 ພຶດສະພາ 2021, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະເຂົ້າຮ່ວມ ກອງປະຊຸມປຶກສາຫາລື ອາຊຽນ-ຍີ່ປຸ່ນ ຄັ້ງທີ 36 (36th ASEAN-Japan Forum) ແບບທາງໄກ ພາຍໃຕ້ ການເປັນປະທານຮ່ວມ ຂອງ ທ່ານ Nguyen Quoc Dzung, ຮອງລັດຖະມົນຕີຕ່າງປະເທດ, ຫົວໜ້າເຈົ້າໜ້າທີີ່ອາວຸໂສອາຊຽນ ຂອງ ຫວຽດນາມ ແລະ ທ່ານ Takeo Mori, ຮອງລັດຖະມົນຕີຕ່າງປະເທດ, ຫົວໜ້າເຈົ້າໜ້າທີີ່ອາວຸໂສ ຂອງ ຍີ່ປຸ່ນ. ເຂົ້າຮ່ວມໃນກອງປະຊຸມ ຄັ້ງນີ້ ຍັງມີບັນດາເຈົ້າໜ້າທີ່ອາວຸໂສອາຊຽນ, ຮອງເລຂາທິການໃຫ່ຍອາຊຽນ ແລະ ວິຊາການທີ່ກ່ຽວຂ້ອງຈໍານວນໜຶ່ງ.
ກອງປະຊຸມ ໄດ້ຕີລາຄາສູງ ແລະ ຮັບຊາບ ສະພາບການຮ່ວມມື ລະຫວ່າງ ອາຊຽນ ແລະ ຍີ່ປຸ່ນ ໄລຍະຜ່ານມາ ໂດຍສະເພາະຄວາມຄືບໜ້າ ໃນການຈັດຕັ້ງປະຕິບັດ ບັນດາແຜນ ແລະ ໂຄງການ ພາຍໃຕ້ແຜນປະຕິບັດງານ ອາຊຽນ-ຍີ່ປຸ່ນ ເຊີ່ງກວມເອົາ ການຮ່ວມມື ໃນຂົງເຂດທີ່ເປັນບູລິມະສິດເຊັ່ນ: ຄູ່ຮ່ວມມືເພື່ອສັນຕິພາບ ແລະ ຄວາມໝັ້ນຄົງ; ຄູ່ຮ່ວມມືເພື່ອຄວາມສົມບູນພູນສຸກ; ຄູ່ຮ່ວມມືເພື່ອຄຸນນະພາບຊີວິດ; ແລະ ຄູ່ຮ່ວມມືໃຈເຖິງໃຈ.
ໃນໂອກາດນີ້, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ປະກອບຄຳຄິດເຫັນ ກ່ຽວກັບ ບາງບັນຫາສຳຄັນ ທີ່ນອນໃນຂົງເຂດແຜນປະຕິບັດງານ ອາຊຽນ-ຍີ່ປຸ່ນ ເຊັ່ນ: ຄູ່ຮ່ວມມືດ້ານຄຸນນະພາບຊີວິດ ແລະ ຄູ່ຮ່ວມມື ໃຈ-ເຖິງ-ໃຈ (Partners for Quality of Life and Heart-to-Heart Partners) ເຊິ່ງໄດ້ກວມເອົາການຮ່ວມມືໃນຫຼາຍຂົງເຂດທີ່ສຳຄັນເຊັ່ນ: ດ້ານສາທາລະນະສຸກ, ການຮັບມືກັບໄພທຳມະຊາດ, ການຮັດແຄບຄວາມແຕກໂຕນດ້ານການພັດທະນາ, ການພັດທະນາໃນຂົງເຂດອະນຸພາກພື້ນ, ແລະ ການໄປມາຫາສູ່ລະຫວ່າງປະຊາຊົນ ກັບ ປະຊາຊົນ ແລະ ອື່ນໆ.
ພ້ອມນີ້, ກອງປະຊຸມຍັງໄດ້ປຶກສາຫາລືກ່ຽວກັບ ທິດທາງແຜນການຮ່ວມມືໃນຕໍ່ໜ້າ ເປັນຕົ້ນແມ່ນ ການຈັດຕັ້ງປະຕິບັດ ແຜນປະຕິບັດງານການຮ່ວມມື ອາຊຽນ-ຍີ່ປຸ່ນ ກໍ່ຄືການຜັນຂະຫຍາຍຜົນຂອງກອງປະຊຸມສຸດຍອດ ອາຊຽນ-ຍີ່ປຸ່ນ ຄັ້ງທີ 23 ແລະ ຢ້ຳຄືນຄວາມໝາຍໝັ້ນທີ່ຈະສືບຕໍ່ຮ່ວມມືກັນ ໃນການສະກັດກັ້ນ, ເຝົ້າລະວັງ, ຄວບຄຸມ ແລະ ແກ້ໄຂບັນຫາການແຜ່ລະບາດຂອງພະຍາດໂຄວິດ-19 ກໍ່ຄືການຟື້ນຟູ ລະບົບເສດຖະກິດພາຍຫຼັງທີ່ສາມາດຄວບຄຸມການແຜ່ລະບາດຂອງເຊື້ອພະຍາດດັ່ງກ່າວສໍາເລັດ.
ກອງປະຊຸມປຶກສາຫາລື ອາຊຽນ-ຍີ່ປຸ່ນ ຄັ້ງທີ 36 ຍັງຖືເປັນເວທີປືກສາຫາລື ແລະ ແລກປ່ຽນຄຳຄິດເຫັນ ຕໍ່ບັນຫາສະພາບການໃນພາກພື້ນ ແລະ ສາກົນ ທີ່ຕ່າງຝ່າຍມີຄວາມສົນໃຈຮ່ວມກັນ ເພື່ອປະກອບສ່ວນເຂົ້າໃນການຮັກສາສັນຕິພາບ ແລະ ຄວາມໝັ້ນຄົງໃນພາກພື້ນ ກໍ່ຄືໃນໂລກ ໂດຍສະເພາະ: ການຈັດຕັ້ງປະຕິບັດຖະແຫຼງການຜູ້ນຳ ອາຊຽນ-ຍີ່ປຸ່ນ ວ່າດ້ວຍ ອິນໂດ-ປາຊີຟິກ ທີ່ໄດ້ຮັບຮອງເອົາໃນໂອກາດກອງປະຊຸມສຸດຍອດ ອາຊຽນ-ຍີ່ປຸ່ນ ໃນທ້າຍປີຜ່ານມາ ໃຫ້ປະກົດຜົນເປັນຈິງ.