ໃນວັນທີ 7 ກໍລະກົດ 2021, ທີ່ ກະຊວງການຕ່າງປະເທດ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ໄດ້ຮ່ວມປຶກສາຫາລືສອງຝ່າຍທາງໂທລະສັບກັບ ທ່ານ Nigel Adams, ຮອງລັດຖະມົນຕີ, ຜູ້ຊີ້ນໍາວຽກງານຢູ່ໃນຂົງເຂດອາຊີ, ກະຊວງການຕ່າງປະເທດ ອັງກິດ.
ສອງຝ່າຍ ໄດ້ດຳເນີນການປຶກສາຫາລືຮ່ວມກັນ ຢ່າງສ້າງສັນ, ມິດຕະພາບ ແລະ ກົງໄປກົງມາ, ຝ່າຍລາວ ໄດ້ຕີລາຄາສູງຕໍ່ການຮ່ວມມືຊ່ວຍເຫຼືອອັນມີຄ່າຂອງລັດຖະບານ ແລະ ປະຊາຊົນອັງກິດ ໃຫ້ແກ່ ລັດຖະບານ ແລະ ປະຊາຊົນລາວ ໃນໄລຍະຜ່ານມາຈົນເຖິງປັດຈຸບັນ, ທັງໃນຂອບສອງຝ່າຍ ແລະ ຫຼາຍຝ່າຍ ເປັນຕົ້ນແມ່ນວຽກງານການສຶກສາ, ສາທາລະນະສຸກ, ການອະນຸລັກສັດປ່າ ແລະ ສິ່ງແວດລ້ອມ, ດ້ານເສດຖະກິດ ແລະ ການເກັບກູ້ລະເບີດທີ່ຍັງບໍ່ທັນແຕກ ລວມມູນຄ່າຫຼາຍກວ່າ 10 ລ້ານໂດລາສະຫະລັດ ແລະ ການສະໜັບສະໜູນວັກແຊັງປ້ອງກັນໂຄວິດ-19 ຜ່ານໂຄງການ COVAX facility. ຝ່າຍອັງກິດ ໄດ້ສະແດງຄວາມຂອບໃຈຝ່າຍລາວຕໍ່ການຮ່ວມສົນທະນາທາງໂທລະສັບໃນຄັ້ງນີ້, ຊຶ່ງ ທ່ານ Nigel Adamsໄດ້ຕີລາຄາຄືນປະສິດທິພາບ ແລະ ໝາກຜົນຂອງການຊ່ວຍເຫຼືອຂອງອັງກິດ ໃນໄລຍະຜ່ານມາ ໂດຍສະເພາະແມ່ນການຊ່ວຍເຫຼືອເພື່ອຕໍ່ສູ້ກັບການລະບາດຂອງພະຍາດ ໂຄວິດ-19 ຢູ່ໃນ ສປປ ລາວ ຜ່ານໂຄງການຊ່ວຍເຫຼືອ ຂອງ ໂຄງການດັ່ງກ່າວ ລວມທັງການຊ່ວຍເຫຼືອດ້ານວິຊາການການແພດຜ່ານກອງທຶນ Flemming Fund ແລະWelcome Trust. ນອກຈາກນັ້ນ, ຍັງໄດ້ຊີ້ແຈງທັດສະນະ ແລະ ຄວາມຈໍາເປັນ ຂອງ ອັງກິດ ໃນການການທົບທວນຄືນ ນະໂຍບາຍຄວາມໝັ້ນຄົງ, ການປ້ອງກັນຊາດ, ການພັດທະນາ ແລະ ການຕ່າງປະເທດ ໃນໄລຍະໃໝ່ ກໍ່ຄືການອອກຈາກ ອີຢູ ຂອງ ອັງກິດ. ໃນໂອກາດດັ່ງກ່າວ, ທ່ານ ຮອງລັດຖະມົນຕີອັງກິດ ຍັງໄດ້ສະແດງຄວາມຂອບໃຈຕໍ່ລັດຖະບານລາວ ທີ່ໄດ້ໃຫ້ການສະໜັບສະໜູນຂໍ້ສະເໜີຂອງອັງກິດ ເປັນຕົ້ນແມ່ນການສະໝັກເຂົ້າເປັນຄູ່ເຈລະຈາກັບອາຊຽນ, ການສະໜັບສະໜູນໃຫ້ອັງກິດ ເປັນເຈົ້າພາບຈັດກອງປະຊຸມລະຫວ່າງປະເທດສະມາ ຊິກອາຊຽນ ແລະ ກຸ່ມG7, ທີ່ຈະຈັດຂຶ້ນຢູ່ ອັງກິດ ໃນເດືອນ ທັນວາ 2021, ຊຶ່ງເປັນການສະໜັບສະໜູນທີ່ມີຄຸນຄ່າຕໍ່ການຫັນໜ້າສູ່ອາຊີ-ປາຊີຟິກ ຂອງ ອັງກິດ ແລະ ຍຸດທະສາດອິນໂດ-ປາຊີຟິກ ໂດຍສະເພາະໃນພາກພື້ນອາຊຽນ. ທ່ານ ຮອງລັດຖະມົນຕີ Adams ຍັງໄດ້ເຊື້ອເຊີນ ທ່ານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ເດີນທາງໄປຢ້ຽມຢາມທາງການ ແລະ ເຊີນຄະນະຜູ້ແທນລາວເຂົ້າຮ່ວມກອງປະຊຸມສຸດຍອດວ່າດ້ວຍການປ່ຽນແປງດິນຟ້າອາກາດ (COP-26)ທີ່ ຈະຈັດຂຶ້ນຢູ່ ອັງກິດ ໃນເດືອນ ພະຈິກ 2021.
ໃນຕອນທ້າຍທັງສອງຝ່າຍໄດ້ແລກປ່ຽນຄໍາຄິດຄໍາເຫັນເຊິ່ງກັນ ແລະ ກັນ ຢ່າງກົງໄປກົງມາກ່ຽວກັບ ທິດທາງການເສີມຂະຫຍາຍການພົວພັນຮ່ວມມືທີ່ມີມູນເຊື້ອອັນດີ ລະຫວ່າງ ສອງປະເທດໃຫ້ເຂັ້ມແຂງ ແລະ ແຕກດອກອອກຜົນຍິ່ງໆຂຶ້ນໃນຕໍ່ໜ້າ.