ໃນຕອນເຊົ້າ ຂອງ ວັນທີ 21 ກໍລະກົດ 2021, ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນຳພາຄະນະ ເຂົ້າຮ່ວມ ກອງປະຊຸມໂຕະມົນລະດັບສູງ ອາຊຽນ-ຍີ່ປຸ່ນ (ASEAN-Japan High Level Roundtable) ເພື່ອປຶກສາຫາລື ກ່ຽວກັບການກະກຽມໃຫ້ແກ່ການສະເຫຼີມສະຫຼອງ ການພົວພັນ ອາຊຽນ-ຍີ່ປຸ່ນ ຄົບຮອບ 50 ປີ ໃນປີ 2023. ກອງປະຊຸມຄັ້ງນີ້, ໄດ້ຮັບກຽດ ກ່າວເປີດໂດຍ ພະນະທ່ານ Bui Thanh Son, ລັດຖະມົນຕີຕ່າງປະເທດ ຂອງຫວຽດນາມ ແລະ ພະນະທ່ານ Washio Eiichiro, ຮອງລັດຖະມົນຕີຕ່າງປະເທດ ຂອງຍີ່ປຸ່ນ, ເຊິ່ງຈັດຂຶ້ນໃນຮູບແບບປະສົມປະສານ (ແບບເຊິ່ງໜ້າ ແລະ ແບບທາງໄກ). ເຂົ້າຮ່ວມໃນກອງປະຊຸມຄັ້ງນີ້ ຍັງມີບັນດາເຈົ້າໜ້າທີ່ອາວຸໂສອາຊຽນ, ຮອງເລຂາທິການໃຫ່ຍອາຊຽນ, ເອກອັກຄະລັດຖະທູດ, ຫົວໜ້າກົມ, ຊ່ຽວຊານ ແລະ ວິຊາການທີ່ກ່ຽວຂ້ອງຈໍານວນໜຶ່ງ.

ກອງປະຊຸມ ໄດ້ຕີລາຄາສູງ ການພົວພັນຮ່ວມມື ອາຊຽນ-ຍີ່ປຸ່ນ ຕະຫຼອດໄລຍະເກືອບ 5 ທົດສະຫວັດຜ່ານມາເຊິ່ງກວມເອົາ ການຮ່ວມມື ໃນຂົງເຂດທີ່ເປັນບູລິມະສິດຄື: ຄູ່ຮ່ວມມືເພື່ອສັນຕິພາບ ແລະ ຄວາມໝັ້ນຄົງ; ຄູ່ຮ່ວມມືເພື່ອຄວາມສົມບູນພູນສຸກ; ຄູ່ຮ່ວມມືເພື່ອຄຸນນະພາບຊີວິດ; ແລະ ຄູ່ຮ່ວມມືໃຈເຖິງໃຈ. ຄຽງຄູ່ກັນນີ້, ກອງປະຊຸມຍັງໄດ້ປຶກສາຫາລື ກ່ຽວກັບທິດທາງແຜນການຮ່ວມມືໃນຕໍ່ໜ້າ ໂດຍສະເພາະ ການກະກຽມສະເຫຼີມສະຫຼອງ ການພົວພັນຮ່ວມມື ຄູ່ຮ່ວມມື ອາຊຽນ-ຍີ່ປຸ່ນ ຄົບຮອບ 50 ປີ ໃນປີ 2023, ລວມທັງການຈັດຕັ້ງປະຕິບັດ ແຜນປະຕິບັດງານການຮ່ວມມື ອາຊຽນ-ຍີ່ປຸ່ນ ສະບັບປັບປຸງ ໃນປີ 2017 ໃນທ່າມກາງສະພາບການແຜ່ລະບາດຂອງພະຍາດ ໂຄວິດ-19.

ໃນໂອກາດນີ້, ທ່ານ ຮອງລັດຖະມົນຕີ ທອງຜ່ານ ສະຫວັນເພັດ ໄດ້ປະກອບຄຳເຫັນຕໍ່ວາລະກ່ຽວກັບ ການຮ່ວມມືເພື່ອສະໜັບສະໜູນ ຄວາມພະຍາຍາມໃນການຮັດແຄບຄວາມແຕກໂຕນ ດ້ານການພັດທະນາ ແລະ ການພັດທະນາແບບຍືນຍົງ, ໂດຍໄດ້ເນັ້ນຢ້ຳຄວາມສຳຄັນຂອງການຮ່ວມມື ພາຍໃຕ້ ຂໍ້ລິເລິ່ມເພື່ອການເຊື່ອມໂຍງອາຊຽນ, ການເຊື່ອມຈອດ ແລະ ການຈັດຕັ້ງປະຕິບັດເປົ້າໝາຍເພື່ອການພັດທະນາແບບຍືນຍົງ ຂອງ ສປຊ.

ກອງປະຊຸມຍັງໄດ້ຊົມເຊີຍ ຍີ່ປຸ່ນ ທີ່ໄດ້ ສະໜັບສະໜູນ ແລະ ຮ່ວມມືຢ່າງໃກ້ສິດ ຕະຫຼອດໄລຍະຜ່ານມາ, ແລະ ໃນຕໍ່ໜ້າ ອາຊຽນ ແລະ ຍີ່ປຸ່ນ ໄດ້ເຫັນດີເພີ່ມທະວີ ການຮ່ວມມື ລະຫວ່າງ ອາຊຽນ-ຍີ່ປຸ່ນ ໃນຂົງເຂດຕ່າງໆ ທີ່ມີຄວາມສົນໃຈ ແລະ ມີທ່າແຮງຮ່ວມກັນເຊັ່ນ: ດ້ານສາທາລະນະສຸກ; ການຮ່ວມມືດ້ານການຄ້າ ແລະ ການລົງທຶນ; ການສົ່ງເສີມ ແລະ ພັດທະນາຜູ້ປະກອບການ ຂະໜາດນ້ອຍ ແລະ ຂະໜາດກາງ; ການເຊື່ອມຈອດພາກພື້ນ; ການພັດທະນາແບບຍືນຍົງ, ການຮັດແຄບຄວາມແຕກໂຕນ ແລະ ການຮ່ວມມືໃນອະນຸພາກພື້ນ; ການຮັບມືກັບໄພພິບັດ ການຮັບມືກັບການປ່ຽນແປງຂອງ ສະພາບອາກາດ ແລະ ສິ່ງແວດລ້ອມ; ການແລກປ່ຽນລະ​ຫວ່າງປະ​ຊາ​ຊົນ ແລະ ປະຊາຊົນ; ແລະ ການພັດທະນາຊັບພະຍາກອນມະນຸດ ເປັນຕົ້ນ.

********************************