ໃນ​ຕອນ​ເຊົ້າ​ຂອງ​ວັນ​ທີ 10 ມີນາ 2022 ທີ່ ກະຊວງ​ການ​ຕ່າງປະ​ເທດ,​ ທ່ານ ໂພໄຊ ໄຂຄໍາພິທູນ, ​ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ ​ໄດ້​ຕ້ອນຮັບ​ການເຂົ້າພົບປະ ​ແລະ ຍື່ນ​ຈົດໝາຍ​ແຕ່ງ​ຕັ້ງ​ຂອງ​ ທ່ານ ດຣ. ຫຍິງຣູ ຈາຄວາລິນ ໂລ (Dr. Ying-Ru Jacqueline LO), ຜູ້ຕາງໜ້າ ອົງການອະນາໄມໂລກ ຄົນໃໝ່ ປະຈຳ ສປປ ລາວ.​

          ​ໃນ​ໂອກາດ​ດັ່ງກ່າວ, ທ່ານ ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ​ ​ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ​ອັນ​ອົບ​ອຸ່ນ​ມາ​ຍັງ​ຜູ້ຕາງໜ້າ​ຂອງ​ ອົງການ WHO ຄົນ​ໃໝ່ ປະຈຳ ສປປ ລາວ ພ້ອມ​ທັງ​ສະ​ແດງ​ຄວາມ​ຂອບ​ໃຈ ​ແລະ ຕີ​ລາຄາ​ສູງ​ຕໍ່​ການ​ຮ່ວມ​ມື​ທີ່​ດີ ​ແລະ ການ​ຊ່ວຍ​ເຫຼືອ​ຂອງ ​ອົງການ WHO ຕໍ່ ສປປ ລາວ ​ໃນ​ໄລຍະ​ທີ່​ຜ່ານ​ມາ.​ ໃນນັ້ນ, ທ່ານ ໂພໄຊ ໄຂຄໍາພິທູນ ​ຍັງ​ໄດ້ສະແດງຄວາມເຊື່ອໝັັ້ນວ່າ ພາຍ​ໃຕ້​ການ​ນຳພາ​ຂອງ​ຜູ້ຕາງໜ້າ​ຄົນ​ໃໝ່, ອົງການ WHO ຈະ​ເພີ່ມ​ທະວີ​ການ​ຮ່ວມ​ມື ​ແລະ ​ສືບຕໍ່​ໃຫ້ການສະໜັບສະໜູນ​ແກ່ ສປປ ລາວ ໃນການພັດທະນາວຽກງານສາທາລະນະສຸກ ແລະ ວຽກທີ່ກ່ຽວຂ້ອງໂດຍສະເພາະ ​ໃນ​ການຮັບມື ແລະ ຕອບໂຕ້ກັບການແຜ່ລະບາດຂອງພະຍາດໂຄວິດ-19 ແລະ ສືບຕໍ່ຂົນຂວາຍການຊ່ວຍເຫຼືອວັກຊີນປ້ອງກັນໂດຍຜ່ານໂຄງການ COVAX, ການປະກອບສ່ວນຈັດ​ຕັ້ງ​ປະຕິບັດ​​ແຜນ​ຍຸດທະສາດການຮ່ວມມືລະຫວ່າງ ສປປ ລາວ ແລະ ອົງການ WHO ສົກປີ 2022-2026, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ IX, ເພື່ອປະກອບສ່ວນໃນການຫລຸດພົ້ນຈາກສະຖານະພາບປະເທດດ້ອຍພັດທະນາ ແລະ ການປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ. ທ່ານຮອງລັດຖະມົນຕີ ໄດ້ແຈ້ງໃຫ້ຜູ້ຕາງໜ້າຄົນໃໝ່ຊາບວ່າ ໃນປັດຈຸບັນ ສປປ ລາວ ແມ່ນມີຄວາມຄືບໜ້າໃນການພັດທະນາວຽກງານສາທາລະນະສຸກຫຼາຍດ້ານ ໂດຍສະເພາະແມ່ນການປັບປຸງ ການເຂົ້າເຖິງການບໍລິການສຸຂະພາບຂັ້ນພື້ນຖານ ເຊິ່ງເຮັດໃຫ້ສາມາດຫຼຸດຜ່ອນອັດຕາການຕາຍຂອງແມ່ ແລະ ເດັກ ແລະ ການປ້ອງການພະຍາດຕ່າງໆໃນລະດັບດີສົມຄວນ, ເຖິງຢ່າງໃດກໍ່ຕາມ ສປປ ລາວ ຍັງປະເຊີນກັບສິ່ງທ້າທາຍຫຼາຍຢ່າງເຊັ່ນ: ການຄວບຄຸມພະຍາດຕິດຕໍ່ຕ່າງໆຢູ່ ສປປ ລາວ ເພື່ອໃຫ້ສອດຄ່ອງກັບແຜນຍຸດທະສາດໃນການຕອບໂຕ້ພະຍາດລະບາດໃນພາກພື້ນ ແລະ ສາກົນ ລວມທັງການຕອບໂຕ້ ແລະ ຟື້ນຟູຜົນກະທົບຈາກການລະບາດຂອງພະຍາດໂຄວິດ-19. ​ພ້ອມດຽວກັນກໍ່ໄດ້​ສະ​ແດງຄວາມ​ຂອບ​ໃຈ ຕໍ່​ອົງການ​ WHO ທີ່​ໃຫ້ການ​ຊ່ວຍ​ເຫຼືອ​ໃນການຮັບມືກັບການແຜ່ລະບາດຂອງພະຍາດໂຄວິດ-19 ທີ່ສົ່ງຜົນກະທົບອັນໜັກໜ່ວງຕໍ່ປະຊາຊົນລາວ ກໍ່ຄືຕໍ່ກັບການພັດທະນາເສດຖະກິດ-ສັງຄົມ ໃນໄລຍະຜ່ານມາ ພ້ອມທັງຂໍໃຫ້ສືບຕໍ່ຊ່ວຍເຫຼືອ ສປປ ລາວ ໃຫ້ສາມາດຜ່ານຜ່າວິກິດການດ້ານສາທາລະນະສຸກ ໃຫ້ສາມາດດໍາລົງຊີວິດພາຍໃຕ້ ການດໍາລົງຊີວີດຮູບແບບໃໝ່ໂດຍໄວ. ໃນຕອນທ້າຍ, ທ່ານ ຮອງລັດຖະມົນຕີ ໄດ້​ອວຍພອນ​ໃຫ້​ທ່ານ​ຜູ້ຕາງໜ້າ ​ອົງການ WHO ຄົນ​ໃໝ່​ປະສົບ​ຜົນສຳ​ເລັດ​ໃນ​ການມາ​ປະຕິບັດ​ໜ້າ​ທີ່​ຂອງ​ທ່ານ ຢູ່ ສປປ ລາວ ໃນຄັ້ງນີ້.​

​          ໃນໂອກາດ​ດຽວ​ກັນ​ນີ້,​ ທ່ານ ດຣ. ຫຍິງຣູ ຈາຄວາລິນ ໂລ ກໍ່​ໄດ້​ສະ​ແດງ​ຄວາມ​ຂອບ​ໃຈ​ຕໍ່​ການ​ຕ້ອນຮັບ​ອົບ​ອຸ່ນ​ຂອງ ທ່ານ ໂພໄຊ ໄຂຄໍາພິທູນ, ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ ​ແລະ ສະ​ແດງ​ຄວາມ​ຂອບ​ໃຈ​ມາ​ຍັງ​ລັດຖະບານ ​ແຫ່ງ ສປປ ລາວ ທີ່​ໄດ້​ອະນຸມັດ​ໃຫ້​ທ່ານ ມາ​ປະຕິບັດ​ໜ້າ​ທີ່ຢູ່ ສປປ ລາວ. ທ່ານ​ຍັງ​ໄດ້​ໃຫ້​ຄຳ​ໝັ້ນ​ສັນຍາ​ວ່າ​ ອົງການ WHO ຈະ​ສືບ​ຕໍ່ເພີ່ມ​ທະວີ​ການ​ຮ່ວມ​ມື​ກັບ​ລັດຖະບານ ແລະ ຊ່ວຍເຫຼືອ ສປປ ລາວ ​ໃນ​ການຈັດ​ຕັ້ງ​ປະຕິບັດ​ແຜນງານຕ່າງໆ ທີ່ເປັນບູລິມະສິດດ້ານສາທາລະນະສຸກຂອງ ສປປ ລາວ ​ໃຫ້​ໄດ້​ຮັບ​ໝາກຜົນທີ່​ດີ​ໃນ​ອະນາຄົດ​ຂ້າງ​ໜ້າ.​