ເຖິງ:

ສະຫາຍ ບຸນຍັງ ວໍລະຈິດ

ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ

ປະທານປະເທດ ແຫ່ງ ສປປ ລາວ

ທີ່ ນະຄອນຫລວງວຽງຈັນ

ສະຫາຍ ບຸນຍັງ ວໍລະຈິດ ທີ່ນັບຖື:

          ໂດຍໄດ້ຮັບຊາບວ່າ ແຂວງອັດຕະປື ແຫ່ງ ສປປ ລາວ ໄດ້ເກີດອຸບັດເຫດຂອງເຂື່ອນກັ້ນນ້ຳ ເຊິ່ງໄດ້ເຮັດໃຫ້ມີນ້ຳຖ້ວມດິນເຈື່ອນ ແລະ ໄດ້ສ້າງຄວາມເສຍຫາຍຢ່າງໜັກໜ່ວງ ໃຫ້ແກ່ຊີວິດ ແລະ ຊັບສິນຂອງປະຊາຊົນ. ຂ້າພະເຈົ້າ ຂໍຕາງໜ້າພັກ ລັດ ປະຊາຊົນຈີນ ແລະ ໃນນາມສ່ວນຕົວ ສະແດງຄວາມໄວ້ອາໄລເຖິງຜູ້ເສຍຊີວິດຢ່າງສຸດຊຶ້ງ ແລະ ສະແດງຄວາມເສຍໃຈນຳຄອບຄົວພີ່ນ້ອງຂອງຜູ້ເສຍຊີວິດ ແລະ ຄົນບາດເຈັບ ຢ່າງຈິງໃຈ.

          ຈີນ ແລະ ລາວ ເປັນຄູ່ຮ່ວມຊະຕາກຳທີ່ມີຄວາມໝາຍຍຸດທະສາດ ເປັນບ້ານໃກ້ເຮືອນຄຽງທີ່ດີ ເພື່ອນທີ່ດີ ສະຫາຍທີ່ດີ ແລະ ຄູ່ຮ່ວມມືທີ່ດີ. ພວກຂ້າພະເຈົ້າ ຮູ້ສຶກເສຍໃຈນຳ ທີ່ປະຊາຊົນລາວໄດ້ປະສົບເຄາະຮ້າຍຈາກໄພພິບັດ ແລະ ສູນເສຍທີ່ພັກ, ຍິນດີສະໜອງການຊ່ວຍເຫລືອທຸກດ້ານຕາມຄວາມຮຽກຮ້ອງຕ້ອງການ ແລະ ຄວາມປະສົງຂອງຝ່າຍລາວທີ່ສະເໜີ. ຂ້າພະເຈົ້າເຊື່ອໝັ້ນວ່າ ພາຍໃຕ້ການນຳພາອັນໜັກແໜ້ນເຂັ້ມແຂງ ທີ່ມີສະຫາຍເປັນແກນກາງ ປະຊາຊົນລາວຜູ້ປະສົບເຄາະຮ້າຍ ຈະສາມາດຜ່ານຜ່າຄວາມຫຍຸ້ງຍາກ ແລະ ຟື້ນຟູການຜະລິດ ແລະ ຊີວິດການເປັນຢູ່ໃຫ້ເປັນປົກກະຕິໂດຍໄວ.

          ດ້ວຍຄວາມເຄົາລົບຢ່າງສູງ

                                                                           ສີ ຈິ້ນຜິງ

                                                ເລຂາທິການໃຫຍ່ຄະນະກຳມະການສູນກາງພັກກອມມູນິດຈິນ

                                                                ປະທານປະເທດ ແຫ່ງ ສປ ຈີນ

                                                    ນະຄອນຫລວງປັກກິ່ງ ວັນທີ 25 ກໍລະກົດ ປີ 2018

ເຖິງ:

ສະຫາຍ ທອງລຸນ ສີສຸລິດ

ນາຍົກລັດຖະມົນຕີ ແຫ່ງ ສປປ ລາວ

ທີ່ ນະຄອນຫລວງວຽງຈັນ

ສະຫາຍ ນາຍົກລັດຖະມົນຕີ:

          ໂດຍໄດ້ຮັບຊາບວ່າ ແຂວງອັດຕະປື ແຫ່ງ ສປປ ລາວ ເກີດອຸບັດເຫດຂອງເຂື່ອນກັ້ນນ້ຳ ເຊິ່ງໄດ້ເຮັດໃຫ້ມີນ້ຳຖ້ວມດິນເຈື່ອນ ແລະ ໄດ້ສ້າງຄວາມເສຍຫາຍຢ່າງໜັກໜ່ວງ ໃຫ້ແກ່ຊີວິດ ແລະ ຊັບສິນຂອງປະຊາຊົນ. ຂ້າພະເຈົ້າ ຂໍຕາງໜ້າລັດຖະບານຈີນ ສະແດງຄວາມເສຍໃຈຕໍ່ອຸບັດເຫດຄັ້ງນີ້ ແລະ ສະແດງຄວາມໄວ້ອາໄລເຖິງຜູ້ເສຍຊີວິດຢ່າງສຸດຊຶ້ງ.

          ຂ້າພະເຈົ້າເຊື່ອໝັ້ນວ່າ ພາຍໃຕ້ການຊີ້ນຳນຳພາຂອງສະຫາຍ ແລະ ລັດຖະບານລາວ ພາຍໃຕ້ຄວາມຮ່ວມພະຍາຍາມທຸກຝ່າຍພາຍໃນປະເທດລາວ ຝ່າຍລາວຈະໄດ້ຮັບຜົນສຳເລັດ ໃນວຽກງານກູ້ໄພ ແລະ ສ້າງສາຄືນໃໝ່ຢ່າງແນ່ນອນ. ຝ່າຍຈີນຍິນດີສະໜອງການຊ່ວຍເຫລືອທຸກດ້ານ ຕາມຄວາມຮຽກຮ້ອງຕ້ອງການ ແລະ ຄວາມປະສົງຂອງຝ່າຍລາວທີ່ສະເໜີ.

                                                                                ຫຼີ ເຄິ້ຊຽງ

                                                                    ນາຍົກລັດຖະມົນຕີ ແຫ່ງ ສປ ຈີນ

                                                          ນະຄອນຫລວງປັກກິ່ງ ວັນທີ 25 ກໍລະກົດ ປີ 2018