ນະ​ຄອນຫຼວງ​ວຽງ​ຈັນ, ວັນ​ທີ10​ ພະຈິກ 2021

ພະນະທ່ານ,

  ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍ່ຄືໃນນາມສ່ວນຕົວ, ຂ້າພະເຈົ້າຂໍຖືເປັນກຽດຢ່າງສູງ ສົ່ງຄໍາຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງພະນະທ່ານ ທີ່ໄດ້ຮັບເລືອກຕັ້ງໃຫ້ດໍາລົງຕໍາແໜ່ງເປັນນາຍົກລັດຖະມົນຕີແຫ່ງປະເທດຍີ່ປຸ່ນ ອີກຄັ້ງໜຶ່ງ.

ຂ້າພະເຈົ້າມີຄວາມພ້ອມທີ່ຈະສືບຕໍ່ເຮັດວຽກຮ່ວມກັບພະນະທ່ານຢ່າງໃກ້ຊິດ ເພື່ອສົ່ງເສີມສາຍພົວພັນມິດຕະພາບ​ ແລະ​ ການຮ່ວມມືອັນດີງາມ​ ລະຫວ່າງ ສປປລາວ ແລະ ຍີ່ປຸ່ນ​ ທັງໃນກອບສອງຝ່າຍ ແລະ ຫຼາຍຝ່າຍ, ກໍ່ຄືການເສີມຂະຫຍາຍການເປັນຄູ່ຮ່ວມຍຸດທະສາດ ຂອງສອງປະເທດພວກເຮົາ ໃຫ້ຈະເລີນງອກງາມ ແລະ ແຕກດອກອອກຜົນຍິ່ງໆຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ ແລະ ຍີ່ປຸ່ນ ກໍ່ຄືເພື່ອສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ສາກົນ.

          ຂ້າພະເຈົ້າຂໍຖືໂອກາດນີ້ ອວຍພອນໄຊອັນປະເສີດມາຍັງພະນະທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຄວາມສໍາເລັດໃນໜ້າທີ່ອັນສູງສົ່ງຂອງ​ພະນະທ່ານ.

                       ດ້ວຍຄວາມນັບຖືຢ່າງສູງ,

ພັນຄໍາວິພາວັນ

ພະນະ​ທ່ານ ກິຊິດະ ຟູມິໂອະ

​ນາ​ຍົກ​ລັດຖະມົນຕີ ແຫ່ງປະເທດຍີ່ປຸ່ນ

ທີ່ ​ນະຄອນຫຼວງໂຕ​ກຽວ

ພະ​ນະ​ທ່ານ,

　　 ​   ຂ້າ​ພະ​ເຈົ້າ ຂໍສະແດງຄວາມຊົມເຊີຍອັນອົບອຸ່ນ​ ແລະ ຈິງໃຈ ມາ​ຍັງ​ ພະ​ນະ​ທ່ານທີ່ໄດ້ຮັບການ​ແຕ່ງ​ຕັ້ງໃຫ້​ດຳ​ລົງ​ຕຳແໜ່ງ ​ລັດ​ຖະ​ມົນ​ຕີ​​ຕ່າງ​ປະ​ເທດ ແຫ່ງປະເທດ​ຍີ່​ປຸ່ນ.

            ຂ້າພະເຈົ້າມີຄວາມປິຕິຍິນດີທີ່ເຫັນວ່າສາຍພົວພັນມິດຕະພາບ ແລະ ການຮ່ວມມືອັນດີງາມທີ່ມີມາແຕ່ດົນນານ ກໍ່ຄືການເປັນຄູ່ຮ່ວມຍຸດທະສາດລະຫວ່າງ ສອງປະເທດ ແລະ ສອງກະຊວງການຕ່າງປະເທດພວກເຮົາ ໄດ້ຮັບການເສີມຂະຫຍາຍຢ່າງຕໍ່ເນື່ອງໃນຊຸມປີຜ່ານມາ. ເຖິງແມ່ນວ່າການແຜ່ລະບາດຂອງເຊື້ອພະຍາດໂຄວິດ-19 ໄດ້ເຮັດການແລກປ່ຽນຢ້ຽມຢາມເຊິ່ງກັນ ແລະ ກັນ ມີຄວາມຫຍຸ້ງຍາກກໍ່ຕາມ, ຂ້າ​ພະ​ເຈົ້າ ພ້ອມແລ້ວທີ່ຈະເຮັດວຽກຢ່າງໃກ້ຊິດຮ່ວມກັບພະນະທ່ານທັງໃນກອບສອງຝ່າຍ ແລະ ຫຼາຍຝ່າຍໃນຊຸມປີຕໍ່ໜ້າເພື່ອສືບຕໍ່ຮັດ ແໜ້ນສາຍພົວພັນທີ່ດີດັ່ງກ່າວນັ້ນໃຫ້ເຂັ້ມແຂງຍິ່ງໆຂຶ້ນ ເພື່ອຜົນປະໂຫຍດລວມຂອງສອງປະເທດພວກເຮົາ, ກໍ່ຄືເພື່ອສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ໃນພາກພື້ນ ແລະ ໃນໂລກ.

          ຂ້າ​ພະ​ເຈົ້າຂໍ​ຖື​ໂອ​ກາດນີ້ ອວຍ​ພອນ​ໄຊ​ອັນ​ປະ​ເສີດມາ​ຍັງ​ ພະ​ນະ​ທ່ານຈົ່ງ​ມີ​ພາະລາ​ນາ​ໄມ​ສົມ​ບູນ, ມີ​ຄວາມ​ຜາ​ສຸກ ແລະ ປະ​ສົບ​ຜົນ​ສຳ​ເລັດໃຫຍ່ຫຼວງກວ່າເກົ່າ ​ໃນ​ໜ້າ​ທີ່ວຽກງານ​ອັນມີ​ກຽດສູງສົ່ງ​ຂອງ ພະນະທ່ານ.

                                                                                      ດ້ວຍ​ຄວາມ​ນັບ​ຖື​ຢ່າງ​ສູງ,

                                                                                                    (ລາຍເຊັນ)

                                                                                   ສະ​ເຫຼີມ​ໄຊກົມ​ມະ​ສິດ

ພະ​ນະ​ທ່ານ ຮາຢາຊິ ໂຢຊິມະສະ

ລັດ​ຖະ​ມົນ​ຕີ​​ຕ່າງ​ປະ​ເທດ ແຫ່ງປະເທດຍີ່​ປຸ່ນ

ທີ່ນະຄອນຫຼວງໂຕ​ກຽວ