ນະຄອນຫຼວງວຽງຈັນ, ວັນທີ 10 ກັນຍາ 2022
ສົມເດັດ ພຣະຣາຊາ,
ຂ້າພະເຈົ້າ ມີຄວາມເສົ້າສະຫຼົດໃຈຢ່າງສຸດຊຶ້ງ ເມື່ອໄດ້ຮູ້ຂ່າວວ່າ ສົມເດັດ ພຣະຣາຊິນີ ເອລິຊາເບັດ ທີ II ແຫ່ງ ສະຫະຣາຊະອານາຈັກ ອັງກິດ ແລະ ອຽກລັງເໜືອ ປະມຸກລັດທີ່ແສນເຄົາລົບຮັກ ຂອງ ປະຊາຊົນອັງກິດ ແລະ ແມ່ທີ່ແສນຮັກ ຂອງພຣະອົງ ໄດ້ເຖິງແກ່ມໍລະນະກຳ ໃນວັນທີ 8 ກັນຍາ 2022.
ການຈາກໄປຂອງ ພຣະຣາຊິນີ ເອລິຊາເບັດ ທີ II ແມ່ນເປັນການສູນເສຍອັນຍິ່ງໃຫຍ່ ສຳລັບຄອບຄົວ ແຫ່ງຣາຊະວົງ, ສະຫະຣາຊະອານາຈັກ ແລະ ເຄືອຈັກກະພົບອັງກິດ ຕະຫຼອດເຖິງປະຊາຊົນ ອັງກິດ ທຸກຖ້ວນໜ້າ ເນື່ອງຈາກວ່າ ພຣະຣາຊິນີ ແມ່ນມານດາທີ່ເຄົາລົບຮັກ ແລະ ເປັນຜູ້ນຳທີ່ຍິ່ງໃຫຍ່ ທີ່ໄດ້ອຸທິດຊິວິດຕົນເອງ ເພື່ອຮັບໃຊ້ປະຊາຊົນອັງກິດ ແລະ ເຮັດໃຫ້ປະຊາຊົນມີຊິວິດການເປັນຢູ່ທີ່ດີ ຕະຫຼອດໄລຍະ ຫຼາຍກວ່າ 70 ປີ ທີ່ພຣະອົງ ຄອງຣາຊະບັນລັງ.
ໃນນາມຕາງໜ້າໃຫ້ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫຼົດໃຈຈາກໃຈຈິງ ແລະ ຂໍແບ່ງເບົາຄວາມທຸກໂສກ ມາຍັງ ສົມເດັດ ແລະ ຜ່ານ ສົມເດັດ ໄປຍັງ ສົມເດັດພຣະບໍຣົມ ວົງສານຸວົງທຸກພຣະອົງ ລວມທັງ ປະຊາຊົນ ອັງກິດ ທຸກຖ້ວນໜ້າ ມານະໂອກາດນີ້ດ້ວຍ.
ຂໍໃຫ້ດວງວິນຍານ ຂອງ ສົມເດັດ ພຣະຣາຊິນີ ເອລິຊາເບັດ ທີ II ຈົ່ງໄປສູ່ສຸຂະຕິ.
ດ້ວຍຄວາມນັບຖືຢ່າງສູງ,
ທອງລຸນ ສີສຸລິດ
ສົມເດັດ ພຣະຣາຊາ ຊາວສ໌ ທີ III
ແຫ່ງ ສະຫະຣາຊະອານາຈັກ ອັງກິດ ແລະ ອຽກລັງເໜືອ
ທີ່ ລອນດອນ
---------------------------------------------------------------------------------------------------
ພະນະທ່ານ,
ຂ້າພະເຈົ້າ ມີຄວາມເສົ້າສະຫຼົດໃຈຢ່າງສຸດຊຶ້ງ ເມື່ອໄດ້ຮູ້ຂ່າວວ່າ ສົມເດັດ ພຣະຣາຊິນີ ເອລິຊາເບັດ ທີ II ແຫ່ງ ສະຫະຣາຊະອານາຈັກ ອັງກິດ ແລະ ອຽກລັງເໜືອ ເຊິ່ງເປັນປະມຸກລັດທີ່ແສນເຄົາລົບຮັກ ຂອງ ປະຊາຊົນອັງກິດ ໄດ້ເຖິງແກ່ມໍລະນະກຳ ໃນວັນທີ 8 ກັນຍາ 2022.
ໃນນາມຕາງໜ້າໃຫ້ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫຼົດຢ່າງຈິງໃຈ ແລະ ຂໍແບ່ງເບົາຄວາມທຸກໂສກ ມາຍັງ ພະນະທ່ານ ແລະ ຜ່ານ ພະນະທ່ານ ໄປຍັງ ຣາຊະວົງ ລວມທັງ ປະຊາຊົນ ອັງກິດ ທຸກຖ້ວນໜ້າ ມານະໂອກາດນີ້ດ້ວຍ.
ຂໍໃຫ້ດວງວິນຍານ ຂອງ ສົມເດັດ ພຣະຣາຊິນີ ເອລິຊາເບັດ ທີ II ຈົ່ງໄປສູ່ສຸຂະຕິ.
ດ້ວຍຄວາມນັບຖືຢ່າງສູງ,
ພັນຄຳ ວິພາວັນ
ພະນະທ່ານ ນາງ ເອລີຊາເບັດ ທຣັດສ໌
ນາຍົກລັດຖະມົນຕີ ແຫ່ງ ສະຫະຣາຊະອານາຈັກ ອັງກິດ ແລະ ອຽກລັງເໜືອ
ທີ່ ລອນດອນ
---------------------------------------------------------------------------------------------------