ເພື່ອເປັນການສືບຕໍ່ຮັດແໜ້ນ ແລະ ເສີມຂະຫຍາຍການພົວພັນທີ່ເປັນມູນເຊື້ອ ແລະ ການຮ່ວມມືມີມາແຕ່ຍາວນານ ລະຫວ່າງ ສປປ ລາວ ແລະ ຮົງກາຣີ, ທ່ານ ປີເຕີ ຊີຈາໂຕ (Péter SZIJJÁRTÓ), ລັດຖະມົນຕີກະຊວງການຕ່າງປະເທດ ແລະ ການຄ້າ ແຫ່ງ ຮົງກາຣີ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ແຕ່ວັນທີ 06-07 ມິຖຸນາ 2016.

ໃນ​ຕອນ​ເຊົ້າ ​ຂອງ​ວັນ​ທີ 07 ມິຖຸນາ 2016, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ​ໄດ້​ໃຫ້​ກຽດ​ຕ້ອນຮັບ ​ແລະ ພົບ​ປະ​ປຶກສາຫາລື​ ຢ່າງ​ເປັນ​ທາງ​ການ ກັບ ທ່ານ ປີເຕີ ຊີຈາໂຕ (Péter SZIJJÁRTÓ), ລັດຖະມົນຕີກະຊວງການຕ່າງປະເທດ ແລະ ການຄ້າ ຮົງກາຣີ ຢູ່ທີ່ ກະຊວງການຕ່າງປະເທດ. ​ໃນ​ການ​ພົບ​ປະ​ຄັ້ງ​ນີ້, ສອງຝ່າຍໄດ້ຕີ​ລາຄາ​ສູງການ​ພົວພັນຮ່ວມມື ໃນຂອບສອງຝ່າຍ ແລະ ຫລາຍຝ່າຍ ​ໃນໄລຍະຜ່ານມາ ​ແລະ ​ໄດ້​ປຶກສາ​ຫາລື​ທິດທາງການເສີມ​ຂະຫຍາ​ຍສາຍພົວພັນ ​ແລະ ການ​ຮ່ວມ​ມື​ໃນ​ດ້ານ​ຕ່າງໆ ​ເປັນຕົ້ນ​ແມ່ນ​ການ​ຮ່ວມ​ມື​ດ້ານກະສິກຳ ແລະ ລ້ຽງສັດ, ​ການ​ສຶກສາ, ເສດຖະກິດ-ການຄ້າ, ການເງິນ ​ແລະ ອື່ນໆ. ພາຍຫລັງການປຶກສາຫາລື ສອງຝ່າຍ​ໄດ້ລົງນາມໃນແຜນການຮ່ວມມືດ້ານການສຶກສາ ລະຫວ່າງ ລາວ-ຮົງກາຣີ, ຊຶ່ງລັດຖະບານ ຮົງກາຣີ ຈະໄດ້ເພີ່ມທຶນການສຶກສາແກ່ນັກສຶກສາລາວ ຈຳນວນ 50 ທຶນຕໍ່ປີ ໃນໄລຍະ 2017-2019.

ໃນ​ໂອກາດ​ຢູ່ຢ້ຽມຢາມ​ຄັ້ງນີ້, ທ່ານ ປີເຕີ ຊີຈາໂຕ ຍັງໄດ້​ເຂົ້າ​ພົບປະນຳທ່ານ ນາງ ເຂັມມະນີ ພົນເສນາ, ລັດຖະມົນຕີກະຊວງອຸດສາຫະກຳ ແລະ ການຄ້າ, ພ້ອມທັງໄດ້ເຂົ້າຮ່ວມພີທີເປີດໂຮງງານຂ້າສັດທັນສະໄໝ ແລະ ຜະລິດຊີ້ນເປັນສິນຄ້າ, ຊຶ່ງເປັນໂຄງການຮ່ວມມື ລາວ-ຮົງກາຣີ, ຢູ່ ນ້ຳຊວງ​ ອີກດ້ວຍ.

ການ​ມາຢ້ຽມຢາມຂອງຄະນະຜູ້ແທນ ນຳໂດຍ ລັດຖະມົນຕີກະຊວງການຕ່າງປະເທດ ແລະ ການຄ້າ ຮົງກາຣີ ໃນ​ຄັ້ງ​ນີ້ ​ເປັນການຮັດແໜ້ນສາຍພົວພັນມິດຕະພາບທີ່ມີມູນເຊື້ອ ແລະ ການຮ່ວມມືມີມາແຕ່ຍາວນານ ລະຫວ່າງ ສປປ ລາວ ແລະ ຮົງກາຣີ ໃຫ້ສືບຕໍ່ຈະເລີນງອກງາມຍິ່ງຂຶ້ນ, ຊຶ່ງການ​ຢ້ຽມຢາມ​ດັ່ງກ່າວ ໄດ້​ດຳເນີນໄປດ້ວຍ​ຜົນສຳ​ເລັດ​ຢ່າງ​ຈົບງາມ.