ໃນວັນທີ 07 ມິຖຸນາ 2016, ທີ່ນະຄອນຫລວງວຽງຈັນ, ທ່ານ ນາງ ປານີ ຢາທໍຕູ້, ປະທານສະພາແຫ່ງຊາດ, ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງ ທ່ານ Yan Kang Hyeon, ເອກອັກຄະລັດຖະທູດ ສ.ເກົາຫລີ ປະຈໍາ ລາວ, ໃນໂອກາດມາດຳລົງຕຳແໜ່ງເປັນ ເອກອັກຄະລັດຖະທູດ ຄົນໃໝ່ ປະຈຳ ສປປ ລາວ.
ໃນໂອກາດດັ່ງກ່າວ, ທ່ານປະທານສະພາແຫ່ງຊາດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການມາດຳລົງຕຳແໜ່ງເປັນ ເອກອັກຄະລັດຖະທູດຄົນໃໝ່ ຢູ່ ສປປ ລາວ ຂອງ ທ່ານ Yun Kang Hyeon, ເຊິ່ງເປັນການປະກອບສ່ວນສຳຄັນເຂົ້າໃນການເພີ່ມທະວີສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ-ສ.ເກົາຫລີ ທີ່ມີມາແລ້ວນັ້ນ ໃຫ້ນັບມື້ໄດ້ຮັບການປັບປຸງດີຂຶ້ນເປັນກ້າວໆ, ເປັນການປະກອບສ່ວນສຳຄັນໃຫ້ແກ່ການພັດທະນາລາວ ໃຫ້ດີຂຶ້ນເລື້ອຍໆ ແລະ ສະແດງຄວາມເຊື່ອໝັ້ນວ່າ ການດຳລົງຕຳແໜ່ງເປັນ ເອກອັກຄະລັດຖະທູດ ຄົນໃໝ່ນີ້ ຈະສືບຕໍ່ເຄື່ອນໄຫວຊຸກຍູ້ສົ່ງເສີມສາຍພົວພັນຮ່ວມມື ລະຫວ່າງລັດຖະບານ ແລະ ປະຊາຊົນສອງປະເທດ ລາວ-ສ.ເກົາຫລີ ໃຫ້ນັບມື້ນັບຂະຫຍາຍຕົວຍິ່ງໆຂຶ້ນ.