ໃນວັນທີ 07 ມິຖຸນາ 2016, ສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ ໄດ້ຕ້ອນຮັບການເຂົ້າຢ້ຽມຄຳນັບຂອງ ສະຫາຍ ຊອຍ ແທ ບອກ, ກຳມະການກົມການເມືອງສູນກາງພັກ, ຮອງປະທານພັກແຮງງານເກົາຫລີ ພ້ອມຄະນະ ໃນໂອກາດເດີນທາງມາຢ້ຽມຢາມ ສປປ ລາວ ເພື່ອແຈ້ງໃຫ້ຊາບເຖິງຜົນສຳເລັດຂອງກອງປະຊຸມໃຫຍ່ ຄັ້ງທີ VII ຂອງພັກແຮງງານເກົາຫລີ ທີ່ໄດ້ສຳເລັດລົງໃນບໍ່ດົນມານີ້.
ໂອກາດນີ້, ສະຫາຍ ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ ໄດ້ສະແດງຄວາມຊົມເຊີຍຕໍ່ ສະຫາຍ ຊອຍ ແທ ບອກ ແລະ ຄະນະທີ່ໄດ້ມາຢ້ຽມຢາມ ແລະ ໄດ້ແຈ້ງໃຫ້ຊາບເຖິງຜົນສຳເລັດຂອງກອງປະຊຸມໃຫຍ່ ຄັ້ງທີ VII ຂອງພັກແຮງງານເກົາຫລີ, ພ້ອມທັງສະແດງຄວາມຊົມເຊີຍຕໍ່ ສະຫາຍ ກິມ ເຈິງອຸນ ທີ່ໄດ້ຮັບເລືອກຕັ້ງໃຫ້ດຳລົງຕຳແໜ່ງເປັນ ປະທານພັກແຮງງານເກົາຫລີ ແລະ ມີຄວາມເຊື່ອໝັ້ນວ່າພາຍໃຕ້ການນຳພາອັນເດັດດ່ຽວໜຽວແໜ້ນ ຂອງພັກແຮງງານເກົາຫລີ ອັນມີ ສະຫາຍ ກິມ ອິນ ຊຸງ ແລະ ກິມ ເຈິງ ອິນ ຜູ້ນຳທີ່ຍິ່ງໃຫຍ່ຂອງປະຊາຊົນ ສປປ ເກົາຫລີ ເປັນຜູ້ນຳໃນເມື່ອກ່ອນ ກໍຄື ສະຫາຍ ກິມ ເຈິງ ອຸນ ເປັນຜູ້ສືບທອດພາລະກິດອັນຍິ່ງໃຫຍ່ໃນປັດຈຸບັນ. ພັກ, ລັດ ແລະ ປະຊາຊົນເກົາຫລີອ້າຍນ້ອງ ຈະສືບຕໍ່ຍາດໄດ້ຜົນສຳເລັດອັນໃໝ່ໃຫຍ່ຫລວງກວ່າເກົ່າ ໃນພາລະກິດປົກປັກຮັກສາ ແລະ ສ້າງສາປະເທດສັງຄົມນິຍົມ ໃຫ້ນັບມື້ເຂັ້ມແຂງ ກໍຄືການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VII ຂອງພັກແຮງງານເກົາຫລີ ທີ່ວາງອອກຢ່າງມີໄຊ.