ຊົມເຊີຍຜົນສໍາເລັດກອງປະຊຸມໃຫຍ່ ຄັ້ງທີ X ຂອງພັກ ຢ່າງສຸດໃຈ ! ພັກປະຊາຊົນ ປະຕິວັດລາວ ທີ່ມີກຽດສະຫງ່າໝັ້ນຍືນ ! ຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃຫ້ປະກົດຜົນເປັນຈິງ ! ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ
a
ເຊື່ອມຕໍ່ເວັບໄຊພາຍໃນລາວ
Links
Lao Government
Law Project
UN
Lao PDR Trade Portal

ລັດຖະມົນຕີກະຊວງການຕ່າງປະເທດ ຕ້ອນຮັບ ລັດຖະມົນຕີກະຊວງຮ່ວມມື ເພື່ອການພັດທະນາ ແລະ ມະນຸດສະທຳຂອງ ລຸກຊຳບວກ

 

Luxamberg1 Luxamberg3

 

ໃນ​ວັນ​ທີ 15 ພະຈິກ 2017, ຢູ່ ທີ່ ກະ​ຊວງ​ການ​ຕ່າງ​ປະ​ເທດ, ທ່ານ ສະ​ເຫຼີມ​ໄຊ ກົມ​ມະ​ສິດ, ລັດຖະມົນຕີ​​ກະຊວງການຕ່າງປະເທດ ​ແຫ່ງ ສປປ ລາວ, ໄດ້ຕ້ອນຮັບການເຂົ້າ​ຢ້ຽມ​ພົບປະຂອງ ທ່ານ ໂຣແມນ ສະນາຍເດີ (Romain Schneider), ລັດຖະມົນຕີກະຊວງຮ່ວມມື ເພື່ອການພັດທະນາ ແລະ ມະນຸດສະທຳຂອງ ລຸກຊຳບວກ ພ້ອມດ້ວຍຄະນະ, ໃນໂອກາດທີ່ເດີນທາງມາຢ້ຽມຢາມເຮັດວຽກຢູ່ ສປປ ລາວ ໃນລະຫວ່າງ ວັນທີ 14-15 ພະຈິກ 2017.

ໃນ​ໂອ​ກາດ​ນີ້, ທ່ານລັດ​ຖະ​ມົນ​ຕີ ໄດ້​ສະ​ແດງ​ຄວາມ​ຍິນ​ດີ​ຕ້ອນຮັບ​ຄະນະຜູ້​ແທນຢ່າງອົບ​ອຸ່ນ ແລະ ຕີ​ລາ​ຄາ​ສູງ​ຕໍ່ການ​ພົ​ວ​ພັນ​ຮ່ວມ​ມືສອງ​ຝ່າຍໃນໄລຍະຜ່ານມາ ແລະ ຫວັງຢ່າງຍິ່ງວ່າ ການພົວພັນ ແລະ ຮ່ວມມື ລະຫວ່າງ ສອງປະເທດລາວ ແລະ ລຸກຊຳບວກຈະໄດ້ຮັບການສືບຕໍ່ເສີມຂະຫຍາຍໃຫ້ດີຂຶ້ນເລື້ອຍໆ, ທັງຍັງໄດ້ຖືໂອກາດນີ້ ສະ​ແດງ​ຄວາມຂອບ​ໃຈ​ຢ່າງ​ສູງ​ຕໍ່​​ການ​ສະ​ໜັບ​ສະ​ໜູນ ແລະ ຊ່ວຍ​ເຫຼືອ​ອັນລໍ້າຄ່າຂອງ​ ລັດ​ຖະ​ບານລຸກຊຳບວກ ເຂົ້າ​ໃນ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ ຂອງ ສ​ປ​ປ​ ລາວ ໃນ​ໄລ​ຍະຜ່ານ​ມາ, ຊຶ່ງ​ເປັນການ​ປະ​ກອບ​ສ່ວນ​ອັນ​ສຳຄັນທີ່ສອດຄ່ອງກັບແຜນບູລິມະສິດ ແລະ ນະໂຍບາຍຂອງລັດຖະບານ, ໂດຍສະເພາະແມ່ນແຜນການພັດທະນາເສດຖະກິດ-ສັງຄົມ ແຕ່ລະໄລຍະ​ ເພື່ອນຳ​ເອົາ​ປະ​ເທດຊາດ ​ອອກ​ຈາ​ກຄວາມທຸກ​ຍາກ ​ແລະ ດ້ອຍ​ພັດທະນາ​ເທື່ອ​ລະ​ກ້າວ.

ໃນໂອກາດຢ້ຽມຢາມ ສປປ ລາວ ຄັ້ງນີ້, ຫຼັງສອງຝ່າຍ ລາວ-ລຸກຊໍາບວກ ຍັງປຶກ​ສາ​ຫາ​ລືແລກປ່ຽນຄຳຄິດຄຳເຫັນ ກ່ຽວ​ກັບ ທິດ​ທາງໃນ​ການ​ສືບ​ຕໍ່ເສີມຂະຍາຍການພົວພັນຮ່ວມມືສອງຝ່າຍໃນຕໍ່ໜ້າ, ເພື່ອແນໃສ່ການເສີມຂະຫຍາການພົວພັນຮ່ວມມືລະຫວ່າງສປປ ລາວ ແລະ ລຸກຊຳບວກ ໃຫ້ນັບມື້ດີຂຶ້ນເລື້ອຍໆ, ໄດ້ມີການເຊັນສັນຍາເພີ່ມການຊ່ວຍເຫຼືອຂອງລຸກຊຳບວກໃຫ້ແກ່ ສປປ ລາວ ເປັນມູນຄ່າ 75 ລ້ານເອີໂຣ, ຊື່ງ​ຈະ​ນຳ​ໃຊ້​ເຂົ້າ​ໃນ​ຂົງ​ເຂດສາ​ທາ​ລະ​ນະ​ສຸກ, ການ​ພັດ​ທະ​ນາ​ທ້ອງ​ຖິ່ນ, ການ​ຝຶກ​ອົບ​ຮົມ​ດ້ານ​ການ​ທ່ອງ​ທ່ຽວ, ການ​ປົກ​ຄອງ ແລະ ທຶນ​ສຳ​ລັບ​ການ​ສຶກ​ສາສຳລັບໄລຍະ 2016 -2020.

ສປປ ລາວ ແລະ ລຸກຊຳບວກ ໄດ້ເຊັນສັນຍາສ້າງຕັ້ງສາຍພົວພັນການທູດນຳກັນໃນວັນທີ 25 ກັນຍາ 1997 ແລະ ນັບແຕ່ປີ 2001 ເປັນຕົ້ນມາລຸກຊຳບວກ ໄດ້ເອົາ ສປປ ລາວ ເຂົ້າເປັນປະເທດເປົ້າໝາຍໃນການຊ່ວຍເຫຼືອ ເພື່ອການພັດທະນາ ແລະ ​ທັງ​ສອງ​ປະ​ເທດ​ໄດ້​ລົງ​ນາມ​ໃນ​​ແຜ​ນງານ​ການ​ຮ່ວມ​ມື​ ລະຫວ່າງ​ ສອງ​ລັດຖະບານ, ນັບແຕ່ນັ້ນມາ ການຊ່ວຍເຫຼືອເພື່ອການພັດທະນາແກ່ ສປປ ລາວ ຂະຫຍາຍຕົວໃນລະດັບດີ, ຊຶ່ງຕົວເລກການຊ່ວຍເຫຼືອເພີ້ມຂຶ້ນແຕ່ລະປີ.

ບົດຂ່າວອື່ນໆ