ສະຫະພັນ ກຳມະບານ ກະຊວງການຕ່າງປະເທດ ໄດ້ດຳເນີນກອງປະຊຸມໃຫຍ່ ຄັ້ງທີ XIຂອງຕົນຂຶ້ນ ໃນຕອນເຊົ້າຂອງວັນທີ11 ສິງຫາ 2020, ທີ່ ສູນການຮ່ວມມືສາກົນ ແລະ ຝຶກອົບຮົມ (ICTC), ພາຍໃຕ້ການເປັນປະທານຂອງ ສະຫາຍ ບົວພັດ ພຸດທະວົງ, ປະທານຄະນະບໍລິຫານງານສະຫະພັນກຳມະບານກະຊວງການຕ່າງປະເທດ ໂດຍການໃຫ້ກຽດເຂົ້າຮ່ວມຂອງ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະພັກ, ລັດຖະມົນຕີກະຊວງການຕ່າງປະເທດ; ສະຫາຍ ປ້ານ ນ້ອຍມະນີ, ກໍາມະການສູນກາງພັກ, ປະທານສູນກາງສະຫະພັນກຳມະບານລາວ; ມີບັນດາອົງການຈັດຕັ້ງມະຫາຊົນຂອງກະຊວງ, ຄະນະບໍລິຫານງານສະຫະພັນກຳມະບານ, ຜູ້ແທນສົມບູນ, ສະມາຊິກກຳມະບານ ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.
ໃນກອງປະຊຸມໃຫຍ່ຄັ້ງນີ້, ສະຫາຍ ບົວພັດ ພຸດທະວົງ ໄດ້ຂຶ້ນຜ່ານບົດລາຍງານການເມືອງ ໂດຍໄດ້ທົບທວນຄືນສະພາບການເຄື່ອນໄຫວວຽກງານກຳມະບານຢູ່ກະຊວງການຕ່າງປະເທດ ຕະຫຼອດໄລຍະ 04 ປີ ກວ່າຜ່ານມາ ແລະ ທິດທາງຄາດໝາຍສູ້ຊົນໃນໄລຍະ 05 ປີ ຕໍ່ໜ້າ (2020-2025), ໄດ້ຕີລາຄາຜົນງານອັນພົ້ນເດັ່ນ ແລະ ຜົນສໍາເລັດທີ່ຍາດມາໄດ້ໃນການເຄື່ອນໄຫວ, ພ້ອມທັງຍົກໃຫ້ເຫັນຈຸດດີ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນມາໄດ້ ໃນດ້ານຕ່າງໆທີ່ສະຫະພັນກຳມະບານກະຊວງການຕ່າງປະເທດຍາດມາໄດ້. ປັດຈຸບັນ, ຄະນະສະຫະພັນກໍາມະບານກະຊວງ ມີຈໍານວນ 09 ສະຫາຍ, ຍິງ 02 ສະຫາຍ ຈາກຈໍານວນທັງໝົດ 11 ສະຫາຍ, ຄະນະກໍາມະບານຮາກຖານ ກະຊວງການຕ່າງປະເທດ ທັງຢູ່ພາຍໃນ ແລະ ຕ່າງປະເທດ ມີທັງໝົດ 57 ຮາກຖານ, ມີສະມາຊິກທັງໝົດ 750 ສະຫາຍ, ຍິງ 300 ສະຫາຍ. ສະຫະພັນກຳມະບານກະຊວງການຕ່າງປະເທດ ຍາມໃດກໍ່ໄດ້ຖືເອົາວຽກງານໂຄສະນາສຶກສາອົບຮົມດ້ານການເມືອງ-ແນວຄິດໃຫ້ແກ່ສະມາຊິກກຳມະບານຂອງຕົນ ເພື່ອໃຫ້ເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ ແລະ ກຳໄດ້ແນວທາງນະໂຍບາຍການຕ່າງປະເທດຂອງພັກຢ່າງໜັກແໜ້ນ. ພ້ອມດຽວກັນນີ້, ສະຫະພັນກໍາມະບານກະຊວງການຕ່າງປະເທດ ກໍ່ໄດ້ມີການເຄື່ອນໄຫວວຽກງານກຳມະບານ ໂດຍຖືເອົາຂໍ້ແຂ່ງຂັນ 5 ເປັນເຈົ້າ ທີ່ສູນກາງກຳມະບານລາວວາງອອກໃນການຈັດຕັ້ງປະຕິບັດໂດຍຕິດພັນກັບວຽກງານວິຊາສະເພາະຂອງຕົນ.
ກອງປະຊຸມໃຫຍ່ຄັ້ງນີ້ ຍັງໄດ້ປ່ອນບັດຄັດເລືອກເອົາຄະນະບໍລິຫານງານ ສະຫະພັນກຳມະບານກະຊວງການຕ່າງປະເທດຊຸດໃໝ່, ຊຶ່ງມີຜູ້ສະໝັກທັງໝົດ 15 ສະຫາຍ, ຍິງ03 ສະຫາຍ, ເລືອກເອົາ 11 ສະຫາຍ. ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາ ສະຫາຍ ວັນທາ ແສງເມືອງ, ເປັນປະທານ;ສະຫາຍ ຄຳໄພ ພັນທອງດີ, ເປັນຮອງປະທານຜູ້ທີ 1 ແລະ ສະຫາຍ ກັນຍາ ຄຳມຸງຄຸນ, ເປັນຮອງປະທານຜູ້ທີ 2ແລະ ເປັນປະທານກວດກາ ເພື່ອສືບຕໍ່ຊີ້ນຳ-ນຳພາວຽກງານການຈັດຕັ້ງປະຕິບັດຕາມມະຕິກອງປະຊຸມໃຫຍ່ ຄັ້ງທີ XI ຂອງສະຫະພັນກຳມະບານກະຊວງການຕ່າງປະເທດ ໃຫ້ປະກົດຜົນເປັນຈິງ.
ໃນໂອກາດດັ່ງກ່າວນີ້, ສະຫາຍ ປ້ານ ນ້ອຍມະນີ, ກຳມະການສູນກາງພັກ, ປະທານສູນກາງສະຫະພັນກໍາມະບານລາວ ໄດ້ຕາງໜ້າໃຫ້ສູນກາງສະຫະພັນກຳມະບານລາວໃຫ້ກຽດປະດັບຫຼຽນກຳມະບານສູງສຸດໃຫ້ແກ່ຄະນະພັກ-ຄະນະນຳກະຊວງການຕ່າງປະເທດ ທີ່ມີຜົນງານອັນພົ້ນເດັ່ນໃນການຊີ້ນຳ-ນຳພາ ສະຫະພັນກຳມະບານກະຊວງການຕ່າງປະເທດໃນໄລຍະຜ່ານມາ. ພ້ອມດຽວກັນນັ້ນ, ໃນກອງປະຊຸມ ຜູ້ແທນຍັງໄດ້ຮັບຟັງການໂອ້ລົມຂອງ ສະຫາຍ ປ້ານ ນ້ອຍມະນີ ຊຶ່ງສະຫາຍໄດ້ຍ້ອງຍໍຊົມເຊີຍຜົນງານທີ່ສະຫະພັນກຳມະບານກະຊວງການຕ່າງປະເທດ ຍາດມາໄດ້ໃນໄລຍະຜ່ານມາ ແລະໄດ້ເນັ້ນໃຫ້ກຳມະບານທຸກຂັ້ນຈົ່ງຊ່ວຍກັນແກ້ໄຂບັນດາຂໍ້ຄົງຄ້າງ, ປະຕິບັດສິດພາລະບົດບາດກຳມະບານຕິດພັນກັບວຽກງານຂອງຕົນໃຫ້ແທດເໝາະ ແນໃສ່ເຮັດໃຫ້ສະມາຊິກກຳມະບານ, ກຳມະກອນ, ຜູ້ອອກແຮງງານມີຄວາມເຂົ້າໃຈແຈ້ງຕໍ່ແນວທາງຂອງພັກແລະ ກົດລະບຽບຂອງລັດ ກໍຄືແນວທາງນະໂຍບາຍການຕ່າງປະເທດຂອງພັກເຮົາເພື່ອປົກປ້ອງສິດຜົນປະໂຫຍດຂອງເຂົາເຈົ້າຢ່າງແທ້ຈິງ.