ໃນວັນທີ 31 ພຶດສະພາ 2022, ເວລາ 09:09 ໂມງ, ກະຊວງການຕ່າງປະເທດ ໄດ້ຈັດພິທີປູກຕົ້ນໄມ້ມຸງຄຸນ (ຕົ້ນດອກຄູນ) ຢູ່ເດີ່ນທາງດ້ານໜ້າຂອງກະຊວງການຕ່າງປະເທດ, ໃຫ້ກຽດເຂົ້າຮ່ວມພິທີປູກຕົ້ນໄມ້ໃນຄັ້ງນີ້ໂດຍ ທ່ານ ສະເຫຼີມໄຊ ກົມມະສິດ, ກໍາມະການກົມການເມືອງສູນກາງພັກ, ລັດຖະມົນຕີກະຊວງການຕ່າງປະເທດ, ມີບັນດາຮອງລັດຖະມົນຕີ, ຄະນະກົມ ແລະ ພະນັກງານກະຊວງການຕ່າງປະເທດຈໍານວນໜຶ່ງ ເຂົ້າຮ່ວມຢ່າງພ້ອມພຽງ.
ການຈັດກິດຈະກໍາປູກຕົ້ນໄມ້ໃນຄັ້ງນີ້ ແມ່ນມີຄວາມໝາຍຄວາມສໍາຄັນ, ທັງເປັນການສ້າງຂະບວນການ ເນື່ອງໃນໂອກາດສະເຫຼີມສະຫຼອງວັນສໍາຄັນຕ່າງໆຊອງຊາດ ແລະ ຂອງສາກົນ ເຊັ່ນ: ວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຄົບຮອບ 42 ປີ (1980-2022), ວັນສິ່ງແວດລ້ອມແຫ່ງຊາດ ວັນທີ 5 ມິຖຸນາ ຄົບຮອບ 23 ປີ (1999-2022) ແລະ ວັນສິ່ງແວດລ້ອມໂລກ ວັນທີ 5 ມິຖຸນາ ຄົບຮອບ 50 ປີ (1972-2022) ທີ່ໃກ້ຈະມາເຖິງໃນມໍ່ໆນີ້, ເຊິ່ງໃນປີນີ້ອົງການສະຫະປະຊາຊາດ ໄດ້ກໍານົດຄໍາຂວັນວ່າ:“ໂລກມີພຽງຫນຶ່ງດຽວ” ຫລື “Only One Earth”.