ໃນຕອນຄໍ່າຂອງ ວັນທີ 12 ກັນຍາ 2022 ທີ່ຜ່ານມາ, ໄດ້ມີພິທີສະເຫຼີມສະຫຼອງຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຮົງກາຣີ ຂຶ້ນຢ່າງເປັນທາງການ ທີ່ ໂຮງແຮມ ແລນມາກ ນະຄອນຫຼວງວຽງຈັນ.

ເຂົ້າຮ່ວມເປັນກຽດໃນພິທີດັ່ງກ່າວ ມີ ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໃນນາມຕາງໜ້າ ລັດຖະບານ ແຫ່ງ ສປປ ລາວ; ທ່ານ ຊານດໍ້ ຊີໂພສ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ຮົງກາຣີ ປະຈໍາ ສປປ ລາວ ຕາງໜ້າ ລັດຖະບານ ແຫ່ງ ຮົງກາຣີ. ນອກຈາກນັ້ນ, ຍັງມີບັນດາລັດຖະມົນຕີ, ຮອງລັດຖະມົນຕີ, ເຈົ້າໜ້າທີ່ຂັ້ນສູງຂອງລາວ, ບັນດາທູຕານຸທູດປະຈໍາ ສປປ ລາວ ຈໍານວນໜຶ່ງ ແລະ ແຂກຖືກເຊີນຈາກພາກສ່ວນຕ່າງໆ ເຂົ້າຮ່ວມຢ່າງພ້ອມພຽງ.

ໃນພິທີທີ່ມີຄວາມໝາຍຄວາມສໍາຄັນນີ້, ທ່ານ ສະເຫຼີມໄຊ ກົມມະສິດ ແລະ ທ່ານ ຊານດໍ້ ຊີໂພສ ໄດ້ກ່າວຄໍາເຫັນສະແດງຄວາມຊົມເຊີຍ ແລະ ຕີລາຄາ​ສູງຕໍ່ຜົນສຳເລັດ​ແຫ່ງ​ການພົວພັນ​ຮ່ວມ​ມື​ໃນ​ໄລຍະ 60 ປີຜ່ານ​ມາ ລະຫວ່າງ ​ສອງ​ລັດ​ຖະບານ ກໍ່​ຄື​ ປະຊາຊົນ ​ສອງ​ຊາດ ລາວ-ຮົງກາຣີ.

ໃນ​ໄລຍະ​​ໃໝ່ນີ້ ການພົວພັນຮ່ວມມື ລະຫວ່າງ ສອງປະເທດ ແມ່ນມີບາດກ້າວຂະຫຍາຍຕົວຕໍ່ເນື່ອງ, ການຮ່ວມມືໃນຂົງເຂດຕ່າງໆໄດ້ຮັບການຮັດແໜ້ນ, ສອງປະເທດມີຄວາມເຊື່ອໝັ້ນ ແລະ ສືບຕໍ່ສະໜັບສະໜູນເຊິ່ງກັນແລະກັນ ໃນເວທີພາກພື້ນ ແລະ ສາກົນ ບົນພື້ນຖານການເປັນປະເທດຄູ່ຮ່ວມມືຍຸດທະສາດ. ມີການແລກປ່ຽນຢ້ຽມຢາມຂອງຄະນະຜູ້ແທນໃນລະດັບຕ່າງໆຢ່າງປົກກະຕິ ທັງພາກລັດ ແລະ ເອກະຊົນ. ນອກນັ້ນ, ການພົວພັນຮ່ວມມືຂອງສອງປະເທດ ຍັງສືບຕໍ່ເສີມຂະຫຍາຍໃນຫຼາຍດ້ານເຊັ່ນ: ດ້ານ​ການເງິນ, ເສດຖະກິດ-ການ​ຄ້າ, ການສຶກ​ສາ, ກະສິກຳ, ວັດທະນະທຳ, ການທ່ອງທ່ຽວ ແລະ ດ້ານ​ອື່ນໆ, ເຊິ່ງເປັນການປະກອບສ່ວນທີ່ສໍາຄັນເຂົ້າໃນການ​ເສີມຂະຫຍາຍ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມືທີ່​ມີ​ມາ​ແຕ່​ຍາວ​ນານນັ້ນ ​ມີ​ຄວາມ​ໝັ້ນຄົງໜັກແໜ້ນ ແລະ ມີໝາກຜົນຕົວຈິງຍິ່ງໆຂຶ້ນ.

ໂອກາດ​ດຽວ​ກັນ ​ທັງ​ສອງ​ຝ່າຍກໍ່​ໄດ້​ສະແດງ​ຄວາມມຸ້ງ​ຫວັງ​ທີ່​ຈະ​ສືບຕໍ່​ເສີມ​ສ້າງ ແລະ ຮັດ​ແໜ້ນ​ສາຍພົວພັນ​ຮ່ວມ​ມື​ທີ່​ດີ​ໃນ​ປັດຈຸບັນ ລະຫວ່າງ​ ສອງ​ປະເທດ ​ໃຫ້​ເຕີບ​ໃຫຍ່ຂະຫຍາຍຕົວ​ຂຶ້ນສູ່ລະດັບໃໝ່​ໃນຕໍ່ໜ້າ ແລະ ​ພິທີສະເຫຼີມສະຫຼອງ​ໃນ​ຄັ້ງ​ນີ້ ແມ່ນ​ເຕັມ​ໄປ​ດ້ວຍ​ບັນຍາ​ກາດ​ແຫ່ງ​ໄມຕີຈິດມິດຕະພາບ​ອັນ​ອົບອຸ່ນ.

ໃນຕອນເຊົ້້າຂອງວັນດຽວກັນ, ສອງຝ່າຍ ກໍ່ໄດ້ຈັດພິທີປູກຕົ້ນໄມ້ມິດຕະພາບ ລາວ-ຮົງກາຣີ ເພື່ອລະນຶກເຖິງວັນທີ່ມີຄວາມໝາຍຄວາມສຳຄັນທາງປະຫວັດສາດ ຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຮົງກາຣີ ທີ່ ສວນສາທາລະນະເຈົ້າອານຸວົງ, ໂດຍການເຂົ້າຮ່ວມຂອງ ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫຼວງວຽງຈັນ, ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ຊານດໍ້     ຊີໂພສ, ເອກອັກຄະລັດຖະທູດ ແຫ່ງ ຮົງກາຣີ ປະຈໍາ ສປປ ລາວ ພ້ອມດ້ວຍແຂກຖືກເຊີນຈໍານວນໜຶ່ງ ເເລະ ໃນຕອນບ່າຍ ກໍໄດ້ຈັດງານເເຂ່ງຂັນກິລາມິດຕະພາບ (ຕີດອກປີກໄກ່) ທີ່ເດີນກິລາໃນຮົ່ມບຶງຂະຫຍອງ ໃຫ້ກຽດເຂົ້າຮ່ວມໂດຍ ທ່ານຮອງລັດຖະມົນຕີກະຊວງການຕ່າງປະເທດ ບຸນເຫຼືອ ພັນດານຸວົງ ເເລະ ທ່ານທູດຮົງກາຣີ ທີ່ໄດ້ນຳທີມນັກກິລາທັງຝ່າຍ ເເຂ່ງຂັນຢ່າງຟົດຟື້ນ, ພ້ອມທັງຖືໂອກາດນີ້ຈັດພິທີມອບ-ຮັບໂຕະກິລາ Teq Ball ຈາກຝ່າຍຮົງກາຣີ ອີກດ້ວຍ .