ໃນວັນທີ 18 ທັນວາ 2023, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດຂອງປະຊາຄົມອາຊີເພື່ອຫຼຸດຜ່ອນການປ່ອຍອາຍພິດໃຫ້ເຫຼືອສູນ ທີ່ ໂຕກຽວ, ຍີ່ປຸ່ນ, ຊຶ່ງໄດ້ຈັດຂຶ້ນໃນໂອກາດກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ-ຍີ່ປຸ່ນ ຄົບຮອບ 50 ປີ.
ບັນດາຜູ້ນໍາທີ່ເຂົ້າຮ່ວມກອງປະຊຸມສຸດຍອດຂອງປະຊາຄົມອາຊີເພື່ອຫຼຸດຜ່ອນການປ່ອຍອາຍພິດໃຫ້ເຫຼືອສູນ ໄດ້ສະແດງຄວາມຊົມເຊີຍຕໍ່ ຍີ່ປຸ່ນ ທີ່ໄດ້ລິເລີ່ມຈັດກອງປະຊຸມຂັ້ນຜູ້ນໍາ ຄັ້ງທໍາອິດ ເພື່ອປຶກສາຫາລືໃນວາລະທີ່ສໍາຄັນໃນປັດຈຸບັນ ກໍຄືການຫຼຸດຜ່ອນການປ່ອຍອາຍພິດ ແລະ ການສົ່ງເສີມການພັດທະນາແບບຍືນຍົງ. ພ້ອມນີ້, ບັນດາຜູ້ນໍາໄດ້ສະແດງຄວາມໝາຍໝັ້ນ ໃນການຮັດແໜ້ນການຮ່ວມມືໃນຕໍ່ໜ້າ ໂດຍສະເພາະທາງດ້ານການຫັນປ່ຽນໄປສູ່ການນໍາໃຊ້ພະລັງງານສະອາດ ແລະ ການສຶກສາຮ່ວມກັນດ້ານພະລັງງານທາງເລືອກ ທີ່ເປັນມິດຕໍ່ສິ່ງແວດລ້ອມ ກໍຄືການຫຼຸດຜ່ອນການປ່ອຍອາຍພິດໃຫ້ເຫຼືອສູນໃນອະນາຄົດ. ໃນໂອກາດນີ້, ກອງປະຊຸມ ໄດ້ຮັບຮອງເອົາຖະແຫຼງການຮ່ວມຜູ້ນໍາອາແຊັກ ເພື່ອເປັນພື້ນຖານສໍາລັບການຮ່ວມມືເພື່ອຫຼຸດຜ່ອນອາຍພິດໃຫ້ເຫຼືອສູນ ແລະ ການບັນລຸການພັດທະນາແບບຍືນຍົງໃນອະນາຄົດ.
ໃນວັນດຽວກັນ, ທ່ານນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ເຂົ້າຮ່ວມອາຫານທ່ຽງແບບເຮັດວຽກລະຫວ່າງຜູ້ນໍາອາຊຽນ-ຍີ່ປຸ່ນ ຮ່ວມກັບອົງການເສດຖະກິດຂອງຍີ່ປຸ່ນ. ຫຼັງຈາກນັ້ນ, ທ່ານ ນາຍົກລັດຖະມົນຕີ ຍັງໄດ້ເປັນກຽດກ່າວເປີດກອງປະຊຸຸມສົ່ງເສີມການລົງທຶນຂອງ ສປປ ລາວ.
ໃນໂອກາດເຂົ້າຮ່ວມກອງປະຊຸມສຸດຍອດສະເຫຼີມສະຫຼອງການພົວພັນຮ່ວມມືອາຊຽນ-ຍີ່ປຸ່ນ ຄົບຮອບ 50 ປີ ຄັ້ງນີ້, ທ່ານນາຍົກລັດຖະມົນຕີ ສອນໄຊ ສີພັນດອນ ຮ່ວມກັບບັນດາຜູ້ນໍາອາຊຽນ ໄດ້ເຂົ້າຢ້ຽມຂໍ່ານັບພະເຈົ້າຈັກກະພັດ ແລະ ພະຣາຊີນີ ຂອງຍີ່ປຸ່ນ ທີ່ ພະລາດຊະວັງພະເຈົ້າຈັກກະພັດ ທີ່ ໂຕກຽວ.