ໃນຕອນບ່າຍຂອງວັນທີ 17 ມັງກອນ 2024, ທີ່ ກະຊວງປອງກັນປະເທດ, ສະຫາຍ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະ ໄດ້ນຳເອົາກະຕ່າດອກໄມ້ໄປອວຍພອນ ການນຳກະຊວງປ້ອງກັນປະເທດ, ເຊິ່ງຕາງໜ້າຕ້ອນຮັບໂດຍ ສະຫາຍ ພົນໂທ ປອ ທອງລອຍ ສິລິວົງ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/1/1949 - 20/1/2024) ທີ່ໃກ້ໝູນວຽນມາຮອດນີ້.

ໃນໂອກາດທີ່ມີຄວາມໝາຍສຳຄັນນີ້, ສະຫາຍ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານ ແລະ ໄຊຊະນະອັນໃຫຍ່ຫຼວງ ທີ່ກອງທັບປະຊາຊົນປະຕິວັດລາວ ຍາດມາໄດ້ຕະຫຼອດໄລຍະ 75 ປີ ຜ່ານມາພາຍໃຕ້ການຊີ້ນຳ-ນຳພາ ຢ່າງໃກ້ຊິດຕິດແທດຈາກ ບັນດາສະຫາຍການນຳກະຊວງປ້ອງກັນປະເທດ ດ້ວຍຄວາມເອົາໃຈໃສ່ ແລະ ເສຍສະຫຼະສູງ ຈົນສາມາດຍາດໄດ້ໄຊຊະນະໃນພາລະກິດປົດປ່ອຍຊາດໃນອະດີດ ແລະ ສືບຕໍ່ ພາລະກິດສ້າງສາ ແລະ ພັດທະນະປະເທດຊາດ ຢ່າງມີຜົນສຳເລັດສູງ. ໃນໂອກາດດຽວກັນ, ສະຫາຍ ສະເຫຼີມໄຊ ກົມມະສິດ ກໍ່ໄດ້ອວຍພອນມາຍັງ ບັນດາສະຫາຍຄະນະພັກ, ຄະນະນຳກະຊວງປ້ອງກັນປະເທດ ຕະຫຼອດຮອດພະນັກງານ-ນັກຮົບທົ່ວກອງທັບ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ວຽກງານທີ່ໄດ້ຮັບການມອບໝາຍຈາກຂັ້ນເທິງ, ສືບຕໍ່ເອົາໃຈໃສ່ຊີ້ນຳ-ນຳພາ ບັນດາອ້າຍນ້ອງທະຫານ ໃຫ້ມີຜົນສຳເລັດອັນໃຫມ່ ແລະ ຍິ່ງໃຫຍ່ກວ່າເກົ່າ.

ໃນຂະນະດຽວກັນ, ສະຫາຍ ພົນໂທ ປອ ທອງລອຍ ສິລິວົງ ກໍໄດ້ຕາງໜ້າໃຫ້ຄະນະພັກ, ຄະນະນຳກະຊວງ, ນາຍ ແລະ ພົນທະຫານທົ່ວກອງທັບ ກ່າວສະແດງຄວາມຂອບໃຈມາຍັງ ສະຫາຍການນຳກະຊວງການຕ່າງປະເທດ ທີ່ເຫັນໄດ້ເຖິງ ຄວາມໝາຍຄວາມສຳຄັນຂອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ອວຍພອນໄຊໃຫ້ ສະຫາຍ ສະຫາຍ ສະເຫຼີມໄຊ ກົມມະສິດ ພ້ອມດ້ວຍຄະນະ ຈົ່ງມີຄວາມຜາສຸກ, ສຸຂະພາບແຂງແຮງ, ສືບຕໍ່ຊີ້ນຳ-ນຳພາ ບັນດາອ້າຍນ້ອງພະນັກງານກະຊວງການຕ່າງປະເທດ ໃຫ້ມີຜົນສຳເລັດອັນໃຫມ່ຍິ່ງໃຫຍ່ກວ່າເກົ່າ ໂດຍສະເພາະວຽກງານການທູດ ແລະ ການເປັນປະທານອາຊຽນປີ 2024 ຂອງ ສປປ ລາວ ໃຫ້ມີຜົນສຳເລັດຕາມຄາດໝາຍທີ່ວາງໄວ້.