ໂດຍຕອບສະໜອງຕາມຄຳເຊີນຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພະນະທ່ານ ອູ ຕິນ ຈໍ,ປະທານາທິບໍດີ ແຫ່ງ ສາທາລະນະລັດ ສະຫະພາບ ມຽນມາ ພ້ອມ​ດ້ວຍພັນລະຍາ ​​ແລະ ຄະ​ນະ ໄດ້ເດີນທາງມາຢ້ຽມຢາມທາງລັດຖະກິດ ທີ່ ສປປ ລາວ ໃນວັນທີ 6 ພຶດສະພາ 2016, ເປັນປະເທດທໍາອິດພາຍຫລັງເຂົ້າດຳລົງຕຳແໜ່ງໃໝ່ ແລະ ເພື່ອເສີມຂະຫຍາຍສາຍພົວພັນມິດຕະພາບ ແລະ ຮັດແໜ້ນການຮ່ວມມືທີ່ດີ ລະຫ່ວາງ ສອງປະເທດ ລາວ ແລະ ມຽນມາ.

​ພິທີຕ້ອນຮັບຢ່າງສົມກຽດ ແລະ ການພົບປະສອງຝ່າຍຢ່າງເປັນທາງການ ໄດ້ຈັດຂຶ້ນໃນຕອນ​ເຊົ້າຂອງວັນທີ 6 ພຶດສະພາ 2016, ທີ່ ສຳນັກງານປະທານປະເທດ. ໃນການພົບປະ, ສອງຝ່າຍໄດ້ສະແດງຄວາມຍິນດີ ແລະ ຕີລາຄາສູງຕໍ່ໝາກຜົນ ຂອງການພົວພັນ ແລະ ການຮ່ວມມືອັນດີງາມ ລະຫວ່າງສອງປະເທດ ໃນໄລຍະຜ່ານມາ. ພ້ອມດຽວກັນນັ້ນ, ສອງຝ່າຍ ຍັງໄດ້ປຶກສາຫາລື ແລະ ແລກປ່ຽນ ຄວາມຄິດ​ຄວາມເຫັນຮ່ວມກັນ ກ່ຽວກັບ ບັນຫາພາກພື້ນ ແລະ ສາກົນ ທີ່ມີຄວາມສົນໃຈແລະ ໄດ້ຕົກລົງເຫັນດີ ເພີ່ມທະວີ ແລະ ຜັນຂະຫຍາຍຜົນການຕົກລົງ ຂອງຄະນະກຳມາທິການຮ່ວມມື ລາວ-ມຽນມາ ຄັ້ງທີ 11 ໃຫ້​ປະ​ກົດ​ຜົນ​ເປັນ​ຈິງແລະຊອກຊ່ອງທາງຮ່ວມກັນໃນການສົ່ງເສີມການຄ້າ, ການລົງທືນ, ການສຶກສາ, ​ການທ່ອງ​ທ່ຽວ ແລະ ສາທາລະນະສຸກ ກໍຄື ການພົວພັນຮ່ວມມືລະຫວ່າງ ສອງປະເທດ ທັງໃນຂອບສອງຝ່າຍ ແລະ ຫລາຍຝ່າຍໃຫ້ນັບມື້ນັບກວ້າງຂວາງ ແລະ ເກີດດອກອອກຜົນຍິ່ງໆຂຶ້ນບົນພື້ນຖານສອງຝ່າຍຕ່າງມີຜົນປະໂຫຍດ.