ໃນຕອນເຊົ້າຂອງວັນທີ 23 ພຶດສະພາ 2016, ທີ່ ກະຊວງການຕ່າງປະເທດ ໄດ້ຈັດບັ້ນເຊື່ອມຊຶມມະຕິກອງປະຊຸມໃຫຍ່ ຄັ້ງທີ X ຂອງພັກ ຊຸດທີ I ໃຫ້ແກ່ບັນດາພະນັກງານຫຼັກແຫຼ່ງ-ນຳພາຄຸ້ມຄອງຂອງກະຊວງການຕ່າງປະເທດຂຶ້ນ, ໂດຍການໃຫ້ກຽດເຂົ້າຮ່ວມເປັນປະທານ ແລະ ເຜີຍແຜ່ຂອງ ສະຫາຍ ສະເຫຼີມໄຊ ກົມມະສິດ, ກຳມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງການຕ່າງປະເທດ; ມີບັນດາຮອງຫົວໜ້າກົມ, ຄະນະພະແນກ, ປະທານ ແລະ ຮອງປະທານ 3 ອົງການຈັດຕັ້ງມະຫາຊົນ ຂອງກະຊວງການຕ່າງປະເທດ ເຂົ້າຮ່ວມຈຳນວນ 228 ສະຫາຍ, ບັ້ນເຊື່ອມຊຶມດັ່ງກ່າວຈະໄດ້ດຳເນີນໄປເປັນເວລາ 3 ວັນ, ເລີ່ມແຕ່ວັນທີ 23-25 ພຶດສະພາ 2016.

ຈຸດປະສົງກໍ່ເພື່ອເປັນການຜັນຂະຫຍາຍເນື້ອໃນມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ VIII ຂອງລັດ ໃຫ້ປະກົດຜົນເປັນຈິງ ແລະ ແນໃສ່ບຸກທະລຸທາງດ້ານແນວຄິດຈິນຕະນາການ, ຍົກສູງຫຼັກໝັ້ນການເມືອງ ໃຫ້ແກ່ບັນດາສະຫາຍສະມາຊິກພັກ, ພະນັກງານຫຼັກແຫຼ່ງ-ນຳພາຄຸ້ມຄອງ ພາຍໃນກະຊວງການຕ່າງປະເທດ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ແນວທາງການເມືອງ ແລະ ແຜນນະໂຍບາຍຂອງພັກ ທີ່ໄດ້ກຳນົດໄວ້ໃນກອງປະຊຸມໃຫຍ່ ຄັ້ງທີ X ຂອງພັກ. ໃນໂອກາດດັ່ງກ່າວ, ທ່ານປະທານ ໄດ້ຍົກໃຫ້ເຫັນເຖິງບົດບາດການນຳຂອງພັກ, ແນວທາງການປ່ຽນໃໝ່ຮອບດ້ານ ແລະ ມີຫຼັກການຂອງພັກ ແລະ ໃຫ້ກຽດເຜີຍແຜ່ເອກະສານຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ໃນໄລຍະ 5 ປີຜ່ານມາ ພາຍໃຕ້ການນຳພາອັນສະຫຼາດສ່ອງໃສຂອງພັກ ປະຊາຊົນ ປະຕິວັດລາວ, ພ້ອມກັນນັ້ນ ກໍ່ໄດ້ເຊື່ອມຊຶມເອກະສານ ກ່ຽວກັບ ບັນດາຄາດໝາຍໃຫຍ່ທີ່ກອງປະຊຸມໃຫຍ່ ຄັ້ງທີ X ຂອງພັກວາງອອກ; ສຳລັບໄລຍະ ປີ 2020, 2025 ແລະ 2030, ບັນດາໜ້າວຽກງານຈຸດສຸມໃນແຕ່ລະຂົງເຂດທີ່ຕ້ອງຈັດຕັ້ງປະຕິດບັດໃນຊຸມປີຕໍ່ໜ້າ 2016-2020 ແລະ ພ້ອມກັນຄົ້ນຄວ້າປະກອບຄຳຄິດຄຳເຫັນຕໍ່ບັນດາເນື້ອໃນເອກະສານດັ່ງກ່າວ.