ໃນວັນທີ 03 ພະຈິກ 2016, ທີ່ ບ້ານພັກທູດກູບາ, ໄດ້ຈັດພິທີສະເຫລີມສະຫລອງ ວັນສ້າງຕັ້ງສາຍພົວພັນທາງການທູດ ລາວ-ກູບາ ຄົບຮອບ 42 ປີ, ໃຫ້ກຽດເຂົ້າຮ່ວມຂອງ ທ່ານ ນາງ ຄຳເຜົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ນາງ Enna Viant Valdes, ອຸປະທູດກູບາ ປະຈຳ ສປປ ລາວ ພ້ອມດ້ວຍແຂກທີ່ຖືກເຊີນເຂົ້າຮ່ວມ.
ໃນໂອກາດດັ່ງກ່າວ, ທ່ານ ນາງ Enna Viant Valdes ໄດ້ກ່າວວ່າ: ການສະເຫລີມສະຫລອງວັນສ້າງຕັ້ງສາຍພົວພັນທາງການທູດ ລາວ-ກູບາ ຄົບຮອບ 42 ປີ ແມ່ນມີຄວາມໝາຍຄວາມສຳຄັນທາງປະຫວັດສາດ ແຫ່ງ ການພົວພັນ ແລະ ຮ່ວມມື ທີ່ີມີມູນເຊື້ອ ລະຫວ່າງ ສອງພັກສອງລັດຖະບານ ກໍຄືປະຊາຊົນສອງຊາດ ລາວ-ກູບາ ທີ່ໄດ້ຮັບການປົກປັກຮັກສາ ເພີ່ມພູນຄູນສ້າງນັບຕັ້ງແຕ່ມື້ສ້າງຕັ້ງສາຍພົວພັນການທູດຮ່ວມກັນ ເວລາໃດກໍໄດ້ຮັບການສະໜັບສະໜູນຊ່ວຍເຫລືອເຊິ່ງກັນ ແລະ ກັນ ໃນທຸກດ້ານ ໃນເວທີສາກົນ.
ພ້ອມດຽວກັນ, ທ່ານ ນາງ ຄຳເຜົາ ເອີນທະວັນ ກໍໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ມູນເຊື້ອອັນດີງາມ ຂອງການພົວພັນຮ່ວມມືຊ່ວຍເຫລືອເຊິ່ງກັນ ແລະ ກັນ ດັ່ງກ່າວ, ເພື່ອແນ່ໃສ່ໃຫ້ບັນດາພະນັກງານພາຍໃນ ກະຊວງການຕ່າງປະເທດ, ບັນດາກະຊວງ ແລະ ຂະແໜງການອ້ອມຂ້າງ ກໍາແໜ້ນແນວທາງການຕ່າງປະເທດ ຂອງພັກ-ລັດຖະບານ ໃນການປະກອບສ່ວນຮັດແໜ້ນ ແລະ ເພີ່ມທະວີການພົວພັນຮ່ວມມື ໃນດ້ານວຽກງານຕ່າງໆ ເພື່ອນຳເອົາຜົນປະໂຫຍດ ມາສູ່ປະຊາຊົນສອງຊາດ ກໍຄືສ້າງສັນບັນຍາກາດ ແຫ່ງສັນຕິພາບ, ມິດຕະພາບ ແລະ ການຮ່ວມມື ທັງໃນພາກພື້ນ ແລະ ສາກົນ.
News From KPL