ໃນວັນທີ 29 ມີນາ 2024, 3 ອົງການຈັດຕັ້ງມະຫາຊົນ (ແມ່ຍິງ, ຊາວໜຸ່ມ ແລະ ກຳມະບານ) ຂອງກະຊວງການຕ່າງປະເທດ ໄດ້ຈັດກິດຈະກຳແຂ່ງຂັນກິລາເປຕັງ ສູນການຮ່ວມມືສາກົນ ແລະ ຝຶກອົບຮົມ (ICTC) ເພື່ອເປັນການສ້າງຂະບວນການຊົມເຊີຍ ແລະ ສະເຫຼີມສະຫຼອງວັນສຳຄັນຕ່າງໆ ເປັນຕົ້ນ: ວັນແມ່ຍິງສາກົນ ຄົບຮອບ 114 ປີ (8 ມີນາ 1910-8 ມີນາ 2024) ແລະ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 69 ປີ (ວັນທີ 22 ມີນາ 1955 - 22 ມີນາ 2024), ພ້ອມທັງ ເປັນການກະກຽມສ້າງກິດຈະກຳເພື່ອຂໍ່ານັບຮັບຕ້ອນກອງປະຊຸມ 3 ຂັ້ນ ຂອງ 3 ອົງການຈັດຕັ້ງ ແມ່ຍິງ, ຊາວໜຸ່ມ ແລະ ກໍາມະບານ ກໍຄື ກອງປະຊຸມໃຫຍ່ 3 ຂັ້ນ ຂອງອົງຄະນະພັກກະຊວງການຕ່າງປະເທດ.
ໃນພິທີດັ່ງກ່າວ, ທ່ານ ທອງຜ່ານ ສະຫວັນເພັດ, ຄະນະປະຈຳພັກກະຊວງ, ຮອງລັດຖະມົນຕີກະຊວງການຕ່າງປະເທດ ໄດ້ໃຫ້ກຽດມີຄຳເຫັນກ່າວເປີດງານແຂ່ງຂັນ, ໂດຍໄດ້ສະແດງຄວາມຊົມເຊີຍຕໍ່ 3 ອົງການຈັດຕັ້ງມະຫາຊົນທີ່ໄດ້ຈັດກິດຈະກຳແຂ່ງຂັນກິລາໃນຄັ້ງນີ້ ເຊິ່ງນອກຈາກຈະເປັນການສ້າງຂະບວນການ ເພື່ອສະເຫຼີມສະຫຼອງ ແລະ ຕ້ອນຮັບວັນສຳຄັນຕ່າງໆແລ້ວ ຍັງເປັນການຮັດແໜ້ນ ແລະ ເຕົ້າໂຮມຄວາມສາມັກຄີ ລະຫວ່າງ ສະມາຊິກຂອງ 3 ອົງການຕັ້ງມະຫາຊົນ ກໍຄື ພະນັກງານພາຍໃນກະຊວງການຕ່າງປະເທດ.
ກິດຈະກຳກິລາເປຕັ່ງຄັ້ງນີ້ ໄດ້ດຳເນີນໄປຢ່າງມີຄວາມໝາຍສຳຄັນ, ເປັນຂະບວນຟົດຟື້ນ ແລະ ສຳເລັດລົງ ດ້ວຍຜົນສຳເລັດອັນຈົບງາມ.
..................................................