ໃນວັນທີ 27 ກຸມພາ 2018 ທີ່ ເມືອງວັງວຽງ, ແຂວງວຽງຈັນ, ໄດ້ມີການຈັດກອງປະຊຸມສໍາມະນາ ເຜີຍແຜ່ ຜົນການຮ່ວມມືພາກພືື້ນ ແລະ ສາກົນ ຂອງ ສປປ ລາວ ແລະ ເຜີຍແຜ່ຜົນຂອງກອງປະຊຸມປຶກສາຫາລືຂັ້ນສູງວ່າດ້ວຍການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ຄັ້ງທີ 2, ຊຶ່ງໃຫ້ກຽດເປັນປະທານຮ່ວມໂດຍ ທ່ານ ດາວເຮືອງ ນັນທະວົງ, ຄະນະປະຈຳພັກແຂວງ, ຮອງເຈົ້າແຂວງ ແຂວງວຽງຈັນ ແລະ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ພ້ອມນີ້ຍັງມີຜູ້ເຂົ້າຮ່ວມຈາກບັນດາກະຊວງ/ຂະແໜງການຕ່າງໆ ແລະ ອໍານາດການປົກຄອງທ້ອງຖິ່ນຂອງ 7 ແຂວງ (ແຂວງ ຫຼວງພະບາງ, ໄຊຍະບູລີ, ຫົວພັນ, ຊຽງຂວາງ, ວຽງຈັນ, ບໍລິຄໍາໄຊ ແລະ ນະຄອນຫຼວງວຽງຈັນ) ລວມທັງໝົດ 230 ທ່ານ.
ກອງປະຊຸມສຳມະນາໃນຄັ້ງນີ້ ແມ່ນໄດ້ເຜີຍແຜ່ຜົນສຳເລັດຂອງກອງປະຊຸມເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ໂດຍພະນະທ່ານ ບຸນຍັງ ວໍລະຈິດ,ປະທານປະເທດ ແຫ່ງ ສປປ ລາວ ໄດ້ເຂົ້າຮ່ວມໃນຕົ້ນເດືອນ ພຶດສະພາ 2017 ທີ່ຜ່ານມາ ເພື່ອໃຫ້ບັນດາພະນັກງານຈາກກະຊວງ/ຂະແໜງການຕ່າງໆ ແລະ ອຳນາດການປົກຄອງທ້ອງຖີ່ນຂອງ 7 ແຂວງ ໄດ້ຮັບຟັງ ແລະ ເຂົ້າໃຈແຈ້ງຕື່ມ ຕໍ່ແນວທາງການເຊື່ອມໂຍງພາກພື້ນ ແລະ ສາກົນຂອງ ສປປ ລາວ. ພ້ອມດຽວກັນນັ້ນ, ກໍ່ຍັງໄດ້ມີການແລກປ່ຽນຄໍາຄິດຄໍາເຫັນ ຕໍ່ກັບ ກາລະໂອກາດ ແລະ ສິ່ງທ້າທາຍຂອງການເຊື່ອມໂຍງເຂົ້າໃນ ຍຸດທະສາດ “ໜຶ່ງແລວ ໜຶ່ງເສັ້ນທາງ” ຂອງ ສປ ຈີນ. ນອກຈາກນີ້, ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ຍັງໄດ້ແຈ້ງສະພາບການທີ່ພົ້ນເດັ່ນຂອງພາກພື້ນ ແລະ ສາກົນ ໃນປະຈຸບັນ ທີ່ມີການປ່ຽນແປງຢ່າງວ່ອງໄວ ລວມທັງສິ່ງທ້າທ້າຍຂອງ ສປປ ລາວ ໃນການເຂົ້າຮ່ວມຂະບວນວິວັດແຫ່ງການເຊື່ອມໂຍງກັບພາກພື້ນ ແລະ ສາກົນໃນອະນາຄົດ.
ກອງປະຊຸມເວທີປຶກສາຫາລືຂັ້ນສູງ ວ່າດ້ວຍການຮ່ວມມືສາກົນ “ໜຶ່ງແລວ ໜຶ່ງເສັ້ນທາງ” ຄັ້ງທີ 3 ຈະຈັດຂື້ນໃນເດືອນ ເມສາ 2018.