ໃນວັນທີ 26 ກຸມພາ - 02 ມີນາ 2018 ທີ່ຜ່ານມາ, ກະຊວງການຕ່າງປະເທດ ໄດ້ຈັດຕັ້ງກອງປະຊຸມປຶກສາຫາລືຮ່າງກົດໝາຍ ວ່າດ້ວຍ ສຳນັກງານຜູ້ຕາງໜ້າ ແຫ່ງ ສປປ ລາວ ຢູ່ຕ່າງປະເທດ, ຢູ່ທ່າລາດ, ເມືອງແກ້ວອຸດົມ, ແຂວງວຽງຈັນ, ພາຍໃຕ້ການເປັນປະທານຂອງ ທ່ານ ນາງ ຄຳເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ, ໂດຍມີການເຂົ້າຮ່ວມຂອງຄະນະຮັບຜິດຊອບຊີ້ນຳລວມໃນການສ້າງກົດໝາຍດັ່ງກ່າວ, ຜູ້ຕາງໜ້າຈາກສະພາແຫ່ງຊາດ, ກະຊວງການຕ່າງປະເທດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງພາຍໃນ, ຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະພົວພັນຕ່າງປະເທດສູນກາງພັກ, ອົງການກວດກາລັດຖະບານ ແລະ ຂະແໜງການອື່ນທີ່ກ່ຽວຂ້ອງ ລວມປະມານ 80 ກວ່າທ່ານ.
ການຈັດກອງປະຊຸມຄັ້ງນີ້ ແມ່ນເພື່ອລະດົມຄໍາຄິດເຫັນໃສ່ຮ່າງກົດໝາຍດັ່ງກ່າວໃຫ້ມີເນື້ອໃນລະອຽດ, ຈະແຈ້ງ, ສອດຄ່ອງກັບສະພາບຄວາມເປັນຈິງຂອງ ສປປ ລາວ, ຄວາມຮຽກຮ້ອງຕ້ອງການໃນການພັດທະນາວຽກງານການທູດລາວ, ຫຼັກການ ແລະ ພາກປະຕິບັດຂອງສາກົນ ກ່ອນຈະນໍາໄປທາບທາມຄໍາຄິດເຫັນນໍາບັນດາອົງການຂັ້ນສູນກາງ, ອົງການປົກຄອງຂັ້ນແຂວງ, ສະພາປະຊາຊົນຂັ້ນແຂວງໃນຂອບເຂດທົ່ວປະເທດ ພ້ອມທັງເອົາລົງໃນຈົດໝາຍເຫດທາງລັດຖະການຢູ່ກະຊວງຍຸຕິທຳ ແລະ ເວບໄຊຂອງກະຊວງການຕ່າງປະເທດ ເພື່ອທາບທາມຄໍາຄິດເຫັນຂອງສາທາລະນະຊົນຢ່າງກ້ວາງຂວາງ. ກະຊວງການຕ່າງປະເທດ ມີແຜນສະເໜີຮ່າງກົດໝາຍສະບັບນີ້ ເຂົ້າພິຈາລະນາຢູ່ກອງປະຊຸມລັດຖະບານໃນເດືອນ ມິຖຸນາ ຫຼື ກໍລະກົດ 2018 ແລະ ນໍາເຂົ້າພິຈາລະນາຢູ່ກອງປະຊຸມສະພາແຫ່ງຊາດ ໃນເດືອນ ຕຸລາ 2018. ກົດໝາຍສະບັບນີ້ ເມືອຖືກຮັບຮອງແລ້ວ ຈະເປັນກົດໝາຍສຳຄັນສຳລັບການທູດລາວ ຊຶ່ງຈະເປັນອີກບາດກ້າວໜຶ່ງໃນການພັດທະນາລະບົບນິຕິກຳຂອງຂະແໜງການຕ່າງປະເທດ.
ກົດໝາຍສະບັບນີ້ຈະກຳນົດຫຼັກການ, ລະບຽບການ ແລະ ມາດຕະການ ກ່ຽວກັບ ການຈັດຕັ້ງ ແລະ ການເຄື່ອນໄຫວຂອງສຳນັກງານຜູ້ຕາງໜ້າ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຢູ່ຕ່າງປະເທດ ເຊິ່ງລວມມີສະຖານເອກອັກຄະລັດຖະທູດ, ສຳນັກງານຜູ້ຕາງໜ້າຖາວອນ ປະຈຳ ອົງການຈັດຕັ້ງສາກົນ, ສະຖານກົງສຸນໃຫຍ່ຂອງ ສປປ ລາວ ເພື່ອຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃຫ້ມີປະສິດທິພາບ ແລະ ປະສິດທິຜົນສູງ.