ໃນວັນທີ 07 ມີນາ 2018, ທີ່ ສູນ ICTC ໄດ້ມີພິທີປິດຊຸດຝຶກອົບຮົມ ວຽກງານການຕ່າງປະເທດ ສໍາລັບພະນັກງານກະຊວງການຕ່າງປະເທດ, ບັນດາກະຊວງ-ຂະແໜງການອ້ອມຂ້າງສູນກາງ ແລະ ທ້ອງຖິ່ນ ຊຸດທີ I ຂື້ນ,ໂດຍການໃຫ້ກຽດເປັນປະທານ ຂອງ ທ່ານ ແສງເພັດ ຮຸ່ງບຸນຍວງ, ຮອງເລຂາຄະນະພັກ, ຮອງລັດຖະມົນຕີກະຊວງການຕ່າງປະເທດ ແລະ ການເຂົ້າຮ່ວມຂອງຫົວໜ້າກົມ, ຮອງກົມ, ນັກວິທະຍາກອນ, ແຂກຖືກເຊີນຈາກກະຊວງການຕ່າງປະເທດ ແລະ ຜູ້ເຂົ້າຮັບການຝຶກອົບຮົມລວມທັງໝົດ 100 ກວ່າທ່ານ, ການຝຶກອົບຮົມ ແມ່ນເປັນການຈັດຕັ້ງປະຕິບັດມະຕິຂອງຄະນະພັກກະຊວງການຕ່າງປະເທດ ແນໃສ່ຜັນຂະຫຍາຍຜົນຂອງກອງປະຊຸມວຽກງານການຕ່າງປະເທດ ຄັ້ງທີ 13,ກ່ຽວກັບການບໍາລຸງກໍ່ສ້າງພະນັກງານ, ເພື່ອເພີ່ມຄວາມຮູ້ໃຫ້ເຂົາເຈົ້າມີຄວາມຊໍານານງານ ແລະ ມີຄວາມສາມາດດ້ານວິຊາສະເພາະຫຼາຍຂຶ້ນກວ່າເກົ່າ, ເຊິ່ງຊຸດຝຶກອົບຮົມໄດ້ດຳເນີນໄປເປັນເວລາ7ວັນ, ນັບແຕ່ວັນທີ26 ກຸມພາ2018 ເປັນຕົ້ນມາ, ເຊີ່ງມີຜູ້ເຂົ້າຮັບການຝຶກອົບຮົມ ທີ່ມາຈາກກະຊວງ,ຂະແໜງການອ້ອມຂ້າງສູນກາງແລະທ້ອງຖີ່ນທົ່ວປະເທດທັງໝົດ53 ທ່ານ, ຍິງ25 ທ່ານ, ຈາກ 33 ພາກສ່ວນ.
ໃນພິທີ, ທ່ານ ທ່ຽງ ບຸບຜາ, ຫົວໜ້າສະຖາບັນການຕ່າງປະເທດ, ໄດ້ຂື້ນກ່າວສະຫຼຸບລາຍງານຜົນສຳເລັດຂອງການຝຶກອົບຮົມຕະຫຼອດໄລຍະ 7 ວັນທີ່ຜ່ານມາ, ເຊິ່ງເປັນໂອກາດອັນດີທີ່ພະນັກງານທຸກທ່ານໄດ້ມີໂອກາດຮຽນຮູ້ວຽກງານທາງດ້ານທິດສະດີ, ປະສົບການຕົວຈີງ ແລະ ວຽກງານວິຊາສະເພາະການຕ່າງປະເທດ ໃນກອບການຮ່ວມມືສອງຝ່າຍ-ຫຼາຍຝ່າຍທີ່ຈຳເປັນເຊັ່ນ: ປະຫວັດສາດການພົວພັນການທູດ ແລະ ແນວທາງການຕ່າງປະເທດ ຂອງພັກປະຊາຊົນປະຕິວັດລາວ; ວຽກອາຊຽນ; ການພົວພັນຄົນເຊື້ອຊາດລາວຢູ່ຕ່າງປະເທດ; ສະພາບການພາກພື້ນ ແລະ ສາກົນ; ວຽກສິດທິມະນຸດ-ປະຊາທິປະໄຕ, ວຽກຊາຍແດນ; ພິທີການ, ກົງສຸນ ແລະ ອື່ນໆ.ນອກນັ້ນ, ການເຂົ້າຮັບຝຶກອົບຮົມຂອງພະນັກງານທີ່ເຮັດວຽກພົວພັນຕ່າງປະເທດຂອງກະຊວງ-ຂະແໜງການໃນທົ່ວປະເທດຄັ້ງນີ້, ເຮັດໃຫ້ເຂົາເຈົ້າໄດ້ມີໂອກາດພົບປະແລກປ່ຽນບົດຮຽນປະສົບການຮ່ວມກັນ, ເພື່ອເຮັດໃຫ້ຂອດປະສານງານພາຍໃນມີອັນຄ່ອງຕົວຂຶ້ນຕື່ມ.
ໃນຕອນທ້າຍຂອງພິທີ, ທ່ານ ແສງເພັດ ຮຸ່ງບຸນຍວງ, ໄດ້ໃຫ້ກຽດໂອ້ລົມ, ເຊິ່ງທ່ານໄດ້ສະແດງຄວາມຊົມເຊີຍຕໍ່ຜົນສຳເລັດການຈັດຕັ້ງຊຸດຝຶກອົບຮົມ ແລະ ໃຫ້ທິດຊີ້ນຳແກ່ຜູ້ເຂົ້າຮັບການຝຶກອົບຮົມ ຈົ່ງເອົາໃຈໃສ່ ແລະ ສືບຕໍ່ນຳເອົາຄວາມຮູ້ທີ່ໄດ້ຈາກການຝຶກອົບຮົມຄັ້ງນີ້ ໄປຈັດຕັ້ງປະຕິບັດ ແລະ ຜັນຂະຫຍາຍເຂົ້າໃນໜ້າທີ່ວຽກງານຂອງຕົນ ເພື່ອຍາດແຍ່ງການພົວພັນຮ່ວມມືກັບສາກົນ, ສະກັດກັ້ນ ແລະ ຕ້ານທຸກປະກົດການຫຍໍ້ທໍ້ທີ່ອາດເກີດຂຶ້ນເພື່ອພ້ອມກັນປະຕິບັດແນວທາງການຕ່າງປະເທດຂອງພັກປະຊາຊົນປະຕິວັດລາວໃຫ້ມີຜົນສຳເລັດເປັນກ້າວໆມາ.