ພາຍຫຼັງ​ເຂົ້າຮ່ວມ​ກອງ​ປະຊຸມ​ເຈົ້າໜ້າທີ່​ອາວຸ​ໂສ​ອາຊຽນ ​ແລະ ກອງ​ປະຊຸມອື່ນໆ​ທີ່​ກ່ຽວຂ້ອງ​ ທີ່ ສິງກະ​​ໂປ, ໃນວັນທີ 8 ມິຖຸນາ 2018, ທ່ານ ທອງ​ຜ່ານ ສະຫວັນ​ເພັດ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ ທັງ​ເປັນ​ຫົວໜ້າ​ເຈົ້າໜ້າທີ່​ອາວຸ​ໂສ​ອາຊຽນຂອງ ສປປ ລາວ ​ໄດ້​ສືບຕໍ່ນຳພາ​ຄະນະ​ຜູ້​ແທນ​ລາວ​ເຂົ້າຮ່ວມ​ກອງ​ປະຊຸມ​ເຈົ້າໜ້າທີ່​ອາວຸ​ໂສ​ອາຊຽນ-ຈີນ ຄັ້ງ​ທີ 24 ພາຍໃຕ້ການເປັນປະທານຮ່ວມຂອງສິງກະໂປ ແລະ ສປ ຈີນ ​ເພື່ອ​ທົບ​ທວນຄືນ​ການ​ຮ່ວມ​ມື​ອາຊຽນ-ຈີນ ​ໃນ​​ໄລຍະ​ຜ່ານ​ມາ ​ແລະ ວາງ​ທິດ​ທາງ​ການ​ຮ່ວມ​ມື​ສຳລັບ​ຊຸມ​ປີຕໍ່ໜ້າ.

          ກອງ​ປະຊຸມ​ໄດ້​ສະ​ແດງ​ຄວາມ​ເພິ່ງ​ພໍ​ໃຈ​ຕໍ່ຜົນ​ຂອງ​ການຈັດຕັ້ງຜັນ​ຂະຫຍາຍ​​ບັນດາ​ຄຳ​ຕົກລົງ​ຂ​ອງຜູ້ນຳ​ ອາຊຽນ-ຈີນ ​ໃນ​ກອງ​ປະຊຸມ​ສຸດ​ຍອດ​ອາຊຽນ-ຈີນ ຄັ້ງທີ 20 ທີ່​ໄດ້​ຈັດ​ຂຶ້ນ​ໃນ​ເດືອນ​ພະຈິກ 2017 ຢູ່ ຟີ​ລິບ​ປິນ, ​​ໂດຍ​ສະ​ເພາະ​ແມ່ນ​ຄວາມ​ຄືບໜ້າຂອງການ​ຮ່ວມ​ມື​ໃນ​ຂົງ​ເຂດ​ການ​ຄ້າ, ການ​ລົງທຶນ ​ແລະ ການ​ໄປມາຫາສູ່​ລະຫວ່າງປະຊາຊ​ົນ ​ເຊິ່ງ​​ໄດ້​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ​. ອາຊຽນ ​ແລະ ຈີນ ​ເປັນ​ຄູ່​ຄ້າ​ທີ່​ສຳຄັນ​ໃຫ້​ແກ່​ກັນ ​ແລະ ກັນ, ​ໃນ​ນັ້ນ ຈີນ ​ເປັນ​ຄູ່​ຄ້າ​ໃຫຍ່​ອັນ​ດັບໜຶ່ງ ​ແລະ ທັງ​ເປັນ​ຜູ້​ລົງທຶນ​ໃຫຍ່​ອັນ​ດັບ 4 ຂອງ​ອາຊຽນ. ນອກ​ຈາກນັ້ນ, ກອງ​ປະຊຸມ ຍັງ​ໄດ້​ປຶກ​ສາ​ຫາລື ກ່ຽວກັບ​ກິດຈະກຳ​ຕ່າງໆ ​ເພື່ອສະ​ເຫຼີມສະຫຼອງການ​ເປັນ​ຄູ່​ຮ່ວມ​ຍຸດ​ທະ​ສາດ​ອາຊຽນ-ຈີນ ຄົບຮອບ 15 ປີ ​​ແລະ ຜັນ​ຂະຫຍາຍປີ​ນະ​ວັດຕະ​ກຳ​ອາຊຽນ-ຈີນ ​ໃນ​ປີ 2018 ນີ້ ພ້ອມ​ທັງ​​ຮັບ​ຊາບ​ຂໍ້​ສະ​ເໜີຂອງ​ຈີນ ​ເພື່ອ​ກຳນົດ​ເອົາ​ປີ 2019 ເປັນ​ປີ​​ແລກປ່ຽນ ລະຫວ່າງ ​ສື່​ມວນ​ຊົນ​ອາຊຽນ ​ແລະ ຈີນ. ໃນນີ້ ທ່ານ ທອງຜ່ານ ສະຫວັນເພັດ ໄດ້ເນັ້ນເຖິງຄວາມສຳຄັນຂອງການຮ່ວມມືລະຫວ່າງ ອາຊຽນ-ຈີນ ໃນດ້ານການສຶກສາ ແລະ ການທ່ອງທ່ຽວ ເຊິ່ງສອງຂົງເຂດດັ່ງກ່າວ ມີບົດບາດສຳຄັນຕໍ່ການພັດທະນາເສດຖະກິດ ແລະ ສັງຄົມຂອງບັນດາປະເທດໃນພາກພື້ນອາຊີຕາເວັນອອກສ່ຽງໃຕ້. ພ້ອມນີ້, ທ່ານ ທອງຜ່ານ ສະຫວັນເພັດ ກໍໄດ້ຢ້ຳວ່າ ປີນີ້ແມ່ນປີທ່ອງທ່ຽວ ຂອງ ສປປ ລາວ ເຊິ່ງມີເປົ້າໝາຍດຶງດູດນັກທ່ອງທ່ຽວ ຈາກບັນດາປະເທດສະມາຊິກອາຊຽນ, ສປ ຈີນ ແລະ ປະເທດອື່ນໆ ໃຫ້ໄດ້ 5 ລ້ານເທື່ອຄົນ. ສະນັ້ນ, ເພື່ອບັນລຸເປົ້າໝາຍດັ່ງກ່າວ, ສປປ ລາວ ພ້ອມທີ່ຈະເຮັດວຽກຢ່າງໃກ້ຊິດກັບບັນດາປະເທດສະມາຊິກອາຊຽນ ແລະ ສປ ຈີນ. ນອກຈາກນີ້, ກອງ​ປະຊຸມ​ກໍ​ໄດ້ແລກປ່ຽນຄຳຄິດຄຳເຫັນກ່ຽວກັບ ສະພາບການຢູ່ທະເລຈີນໃຕ້ ແລະ ບັນຫາອື່ນໆ ທີ່ມີຄວາມສົນໃຈຮ່ວມກັນ.

          ກອງ​ປະຊຸມ​ຍັງ​ໄດ້​ແລກປ່ຽນຄວາມ​ຄິດ​ເຫັນ ກ່ຽວກັບ​ການ​ຮ່ວມ​ມື​ພາຍ​ໃຕ້​ກົນ​ໄກ​ອື່ນໆທີ່​ອາຊຽນ​ເປັນ​ຜູ້​ລິ​ເລີ່​ມ​ເຊັ່ນ: ອາຊຽນບວກ​ສາມ, ກອງ​ປະຊຸມ​ສຸດ​ຍອດ​ອາຊີ​ຕາ​ເວັນ​ອອກ ​ແລະ ອື່ນໆ ລວມທັງ​ໂຄງ​ສ້າງ​ຄວາມໝັ້ນຄົງພາກພື້ນ.