ໃນລະຫວ່າງວັນທີ 16-17 ມັງກອນ 2019, ກະຊວງການຕ່າງປະເທດໄດ້ຈັດກອງປະຊຸມເຜີຍແຜ່ຂໍ້ຕົກລົງວ່າດ້ວຍ ການຈັດຕັ້ງ ແລະ ການເຄື່ອນໄຫວຂອງພະແນກການຕ່າງປະເທດແຂວງ, ນະຄອນຫຼວງ (ສະບັບປັບປຸງ)ແລະ ຄໍາແນະນໍາ ວ່າດ້ວຍ ມາດຕະຖານຕຳແໜ່ງຫົວໜ້າພະແນກການຕ່າງປະເທດແຂວງ, ນະຄອນຫຼວງ ທີ່ ແຂວງຫຼວງພະບາງ.
ໂດຍການເປັນປະທານຮ່ວມຂອງ ທ່ານ ນ. ຄຳເພົາເອີນທະວັນ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ວົງສະຫວັນ ເທບພະຈັນ, ຮອງເຈົ້າແຂວງຫຼວງພະບາງ. ບັນດາທ່ານຮອງເຈົ້າແຂວງ, ຮອງປະທານສະພາປະຊາຊົນແຂວງ, ຫົວໜ້າ, ຮອງຫົວໜ້າຫ້ອງວ່າການແຂວງ, ຫົວໜ້າ, ຮອງຫົວໜ້າພະແນກການຕ່າງປະເທດ ແລະ ພະແນກການທີ່ກ່ຽວຂ້ອງຂອງ 8 ແຂວງພາກເໜືອ ຫຼວງພະບາງ, ຊຽງຂວາງ, ຫົວພັນ, ໄຊຍະບູລີ, ອຸດົມໄຊ, ບໍ່ແກ້ວ, ຫຼວງນ້ຳທາ, ຜົ້ງສາລີ ແລະ ພະນັກງານທີ່ກ່ຽວຂ້ອງຂອງກະຊວງການຕ່າງປະເທດໄດ້ເຂົ້າຮ່ວມຈຳນວນທັງໝົດ 120ກວ່າທ່ານ.
ກອງປະຊຸມຄັ້ງນີ້ ມີຈຸດປະສົງເພື່ອເຜີຍແຜ່ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງພະແນກການຕ່າງປະເທດແຂວງ, ນະຄອນຫຼວງ ສຳລັບເປັນບ່ອນອີງໃຫ້ແກ່ການຈັດຕັ້ງ ແລະ ການເຄື່ອນໄຫວວຽກງານຂອງພະແນກການຕ່າງປະເທດແຂວງ, ນະຄອນຫຼວງ ໃຫ້ມີປະສິດທິພາບ ແລະ ປະສິດທິຜົນ ທັງເປັນບ່ອນອີງໃຫ້ອົງການປົກຄອງຂັ້ນແຂວງໃນການກຳນົດຕຳແໜ່ງງານ ໂດຍສອດຄ່ອງກັບພາລະບົດບາດ, ໜ້າທີ່ ແລະ ຂອບເຂດສິດຂອງພະແນກ ການຕ່າງປະເທດແຂວງທີ່ໄດ້ກຳນົດໄວ້ໃນຂໍ້ຕົກລົງສະບັບດັ່ງກ່າວ.
ສຳລັບຄຳແນະນຳ ວ່າດ້ວຍ ມາດຕະຖານຕຳແໜ່ງຫົວໜ້າພະແນກການຕ່າງປະເທດແຂວງ, ນະຄອນຫຼວງ ແມ່ນເພື່ອເປັນບ່ອນອີງໃຫ້ແກ່ເຈົ້າແຂວງ, ເຈົ້າຄອງນະຄອນຫຼວງ ໃນການພິຈາລະນາແຕ່ງຕັ້ງລັດຖະກອນ ເພື່ອດຳລົງຕຳແໜ່ງຫົວໜ້າພະແນກການຕ່າງປະເທດແຂວງ, ນະຄອນຫຼວງ ໃຫ້ສອດຄ່ອງກັບມາດຕະຖານທີ່ໄດ້ກຳນົດໄວ້ໃນຄຳແນະນຳສະບັບນີ້ ກໍຄືສອດຄ່ອງກັບກົດໝາຍ ແລະ ລະບຽບການອື່ນໆທີ່ກ່ຽວຂ້ອງ ແນໃສ່ຮັບປະກັນໃຫ້ການເຄື່ອນໄຫວວຽກງານການຕ່າງປະເທດຂອງແຂວງ, ນະຄອນຫຼວງ ມີປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ.
ການເຜີຍແຜ່ກົດໝາຍວ່າດ້ວຍ ສົນທິສັນຍາ ແລະ ສັນຍາສາກົນ ມີຈຸດປະສົງເພື່ອສືບຕໍ່ສ້າງຄວາມຮັບຮູ້ ແລະ ຄວາມເຂົ້າໃຈຢ່າງເລິກເຊິ່ງ ກ່ຽວກັບ ກົດໝາຍດັ່ງກ່າວ ໃຫ້ແກ່ອົງການປົກຄອງຂັ້ນແຂວງໂດຍສະເພາະການສາ້ງ, ການຈັດຕັ້ງປະຕິບັດ, ການຄຸ້ມຄອງ, ກວດກາ ແລະ ການລາຍງານການຈັດຕັ້ງປະຕິບັດສັນຍາສາກົນທີ່ອົງການຂັ້ນແຂວງຂອງ ສປປ ລາວ ເຊັນກັບຄູ່ຮ່ວມມືຂັ້ນແຂວງຂອງຕ່າງປະເທດ.
ການສ້າງ, ການເຜີຍແຜ່ ແລະ ຈັດຕັ້ງປະຕິບັດກົດໝາຍ ແລະ ນິຕິກຳຂະແໜງການຕ່າງປະເທດ ແມ່ນການຜັນຂະຫຍາຍແນວທາງນະໂຍບາຍການຕ່າງປະເທດຂອງ ພັກ-ລັດ ຕາມມະຕິກອງປະຊຸມໃຫ່ຍ ຄັ້ງທີ X ຂອງພັກ, ມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ, ເລກທີ 037, ວ່າດ້ວຍ ການຍົກສູງປະສິດຕິພາບໃນການຄຸ້ມຄອງ ລັດ, ຄຸ້ມຄອງສັງຄົມດ້ວຍກົດໝາຍ, ມະຕິຂອງກອງປະຊຸມອົງຄະນະພັກກະຊວງການຕ່າງປະເທດ ຄັ້ງທີ III, ຜົນສຳເລັດ ແລະ ທິດທາງຂອງກອງປະຊຸມວຽກງານການຕ່າງປະເທດ ຄັ້ງທີ 13 ໂດຍສະເພາະການຫັນຂະແໜງການຕ່າງປະເທດ ໄປສູ່ການຄຸ້ມຄອງດ້ວຍກົດໝາຍ ແລະ ລະບຽບການຢ່າງໜັກແໜ້ນເທື່ອລະກ້າວ.