ໃນລະຫວ່າງວັນທີ 27-29 ມີນາ 2019, ກະຊວງການຕ່າງປະເທດ ໄດ້ຈັດກອງປະຊຸມຄົບຄະນະຮັບຜິດຊອບສ້າງຮ່າງກົດໝາຍ ວ່າດ້ວຍ ຊາຍແດນແຫ່ງຊາດທີ່ທ່າລາດ, ແຂວງວຽງຈັນ ໂດຍການ ເປັນປະທານຂອງ ທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ, ຊຶ່ງມີບັນດາຫົວໜ້າກົມ, ຮອງຫົວໜ້າກົມ ແລະ ວິຊາການທີ່ຮັບຜິດຊອບຈາກ ກະຊວງການຕ່າງປະເທດ, ຫ້ອງວ່າການສູນກາງພັກ, ຄະນະເລຂາທິການສະພາແຫ່ງຊາດ, ຫ້ອງວ່າການສຳນັກງານນາຍົກລັດຖະມົນຕີ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງຍຸຕິທຳ, ກະຊວງພາຍໃນ, ກະຊວງແຜນການ ແລະ ການລົງທຶນ, ກະຊວງກະສິກຳ ແລະ ປ່າໄມ້, ກະຊວງການເງິນ, ກະຊວງ ໂຍທາທິການ ແລະ ຂົນສົ່ງ, ກະຊວງອຸດສາຫະກຳ ແລະ ການຄ້າ, ກະຊວງແຮງງານ ແລະ ສະຫວັດດີການສັງຄົມ, ສູນກາງແນວລາວສ້າງຊາດເຂົ້າຮ່ວມ ຈຳນວນທັງໝົດ 80 ກວ່າທ່ານ.
ກອງປະຊຸມຄັ້ງນີ້ ມີຈຸດປະສົງເພື່ອປຶກສາຫາລື ແລະ ລະດົມຄຳຄິດເຫັນຂອງຄະນະຮັບຜິດຊອບ ແລະ ພາກສ່ວນທີ່ກ່ຽວຂ້ອງໃສ່ຮ່າງກົດໝາຍ ວ່າດ້ວຍ ຊາຍແດນແຫ່ງຊາດ ແນໃສ່ເຮັດໃຫ້ເນື້ອໃນ ຂອງຮ່າງກົດໝາຍລະອຽດ, ຈະແຈ້ງ ແລະ ຄົບຖ້ວນ. ການສ້າງກົດໝາຍ ວ່າດ້ວຍ ຊາຍແດນແຫ່ງຊາດ ແມ່ນເພື່ອເພີ່ມທະວີປະສິດຕິພາບ ແລະ ປະສິດທິຜົນໃນການຄຸ້ມຄອງວຽກງານຊາຍແດນແຫ່ງຊາດຢ່າງລວມສູນ ແລະ ເປັນເອກະພາບໃນຂອບເຂດທົ່ວປະເທດ ເພື່ອສ້າງຊາຍແດນແຫ່ງຊາດໃຫ້ມີຄວາມໜັ້ນຄົງ, ເປັນຊາຍແດນແຫ່ງສັນຕິພາບ, ສະຖຽນລະພາບ, ມິດຕະພາບ ແລະ ການຮ່ວມມື ກັບບັນດາປະເທດໃກ້ຄຽງ ແນ່ໃສ່ຮັບປະກັນຄວາມເປັນເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງຊາດ, ວຽກງານປ້ອງກັນຊາດ-ປ້ອງກັນຄວມສະຫງົບ ຢູ່ບໍລິເວນຊາຍແດນ, ປະກອບສ່ວນຢ່າງໜັກແໜ້ນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ການສ້າງກົດໝາຍສະບັບດັ່ງກ່າວ ແມ່ນປະຕິບັດຕາມແຜນການສ້າງກົດໝາຍ ປະຈໍາປີ 2019 ຂອງຂະແໜງການຕ່າງປະເທດ ແລະ ມະຕິຂອງກອງປະຊຸມສະພາແຫ່ງຊາດ ຊຸດທີ VIIIສະໄໝສາມັນ ເທື່ອທີ 6 ສະບັບເລກທີ 177/ສພຊ, ລົງວັນທີ 21 ທັນວາ 2018. ຮ່າງກົດໝາຍສະບັບດັ່ງກ່າວ ມີແຜນຈະນໍາເຂົ້າພິຈາລະນາຢູ່ກອງປະຊຸມລັດຖະບານປະຈຳເດືອນ ກໍລະກົດ 2019 ແລະ ຫຼັງຈາກນັ້ນ ມີແຜນຈະນໍາເຂົ້າພິຈາລະນາຢູ່ກອງປະຊຸມສະພາແຫ່ງຊາດ ຊຸດທີ VIII ສະໄໝສາມັນ ເທື່ອທີ 8 ໃນ ທ້າຍປີ 2019.