ໃນວັນທີ 23 ມີນາ 2021, ທີ່ ສູນການຮ່ວມມືສາກົນ ແລະ ການຝຶກອົບຮົມ (ICTC), ໄດ້ຈັດກອງປະຊຸມສໍາມະນາ ພາຍໃຕ້ຫົວຂໍ້:"ບົດບາດຂອງແມ່ຍິງລາວໃນການພັດທະນາເສດຖະກິດ-ສັງຄົມ", ໃຫ້ກຽດເຂົ້າຮ່ວມເປັນປະທານໃນພິທີກ່າວເປີດກອງປະຊຸມໂດຍ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ແລະ ໃຫ້ກຽດບັນຍາຍໂດຍ ທ່ານ ປອ. ນາງ ນິນປະເສີດ ໄຊຍະພອນສີ, ຫົວໜ້າກົມພັດທະນາແມ່ຍິງລາວ, ສູນກາງສະຫະພັນແມ່ຍິງລາວ ແລະ ທ່ານ ທູດ ມະໄລວຽງ ສາກົນນິຍົມ, ຜູ້ຕາງໜ້າ ສປປ ລາວປະຈໍາກໍາມາທິການ ລະຫວ່າງ ລັດຖະບານອາຊຽນ ວ່າດ້ວຍສິດທິມະນຸດ, ຮອງປະທານສະໂມສອນນັກການທູດລາວ. ເຂົ້າຮ່ວມກອງປະຊຸມສໍາມະນາໃນຄັ້ງນີ້ ມີບັນດາຜູ້ຕາງໜ້າຂັ້ນຮອງລັດຖະມົນຕີ, ຂັ້ນກົມ, ຄະນະພະແນກ ແລະ ວິຊາການຈາກ ກະຊວງການຕ່າງປະເທດ, ຄະນະພົວພັນຕ່າງປະເທດສູນກາງພັກ ແລະ ກະຊວງອ້ອມຂ້າງສູນກາງ ລວມທັງໝົດຫຼາຍກວ່າ 150 ທ່ານ.

ໃນໂອກາດດັ່ງກ່າວ, ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ໄດ້ໃຫ້ກຽດກ່າວເປີດພິທີ ໂດຍໄດ້ຊີ້ໃຫ້ເຫັນເຖິງຄວາມໝາຍຄວາມສໍາຄັນຂອງການສົ່ງເສີມບົດບາດຂອງແມ່ຍິງລາວ ໃນການພັດທະນາເສດຖະກິດ-ສັງຄົມ ແລະ ການສ້າງສາພັດທະນາປະເທດຊາດ, ໂດຍສະເພາະໃນຂະແໜງການຕ່າງປະເທດ ແມ່ຍິງກໍ່ໄດ້ປະກອບສ່ວນເຂົ້າໃນການເຄື່ອນໄຫວວຽກງານການຕ່າງປະເທດ-ການທູດ ໃນການຂົນຂວາຍການຮ່ວມມືກັບຕ່າງປະເທດ ແລະ ຍາດແຍ່ງການຊ່ວຍເຫຼືອຈາກສາກົນ.ການຈັດກອງປະຊຸມສຳມະນາດັ່ງກ່າວ ແມ່ນເປັນໜຶ່ງໃນກິດຈະກຳຂອງສະໂມສອນນັກການທູດ ທີ່ຂຶ້ນກັບສະຖາບັນການຕ່າງປະເທດ, ເຊິ່ງນອກຈາກຈະເປັນການສະເຫຼີມສະຫຼອງວັນແມ່ຍິງສາກົນ ຄົບ​ຮອບ 111 ປີ ແລ້ວ ຍັງເປັນການປະກອບສ່ວນກິດຈະກຳຂໍ່ານັບຮັບຕ້ອນ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 66 ປີ (22 ມີນາ 1955-22 ມີນາ 2021). ໃນກອງປະຊຸມ, ຜູ່ບັນຍາຍ ໄດ້ຍົກໃຫ້ເຫັນ ບົດບາດຂອງແມ່ຍິງລາວໃນການພັດທະນາເສດຖະກິດ-ສັງຄົມ; ບົດຮຽນ ແລະ ປະສົບການຂອງນັກການທູດເພດຍິງ ໃນການເຄື່ອນໄຫວວຽກງານການຕ່າງປະເທດ. ປັດຈຸບັນ ຄະນະພັກ-ຄະນະນໍາ, ອໍານາດການປົກຄອງບັນດາຂະແໜງການຕ່າງໆ ກໍໄດ້ເອົາໃຈໃສ່ຕໍ່ການສຶກສາອົບຮົມດ້ານການເມືອງແນວຄິດ, ສ້າງທັດສະນະຫຼັກໝັ້ນການເມືອງຂອງແມ່ຍິງໃຫ້ໜັກແໜ້ນ, ສ້າງໃຫ້ແມ່ຍິງກາຍເປັນກໍາລັງແຮງໃນການປະຕິບັດແຜນພັດທະນາເສດຖະກິດສັງຄົມ ພາຍໃຕ້ຄໍາຂວັນ 03 ດີ ທີ່ວາງອອກ ຄື: ເປັນພົນລະເມືອງດີ, ພັດທະນາດີ ແລະ ສ້າງຄອບຄົວໃຫ້ມີີຄວາມຜາສຸກ.

ການສົ່ງເສີມສິດສະເໝີພາບ ຍິງ-ຊາຍ ແມ່ນມີຄວາມສຳຄັນໃນການຊຸກຍູ້ການຂະຫຍາຍຕົວດ້ານເສດຖະກິດ ເພາະແມ່ນການປົດປ່ອຍກຳລັງການຜະລິດ ເພດຍິງທີ່ມີເຄິງໜຶ່ງຂອງ ພົນລະເມືອງໂລກ, ພອນສະຫວັນດ້ານການຜະລິດຂອງແມ່ຍິງ ແມ່ນກຳລັງແຮງທີ່ສ້າງຄວາມອາດສາມາດໃນການແຂ່ງຂັນຂອງປະເທດ. ໂດຍສັງລວມແລ້ວຈະເຫັນວ່າ ການສຶກສາກ່ຽວກັບແມ່ຍິງໃນເປົ້າໝາຍການເມືອງ ແລະ ວິຊາການແມ່ນມີຄວາມຈໍາເປັນເພື່ອສໍາຫຼວດໃຫ້ໄດ້ຂໍ້ມູນລະອຽດຮອບດ້ານ ແລະ ການເຂົ້າເຖິງຊຸມຊົນກຸ່ມຕ່າງໆ. ທັງນີ້ກໍ່ເພື່ອຜົນປະໂຫຍດດ້ານການຄົ້ນຄວ້າວິໄຈ ອັນນໍາໄປສູ່ການແກ້ໄຂບັນຫາ, ກໍາຈັດອຸປະສັກ ແລະ ສຸດທ້າຍກໍ່ເພື່ອປັບປຸງຊີວິດການເປັນຢູ່ສ່ວນບຸກຄົນຂອງແມ່ຍິງ, ຄອບຄົວ ສັງຄົມຂອງແມ່ຍິງໃຫ້ດີຂຶ້ນເລື້ອຍໆ, ເຊິ່ງຈະເປັນກໍາລັງແຮງເຄິ່ງໜຶ່ງຂອງພົນລະເມືອງ ປະກອບສ່ວນໃນການສ້າງສາພັດທະນາເສດຖະກິດ-ສັງຄົມຂອງປະເທດຊາດ.