ໃນວັນທີ 5 ມັງກອນ 2022 ທີ່ ກະຊວງການຕ່າງປະເທດ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ທັງເປັນເຈົ້າໜ້າທີ່ອາວຸໂສອາຊຽນ ຂອງ ສປປ ລາວ ໄດ້ນໍາພາຄະນະເຂົ້າຮ່ວມກອງປະຊຸມເຈົ້າໜ້າທີ່ອາວຸໂສອາຊຽນ ແບບທາງໄກ. ກອງປະຊຸມຄັ້ງນີ້ເປັນກອງປະຊຸມຄັ້ງທໍາອິດ ພາຍໃຕ້ການເປັນປະທານອາຊຽນຂອງ ກໍາປູເຈຍ (ປະທານອາຊຽນ ສົກປີ 2022) ແລະ ມີການເຂົ້າຮ່ວມຂອງບັນດາເຈົ້າໜ້າທີ່ອາວຸໂສປະເທດອາຊຽນອື່ນ ແລະ ຮອງເລຂາທິການໃຫຍ່ອາຊຽນຢ່າງພ້ອມພຽງ.

ກອງປະຊຸມ ໄດ້ປຶກສາຫາລື ເປັນຕົ້ນແມ່ນ ແຜນການເຄື່ອນໄຫວ, ຫົວຂໍ້ປຶກສາຫາລື ແລະ ດ້ານພະລາທິການ ອື່ນໆເພື່ອກະກຽມ ໃຫ້ແກ່ກອງປະຊຸມ ລັດຖະມົນຕີຕ່າງປະເທດ ອາຊຽນ ວົງແຄບ, ເຊິ່ງຈະຈັດຂຶ້ນໃນລະຫວ່າງວັນທີ 18-19 ມັງກອນ 2022 ທີ່ ສຽມຣຽບ, ລາຊະອານາຈັກກໍາປູເຈຍ.