ພາຍໃຕ້ການ​ນຳພາຊີ້​ນໍາ​ຂອງ​ຄະນະ​ພັກ-ຄະນະ​ນໍາ​, ຄະນະກວດກາພັກກະຊວງ​ການ​ຕ່າງປະ​ເທດ ໃນ​ການຈັດ​ຕັ້ງ​ປະຕິບັດ​ແຜນບຳລຸງ-ກໍ່ສ້າງພະນັກງານຂອງກະຊວງ​ການ​ຕ່າງປະ​ເທດ ​ແລະ ​ໄດ້​ຮັບ​ການ​ຮ່ວມ​ມື​ສະໜັບສະໜູນຈາກ​ຄະນະກວດກາສູນກາງພັກ ແລະ ອົງການ​ກວດກາ​ແຫ່ງລັດ, ໃນວັນທີ 26 ເມສາ 2022 ທີ່ ຫ້ອງປະຊຸມໃຫ່ຍ ຊັ້ນ 3 (ຕຶກ B) ກະຊວງການຕ່າງປະເທດ ໄດ້ມີພິທີມອບ-ຮັບ ໃບຢັ້ງຢືນການສຳເລັດຈັດຊຸດຝຶກອົບຮົມວຽກງານກວດກາ ຊຸດທີ IlI ໃຫ້ແກ່ບັນດານັກ​ສຳ​ມະ​ນາກ​ອນທີ່​ມາ​ຈາກ​ບັນດາ​ໜ່ວຍ​ພັກ ທີ່​ເຮັດ​ວຽກ​ງານ​ກວດກາຂອງກະຊວງການຕ່າງປະເທດ ຈໍານວນ 47 ສະຫາຍ, ຍິງ: 22 ສະຫາຍ.

ການຈັດ​ຝຶກ​ອົບຮົມ​ຄັ້ງ​ນີ້  ໄດ້ດຳເນີນມາເປັນໄລຍະເວລາ 11 ວັນລັດຖະການ ນັບແຕ່ວັນທີ 11-25 ມີນາ  2022 ຜູ້ເຂົ້າຮ່ວມໄດ້ຮຽນຮູ້ພື້ນຖານ ກ່ຽວກັບບັນດາເນື້ອໃນເອກະສານທີ່ກ່ຽວຂ້ອງກັບວຽກງານຕິດຕາມ, ກວດ ກາ, ຊຶ່ງປະກອບມີ: ວຽກງານຕິດຕາມ, ວຽກງານກວດກາພັກ, ວຽກງານກວດກາລັດ, ຄວາມຮູ້ກ່ຽວກັບຈິດຕະ ສາດໃນວຽກງານກວດກາ, ວິທີການສ້າງແຜນການ ແລະ ເອກະສານດໍາເນີນການກວດກາ, ກວດກາໂຄງການລົງທຶນຂອງລັດເລີ່ມແຕ່ຫົວທີ, ວຽກງານຄົ້ນຄວ້າຄໍາຮ້ອງຟ້ອງ, ຮ້ອງທຸກ ແລະ ຄໍາສະເໜີ, ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ, ວຽກງານສືບສວນ - ສອບສວນ, ວຽກງານແກ້ໄຂຜົນການກວດກາ ແລະ ການຕິດຕາມການ ຈັດຕັ້ງປະຕິບັດຜົນການກວດກາ, ການສ້າງສຳນວນເອກະສານ ແລະ ສຳເນົາເອກະສານວຽກງານກວດກາ ແລະ ການກວດສອບ, ຊຶ່ງໃຫ້ກຽດຂຶ້ນສອນ ແລະ ບັນຍາຍ ໂດຍບັນດາຄູອາຈານຈາກຄະນະກວດກາສູນກາງພັກ  ແລະ  ອົງການກວດກາແຫ່ງລັດ, ອົງການໄອຍະການປະຊາຊົນສູງສຸດ  ແລະ  ອົງການກວດສອບແຫ່ງລັດ. 

ໃນໂອກາດພິທີ​ມອບ-ຮັບ​​ໃບ​ຢັ້ງຢືນຊຸດຝຶກອົບຮົມວຽກງານກວດກາ ຄັ້ງທີ  IIl  ຂອງກະຊວງການຕ່າງປະເທດ​​ໃນ​ຄັ້ງ​ນີ້, ທ່ານ  ບຸນເຫຼືອ  ພັນດານຸວົງ, ຄະນະປະຈໍາພັກ, ປະທານຄະນະກວດກາພັກ, ຮອງລັດຖະມົນຕີກະຊວງການຕ່າງປະເທດ ໄດ້ໃຫ້ກຽດມອບໃບຢັ້ງຢືນ ແລະ ມີທິດຊີ້ນຳຕໍ່ພິທີ​ດັ່ງກ່າວ ເຊິ່ງທ່ານໄດ້ເນັ້ນໃຫ້ບັນດານັກສຳມະນາກອນເອົາໃຈໃສ່ນຳເອົາບົດຮຽນທີ່ໄດ້ຝຶກອົບຮົມໃນຄັ້ງນີ້ ໝູນໃຊ້ເຂົ້າໃນການເຄື່ອນໄຫວໜ້າທີ່ວຽກງານ ຢູ່ໜ່ວຍພັກຂອງຕົນ ເພື່ອ​ຍົກສູງ​ວຽກ​ງານຕິດຕາມ, ກວດກາ​, ສະກັດ​ກັ້ນ ​ແລະ ຕ້ານ​ການ​ສໍ້​ລາດ​ບັງ​ຫລວງຂອງ​ກະຊວງ​ການ​ຕ່າງປະ​ເທດ ໃຫ້​ມີ​ຄຸນນະພາ​ບ, ມີ​ຜົນ​ສັກ​ສິດຢ່າງແທ້ຈິງ ແລະ ສອດຄ່ອງກັບແນວທາງຂອງພັກ ທີ່ວ່າ:  “ວຽກງານຕິດຕາມ ກວດກາ ແມ່ນສອດຫ້ອຍເຂົ້າໃນຂົງເຂດວຽກງານ, ເປັນວຽກທີ່ຕ້ອງເຮັດເປັນປົກກະຕິ ແລະ ຂາດບໍ່ໄດ້ສໍາລັບການນໍາພາຂອງພັກ ແລະ ການຄຸ້ມຄອງຂອງລັດ”. ພ້ອມນີ້, ກໍໄດ້ສະ​ແດງ​ຄວາມ​ຂອບ​ໃຈ​​ມາ​ຍັງ​ຄະ ນະກວດກາສູນກາງພັກ, ອົງການກວດກາແຫ່ງລັດ, ອົງການໄອຍະການປະຊາຊົນສູງສຸດ ແລະ ອົງການກວດສອບແຫ່ງລັດ ທີ່​ໄດ້​ເອົາໃຈໃສ່ໃຫ້ການ​ຮ່ວມ​ມື, ສະໜັບສະໜູນໃນ​ການ​ຕອບ​ສະໜອງນັກ​ວິທະຍາ​ກອນ​ ແລະ ເອກະ ສານປະກອບສ່ວນ​ບໍາລຸງ - ກໍ່ສ້າງພະນັກງານ-ສະມາຊິກພັກ ທີ່ເຮັດວຽກງານກວດກາ ຂອງບັນດາໜ່ວຍພັກ​ຂື້ນກັບ​ອົງຄະ​ນະ​ພັກ​ກະຊວງ​ການ​ຕ່າງປະ​ເທດ ໃຫ້ມີຄວາມເຂັ້ມແຂງ ແລະ ເຂົ້າໃຈວຽກງານ ຕິດຕາມ, ກວດກາ ສາມາດເປັນເສນາທິການໃຫ້ຂັ້ນເທິງ ກໍຄື ຄະນະກວດກາພັກກະຊວງການຕ່າງປະເທດ ຢ່າງມີປະສິດທິພາບ ແລະ ປະສິດທິຜົນ.