ໃນວັນທີ 28 ເມສາ 2022, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ທັງເປັນຫົວໜ້າເຈົ້າໜ້າທີ່ອາວຸໂສອາຊຽນ ຂອງ ສປປ ລາວ, ໃນນາມທີ່ ສປປ ລາວ ເປັນປະເທດປະສານງານ ສໍາລັບການຮ່ວມມື ອາຊຽນ-ອົດສະຕຣາລີ, ໄດ້ເປັນປະທານຮ່ວມກອງປະຊຸມປຶກສາຫາລື ອາຊຽນ-ອົດສະຕຣາລີ ຄັ້ງທີ 34 ແບບທາງໄກ ທີ່ ກະຊວງການຕ່າງປະເທດ ຮ່ວມກັບ ທ່ານ ນາງ Katrina Cooper, ຮອງລັດຖະມົນຕີກະຊວງການຕ່າງປະເທດ ແລະ ການຄ້າ, ຫົວໜ້າເຈົ້າໜ້າທີ່ອາວຸໂສອາຊຽນ ຂອງອົດສະຕຣາລີ. ເຂົ້າຮ່ວມກອງປະຊຸມຄັ້ງນີ້ ມີບັນດາຫົວໜ້າເຈົ້າໜ້າທີ່ອາວຸໂສອາຊຽນ ແລະ ຮອງເລຂາທິການໃຫຍ່ອາຊຽນ.

ກອງປະຊຸມໄດ້ຕີລາຄາສູງຕໍ່ຜົນການຮ່ວມມື ອາຊຽນ-ອົດສະຕຣາລີ ໃນໄລຍະຜ່ານມາ, ໂດຍສະເພາະການຈັດຕັ້ງປະຕິບັດ ແຜນປະຕິບັດງານການຮ່ວມມື ອາຊຽນ-ອົດສະຕຣາລີ ໄລຍະ 2020-2024 ໂດຍກວມເອົາທັງສາມເສົາຄ້ຳການສ້າງປະຊາຄົມອາຊຽນ ຄື: ການເມືອງ-ຄວາມໝັ້ນຄົງ, ເສດຖະກິດ ແລະ ວັດທະນະທຳ-ສັງຄົມ. ພ້ອມນີ້, ກອງປະຊຸມຍັງໄດ້ປຶກສາຫາລື ແລະ ເປັນເອກະພາບກັນ ຕໍ່ທິດທາງແຜນການຈັດຕັ້ງຜັນຂະຫຍາຍ ການເປັນຄູ່ຮ່ວມຍຸດທະສາດຮອບດ້ານ ອາຊຽນ-ອົດສະຕຣາລີ ໃນຕໍ່ໜ້າ ກໍຄືຜົນຂອງ ກອງປະຊຸມສຸດຍອດ ອາຊຽນ-ອົດສະຕຣາລີ ໃນປີ 2021 ຊຶ່ງໃນນັ້ນມີບັນດາຂໍ້ລິເລີ່ມ  ໃໝ່ຂອງອົດສະຕຣາລີ ສຳລັບອາຊຽນ ທີ່ມີມູນຄ່າທັງໝົດ 124 ລ້ານໂດລາອົດສະຕຣາລີ ຄື: ຂໍ້ລິເລີ່ມອົດສະຕຣາລີ ເພື່ອອະນາຄົດຂອງອາຊຽນ, ທຶນການສຶກອົດສະຕຣາລີ ສຳລັບ ອາຊຽນ ແລະ ຂໍ້ລິເລີ່ມອົດສະຕຣາລີ ສຳລັບການຫັນປ່ຽນເປັນດີຈີຕອນ ແລະ ທັກສະສຳລັບອະນາຄົດຂອງອາຊຽນ.

ນອກຈາກນີ້, ກອງປະຊຸມຍັງໄດ້ແລກປ່ຽນຄວາມຄິດເຫັນ ຕໍ່ບາງບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ສປປ ລາວ ເປັນປະເທດປະສານງານການພົວພັນ ອາຊຽນ-ອົດສະຕຣາລີ ເປັນເວລາສາມປີ (2021-2024).